Media-icmal 26.04.2016

Bakıda keçirilən VII Qlobal Forum, kreditləşmə sahəsindəki durum, neft hasilatının azalması, rəsmi Bakının gənclər siyasətinə münasibəti, həbçilərin icbari sığorta haqlarının ödənməməsi medianın apaıcı mövzusudur.       

Bu dövlət başçısına növbəti etimaddır

“Azərbaycan” qəzeti Bakıda davam edən BMT Sivilzasiyalar Alyansı VII Qlobal Forumu haqda “Bakıda dünya birləşir” adlı məqalə dərc edib.  Məqalədə bu tədbirin Bakıda keçirilməsi xüsusi qabardılır və bu barədə məqalədə oxuyuruq:

“Alyansın forumunun Bakıda keçirilməsi barədə qərar həm də Azərbaycan prezidentinə olan ehtiram və güvənin növbəti nümunəsi idi. Təsadüfi deyil ki, BMT baş katibi Pan Gi-Mun dövlət başçısına olan məktuibda qeyd edir ki, “Sizin şəxsi mövqeyiniz və liderliyiniz sayəsində Alyansın 7-ci Qlobal Forumu öz gələcək kursunu peşəkarlıqla müəyyən edəcək”.  

Ekspert: “Kredit şərtləri ağırlaşdırılır, dollar kreditlərinə güzəşt yoxdur”

Ekspert Samir Əliyev Maliyyə Bazarlarına Nəzarət Palatasının rəhbəri Rüfət Aslanlının ölkədə kreditləşmənin yeni modelinin hazırlanması ilə bağlı açıqlamasını “Azadlıq” qəzetinə şərh edib.

Onun sözlərinə görə, bu məsələdə Palata ilə Mərkəzi Bankın mövqeləri üst-üstə düşdü. S.Əliyevə görə, Palata təsdiqlədi ki, iqtisadiyyatda risk yüksəkdir və manatın yönəldilməsi dollar alışını stimullaşdıra bilər. O deyib ki, Palata sədri problemin bank sektorunda yox, bankdankənar sektorda daha yüksək olduğunu göstərdi. “Əsas mesajlar da bundan ibarətdir ki, Palatanın kredit verilməsi şərtlərini yumşaltmaq fikri yoxdur. Bu sərtləşdirmə davam edəcək, odur ki, Palatanın əsas işi   kredit şərtlərini ağırlaşdırmaq olacaq”. O deyib ki, aylıq kredit ödənişinin aylıq gəlirdən çox ola bilməməsi zahirən xaoş görünür. Amma yüksək kredit faizləri fonunda bu insanlara kredit verilməsindən imtina deməkdir. “Odur ki. problem kredit fazilərinin həddindən artıq yüksək olmasındadır. Amma bütün dünyada kredit verilərkən kredit götürənlərlin qazancları nəzərdən keçirilir. Sadəcə, Azərbaycanda kredit ödənişlərinin aylıq qazancda payına diqqət yetirməyə gec başlayıblar. Zamanında buna diqqət yetirsəydilər bu qədər problem yaşanmazdı”.

Eyni zamanda ekspert hazırda vətəndaşların diqqət mərkəzində olan dollarla götürülən kreditlərə güzəşt məsələsinə də toxunur: “Aydın görünür ki, dollar krediti götürən və iki devalvasiyadan ziyan çəkənlərə dövlətin kompensasiya verməyəcəyi artıq dəqiqləşib”.

O.Haqverdiyev: “Neft hasilatı ilbəil azalır”

“Azərbaycanda neft hasilatı iki halda “qara qızıl” ehtiyatları azaldıqda və ona alternativ tapıldıqda dayana bilər, digər variantlar mənasızdır,  bəşəriyyət orta əsrlərə qayıtmaq fikrində deyil”. Ekspert Oqtay Haqverdiyev bunu “Exo” qəzetinə şərh edib. Ona görə, tərəqqi bir yerdə dayanmır, artıq digər alternativlərdən istifadə etməklə avtomobilləri hərəkətə gətirən mənbələr var.

O deyib: “İlbəil Azərbaycanda neft hasilatı aşağı düşür, yataqlar ömürlərini başa vururlar, onlardan yenidən istifadə isə baha başa gəlir. Sənaye ehtiyatları ancaq 20-30 ilə hesablanır”. 10-15 ildən sonra Azərbaycan neftdən çox qaz ixracatçısı olacaq.            

Gənclik siyasəti yanlışdır

“Novoye Vremya” qəzetində dərc edilən “Gəncliyə investisiya” məqaləsində rəsmi Bakının gənclər siyasəti tənqid edilir və çıxış yollarının nədə olması göstərilir. “Biz yürüdülən indiki gənclik siyasətindən daha çox, onun inkişaf yollarından danışmaq istəyirik. Gəncliyə investisiya bu ölkədə keyfiyyətli təhsil deməkdir ki, xaricdə oxumağa can atmasın. Bu gənc kadrlar üçün  yeni iş yerlərinin açılması deməkdir. Yoxsa elə alınır ki, ali məktəb məzunlarının 50-60%-i öz ixtisası üzrə iş tapa bilmir. Onların çoxu isə işsiz qalır. Onda bu zaman bir tikə çörək qazanmaq üçün onların çoxunun ölkədən getmək istəməsinə təəccüblənməyə dəyməz”.

Məqalədə gəncliyə investisiya qoymağın onların mənzil problemini həll etmək demək olduğu vurğulanır. İpoteka kreditləşmə proqramı fəalyyətə başlayanda bunun ətrafındakı səs-küy, amma proqramın tezliklə sıradan çıxdığı qeyd olunur.

Proqramın baş tutmamasına səbəb kimi işsizlik, ipoteka kreditinin yüksək faizli, əməkhaqqının az olması göstərilir. Böhranın çoxsaylı kadrların ixtisarına səbəb olduğu nəzərə çatdırılır.

Müəllifin düşüncəsinə görə, ölkə gəncliyinə bütöv münasibət yoxdur.

Gəncliyi siyasi mənada loyallara, müxalif olanlara, habelə korporativ və qohumluq maraqları nəzərə alınmaqla “özününkü” və “özgə”lərə bölürlər. Gənclik siyasətinin formalaşdırılmasına belə qeyri-konstruktiv yanaşma gənclərdə bu siyasəti icra edən qurumlara etimadsızlığa səbəb olur. Məqalədə oxuyuruq: “Məsələn, dövlət qurumlarının təşkil etdiyi tədbirlərdə nəyinsə tənqid olunmasına nadir hallarda rast gəlmək olar. Bir qayda olaraq bu mənada aktiv gənclik belə tədbirlərə dəvət edilmir. Niyə? Axı, həqiqətlər mübahisələrdə doğulur. Düzdür, tənqid də tənqid xatirinə olmamalıdır. Məgər gəncliyin qaldırmağa problemi azdır? Alternativ düşüncəyə qərəzli yanaşmaq olmaz. Əks halda gəncliyə nə qədər investisiya qoyulsa xeyri az olacaq”.

Deputat V.Əhmədov: “Hərbçilərin “qan pulları” verilməlidir”

“Bizm Yol” qəzeti hərbi əməliyyatlarda həlak olan şəhid ailələrinə icbari sığorta pullarının ödənilməməsini araşdırır. Ekspertlərin açıqlamalarına görə, hazırda 13500 ailə bu pulları almalıdır. Hətta buna dair 10-15 illik yaşı olan məhkəmə qərarlarına baxmayaraq, 11 min manat ödənmir.

Deputata Vahid Əhmədov bu məsələnin həllini tapmasını vacib saydığını deyir. “Bu şəxslər vətən yolunda şəhid olublar və bunun ödənməsinə ikili münasibət ola da bilməz”.

“Vətən Fədailərinin Hüquqlarının Müdafiəsi” İctimai Birliyinin sədri Dadaş Quliyev bununla bağlı ilyarımdan çoxdur ki, Konstitusiya Məhkəməsinin parlamentə tövsiyə ünvanladığıını, hələ də yerinə yetirilmədiyini bildirir.

“On beş ay ərzində qərar qəbul etməyən Milli Məclisin bundan sonra neçə müddətə qərar qəbul edəcəyi də bəlli deyil”.

D.Quliyevin dediklərinə görə, bu məhkəmə qətnamələrin icra olunmaması, sadəcə, şəhidlərə. onların ailələrinə və hüquqlarına hörmətsizlikdir.