Media-icmal 26.10.20

“Azərbaycan” qəzeti “Prezident İlham Əliyev: Bu gün Azərbaycan əsgəri və zabiti döyüş meydanında düşmənə dərs verir, düşməni torpaqlarımızdan qovur” sərlövhəli məqalədə dövlət başçısı İlham Əliyevin hərbi əməliyyatları dəyərləndirməsinə yer verib.

Dövlət başçısı deyir ki, bir aya yaxındır ki, müharibə gedir. Bu müddət ərzində ölkəmiz döyüş meydanında böyük uğurlar əldə edib.

Onun sözlərinə görə, hər gün cəbhədən yaxşı xəbərlər gəlir, gün ərzində müntəzəm olaraq döyüş bölgələrində aparılan əməliyyatlar haqqında məlumat alır, hər gün operativ müşavirələr keçirilir.

Müəllif deyir ki, Prezident, Ali Baş Komandan İlham Əliyev bunu Müdafiə Nazirliyinin Mərkəzi Komanda Məntəqəsində keçirilən operativ müşavirədə bildirib.

Dövlət başçısı vəziyyətin tam nəzarət altında olduğunu, bu müddətdə işğal edilmiş torpaqların bir hissəsinin, 100-dən çox yaşayış məntəqəsi - şəhərlərin, kəndlərin işğalçılardan azad edildiyini deyib.

Dövlət başçısı vurğulayıb ki, azad edilmiş şəhər və kəndlərdə artıq Azərbaycan bayrağı ucaldılıb, amma bu şəhər və kəndlərdə bir dənə də salamat bina qalmayıb, bütün binalar, evlər, inzibati binalar, sosial obyektlər, tarixi-dini abidələrimiz mənfur düşmən tərəfindən dağıdılıb.

“Mən tapşırıq vermişəm ki, işğaldan azad edilmiş bütün bölgələrdə təftiş işləri aparılsın, bütün dağıntılar qeydə alınsın, aktlar tərtib edilsin, bizim vətəndaşlarımızın dağıdılmış əmlakı uçota alınsın və əlbəttə ki, Ermənistan dövləti bu hərbi cinayətlərə görə cavab verəcək. Bir daha bütün dünya gördü ki, biz hansı vəhşilərlə üz-üzəyik”, deyə dövlət baçısı qeyd edib.

O vurğulayıb ki, bu gün Azərbaycan əsgəri və zabiti döyüş meydanında düşmənə dərs verir, düşməni yerinə oturdur, düşməni torpaqlarımızdan qovur: “Biz qan tökürük, şəhidlər veririk, hərbçilər, eyni zamanda, mülki şəxslər şəhid olur. Ermənistan döyüş meydanında bizim qarşımızda duruş gətirə bilmir və yenə də hər zaman olduğu kimi, öz çirkin əməllərini davam etdirir, yaşayış məntəqələrimizi, mülki əhalinin yaşadıqları yerləri atəşə tutur. Bu namərd atəş nəticəsində 60-dan çox mülki şəxs həlak olub, 300-ə yaxın mülki şəxs yaralanıb”, - deyə Prezident, Ali Baş komandan İlham Əliyev qeyd edib.

“Redaktor.az” saytı “Azərbaycanda sərt qadağalar tətbiq edilə bilər - COVID-19” sərlövhəli məqalədə müəllif son vaxtlar koronavirus infeksiyasına yoluxma hallarının artmasının səbəblərini dəyərləndirir.

Müəllif deyir ki, ölkədə bir sıra qadağalar olmasına baxmayaraq, koronavirusa yoluxma statistikasında artım davam edir.

Ekspertlər hesab edirlər ki, virusun statistikasında azalma insanlarda müəyyən arxayınlıqların yaranmasına səbəb oldu.

Ekspertlər əlavə edirlər ki, son vaxtlar yoluxmada ciddi artım var, onlara görə, bunun bir təfəri  payız aylarında soyuqdəymə, qrip kimi xəstəliklərin baş qaldırmasıdırsa, digər tərəfi insanlarda arxayınlıq yaranması, maskadan istifadəyə, sosial məsafəni gözləməyə ciddi əməl olunmamasıdır.

Ekspertlərə görə, son bir ayda ölkə insanlarının diqqəti hərbi əməliyyatlara  cəmlənib, virusa yoluxma təhlküəsi arxa plana keçib: “...Bu, çox səhv yanaşmadır.

Hazırda arxa cəbhədə olanlar virusdan qorunma yollarına hər zamankindən daha diqqətli yanaşmalıdır”.

Ekspertlər əlavə edirlər ki, yoluxmanın artması ilə bağlı yeni qərarlar qəbul edilə, ən sərt tədbirlərə də gedilə bilər.

“Yenisabah.az” saytında “Müqavimət qırıldı -Azərbaycan Ordusu irəliləyir” sərlövhəli məqalədə müəllif hazırda davam edən hərbi əməliyyatların gedişini dəyərləndirir.

Müəllif deyir ki, Dağlıq Qarabağda eskalasiyanın başlamasından dörd həftə keçir, amma artıq erməni silahlı qüvvələri acınacaqlı vəziyyətə düşüb.

Azərbaycan PUA-ları və artilleriyası onları geri çəkilməyə məcbur edir, itkilərinin yerini doldura bilməyən aciz erməni ordusu isə mövqelərini itirir.

Müəllifin sözlərinə görə, bu barədə “Avrasiyanet”də (Eurasianet) Dağlıq Qarabağda Ermənistan ordusunun hərbi vəziyyətinin qeyri-müəyyən olması barədə dərc edilən məqalədə bildirilib.

Müəllif adı çəkilən yazıya istinadən deyir ki, hazırda Ermənistan silahlı qüvvələri tam mühasirəyə alınmaq təhlükəsi ilə üz-üzədir: “Ermənistanla Dağlıq Qarabağı birləşdirən Laçın dəhlizinə Azərbaycan artilleriyasının əli çatır. İstisna deyil ki, Azərbaycan bu yolu bir neçə gün ərzində nəzarət altına alacaq və ya onun qarşısını kəsmək imkanına malik olacaq. Cəbrayıl, Hadrut və Füzulini nəzarətə götürərək Azərbaycan hərbçiləri qərbə, Həkəri çayı vadisinə tərəf gedərək, şimala üz tutub.

Qarşıdurma bitməyib, amma artıq aydındır ki, Ermənistan Azərbaycanın nailiyyətləri qarşısında acizdir və itkilərinin yerini doldurmaq imkanına sahib deyil. Mövqelərini təslim etməmək cəhdi isə erməni ordusunun mühasirəyə düşməsinə səbəb olacaq”.

 Azərbaycan Silahlı Qüvvələrinin irəliləməsini dayandırmaq niyyətində olduğuna dair heç bir əlamət olmasa da, rəsmi Bakı uğurlu hərbi əməliyyatlar və ərazilərinin öz nəzarətinə qaytarılması baxımından əhəmiyyətli siyasi qələbə iddiasında ola bilər.

Məqalədə vurğulanır ki, hərbi üstünlük çoxdan Ermənistan üzərində keyfiyyət və kəmiyyət üstünlüyünə sahib olan Azərbaycan Ordusu tərəfindədir.

Onilliklər ərzində rəsmi Bakı enerji resurslarının ixracından əldə olunan vəsaiti Rusiya, Türkiyə və İsraildən texnika almağa sərf edərək Silahlı Qüvvələrini modernləşdirib.

“Moderator.az” saytı  “Artıq Azərbaycan dövləti nəinki regionda, dünyada söz sahibinə çevrilir” sərlövhəli məqalədə Azərbaycanın dünyada nüfuz qazanmaqda davam etdyini bildirir. 

Müəllif yada salır ki, bu yaxınlarda BMT Təhlükəsizlik Şurasında Ermənistan-Azərbaycan müzakirələri keçirilib və belə bir müzakirə sonuncu dəfə 1995-ci ildə keçirilib.

Müəllif vurğulayır ki, iclasdan sonra ATƏT-in Minsk qrupunun həmsədr ölkələri kimi Rusiya, Fransa və ABŞ tərəfindən TŞ Prezidentinin layihəsi hazırlanaraq razılaşdırılması üçün üzv ölkələr arasında yayılıb. 

Müəllifin sözlərinə görə, layihədə Ermənistan qoşunlarının Azərbaycanın işğal edilmiş əeazilərindən çıxmasını tələb edən 822, 853, 874 və 884 saylı  qətnamələrə istinad edilməyib. Bu bilərəkdən edilmiş diplomatk səhv idi, həmsədr ölkələrin canfəşanlıqlarına baxmayaraq, Qoşulmama Hərəkatının 7 üzvü (İndoneziya, Nigeriya, Vyetnam, Tunis, Cənubi Afrika, Dominikan, Sent Vinsünt və Qrenada) layihədə BMT-nin adı çəkilən qətnamələrinə istinad olunmasını tələb ediblər.

Müəllif deyir ki, bundan sonra həmsədr ölkələr bəyanat layihəsini geri çəkiblər, bu isə artıq Azərbaycanıın xarici siyasətdə qazandığı uğurdur.