Media-icmal 26.12.19

Bu il dekabrın 23-də keçirilmiş bələdiyyə seçkilərinə münasibət, paytaxtın bir qrup sakininin sosial qayğıları və s. məsələlər medianın aparıcı mövzuları sırasındadır.

Demokratik seçki nümunəsi

“Azərbaycan” qəzeti “Demokratik və şəffaf seçki nümunəsi” sərlövhəli məqalədə bu il dekabrın 23-də keçirilmiş bələdiyyə seçkilərinin mahiyyətini dəyərləndirir.

Müəllif deyir ki, 2019-cu il bir çox hadisələrlə yadda qalıb, bunlardan biri də dekabrın 23-də keçirilən sayca beşinci bələdiyyə seçkiləri oldu. Seçici hüququna malik ölkə vətəndaşları növbəti 5 il üçün yerli özünüidarəetmə orqanlarına üzv seçilmək istəyən namizədlərə etimad göstərdilər.

Müəllif deyir ki, 118 dairədə, bələdiyyə üzvlərini seçmək üçün səsvermə keçirildi, 41462 namizəd qeydə alınmışdı.

Müəllif vurğulayır ki, vətəndaşlar istədikləri namizədin bələdiyyə üzvlüyünə seçilməsinə səs veriblər, səsvermə başa çatarkən səsvermə hüququ olan vətəndaşlardan 1 milyon 627 min 64 nəfərnin və ya 32,72%-nin  bu hüuquqndan istifadə etdiyi məlum olub.

Yazı müəllifinin iddiasına görə, Türkiyə KİV-ləri bütün məntəqələrdə  seçicilərin öz siyasi iradələrini azad şəkildə ifadə etdiklərini bildirir.

Seçici fəallığı, səsvermənin izlənilməsi üçün kütləvi informasiya vasitələri nümayəndələrinə yaradılan şərait, namizədləri təmsil edən şəxslər və müşahidəçilərin hüquqlarının qorunması məsələləri də qardaş ölkə mediasının məlumatlarında yer alıb.

“Mərkəzi Seçki Komissiyası da  dekabrın 23-də açıqladığı məlumatda bəyan etdi ki, ümumilikdə seçkilər sakit şəraitdə keçib, seçicilərin öz iradələrini ifadə etmələri üçün hər cür şərait yaradılıb, onlar da bundan lazımi qaydada istifadə edib istədikləri namizədə səs veriblər” deyə müəllif rəsmi açıqlamanı diqqətə çatdırır.

Müəllif hesab edir ki, bələdiyyələr regionların idarə olunmasında, sosial və iqtisadi problemlərinin həllində, yaxından iştirak etmək imkanları qazandı, onların sırasında gənclərin xüsusi yer turması da sevindirici haldır.

Müəllif deyir ki, 2020-ci ildən bələdiyyələrə ayrılan dotasiya və subvensiyanın da həcmi artırılıb, büdcədə bələdiyyələrə ayrılan dotasiya və subvensiyanın həcmi 6,2 milyon manat olub.

Məqalə müəllifinə görə, bu məbləğin 5 milyon manatı dotasiya, 1,2 milyon manatı isə subvensiyadır, ötən il ayrılan məbləğin həcmi 5,5 milyon manat idi və əminliklə deyə bilərik ki, ölkədə keçirilən növbəti bələdiyyə seçkiləri Azərbaycanın seçki demokratiyasının daha da təkmilləşməsinə öz töhfəsini verəcək.

Seçki büdcəsi, yoxsa maliyyə israfı?

“Hürriyyət.org”da isə “Saxta seçkilər üçün 65,2 milyon manat israf olundu” sərlövhəli məqalə diqqəti çəkir.

Sayt ölkədə keçirilən bələdiyyə seçkiləri və sosial sahədə vəiyyətlə bağlı Azərbaycan Demokratiya və Rifah Hərəkatının sədri, tanınmış iqtisadçı alim Qubad İbadoğlunun düşüncələrinə yer verib.

Q.İbadoğlunun deməsinə görə, bu vəsait bələdiyyələrin illik büdcəsindən 2,5 dəfə, gələn il doğulan bütün uşaqlara veriləcək birdəfəlik yardımın ümumi məbləğindən 4,5 dəfə çoxdur.

“Yəni, həmin vəsaiti xərcləməyib, uşaq puluna yönəltsəydik, hər bir yeni doğulan uşağa 200 manat deyil, 900 manat ödəmək mümkün olardı”, - Q.İbadoğlu fikrini belə ifadə edir.  

“Bir qrup yerli jurnalistə ilin yekunları ilə əlaqədar müsahibə verən İlham Əliyevin həmin gün keçirilən bələdiyyə seçkisinin adını belə dilinə gətirməməsi Azərbaycanda yerli seçkilərin mənasızlığının ən bariz göstəricisidir”,- iqtisadçı əlavə edib.

İqtisadçı alimin sözlərinə görə, ötən il 36 milyon manat büdcə gəlirləri olan bələdiyyələrə bu il dövlət büdcəsində 5,7 manat dotasiya və subvensiya nəzərdə tutulur.

Amma Hərəkat rəhbəri yada salır ki, dekabrın 23-də seçkilərin keçirilməsi üçün 56,6 milyon manat Mərkəzi Seçki Komissiyasının, 8,6 milyon manat isə dairə seçki komissiyalarının və katibliyinin saxlanılmasına vəsait xərclənib. 

Müəllifə görə, bir sözlə, dövlət büdcəsindən seçkinin təşkilinin maliyyələşdirilməsi adı altında 65,2 milyon manat israf olundu.

“Halbuki, seçki şousu ilə bələdiyyələri tamam gözdən salmaqdansa, seçki pullarını onların arasında bölüşdürməyin daha çox faydası olardı” deyə Q.İbadoğlu bu maliyyə vəsaitlərinin xərclənməsinə mövqeyini ifadə edir.

Bir yolu kanalizasiya bağlayırsa...

“Bakipost.az” saytında isə “Bakıda “kanalizasiya aksiyası”-Sakinlər yolu bağladı” sərlövhəli məqalə oxumaq olar.

Müəllif deyir ki, dekabrın 25-də Suraxanı rayonu ərazisində aksiya keçirilib və Yeni Suraxanı, 14 iyul küçəsində yaşayanlar yolu bağlayıblar.

Yazı müəllifinin deməsinə görə, aksiyanın keçirilməsinə səbəb ərazidə kanalizasiya xəttinin olmaması, bununla bağlı aidiyyəti qurumlara edilən müraciətlərə məhəl qoyulmamasıdır.

Müəllif sakinlərə istinadən bildirir ki, yerli icra orqanları onların səsini eşitməsə, aeroport yolunu bağlayacaqlar.

Müəllifin deməsinə görə, məsələ ilə bağlı “Azərsu” Açıq Səhmdar Cəmiyyətinin mətbuat xidməti və ictimai əlaqələr şöbəsinin rəhbəri Anar Cəbrayıllı “BakuPost”a bildirib ki, həmin ərazi yeni kanalizasiya xətti çəkilən ərazidədir və hazırda orada işlər gedir:

“Bu gün bizim əməkdaşımız da sözügedən ərazidə olub və nəzərdə tutulan yeni kanalizasiya xətti layihəmiz var ki, həmin küçəni də əhatə edəcək. Bu ərazilər üçün 14.5 km. uzunluğunda nəzərdə tutulan yeni xəttin çəkilməsi planlaşdırılır.

İşlərə artıq başlanılıb və ərazidəki ətraf küçələrdə daxil olmaqla 14 iyul küçəsini də əhatə edəcək, Yeni ilin ilk ayı layihə artıq yekunlaşacaq”.

Müəllif isə vurğulayır ki, sakinlər olmayan kanalizasiya xəttinə görə hər ay 50 qəpik pul alındığını və bunun üçün çeklərinin olduğunu bildirirlər.

“Azərsu” ASC mətbuat xidmətinin rəhbəri A.Cəbrayıllı isə bildirib ki, fərdi və ya dövlət tərəfindən çəkilməyən kanalizasiya xəttinə görə heç bir vətəndaşdan pul alına bilməz:

“Sakinlərə verilən bildirişdə xidmətlərin qiyməti ayrı-ayrı qeyd olunur. Hər bir vətəndaş bildirişdə bunu görür. Əgər səhv varsa vətəndaş gəlib müraciət edir və çek həmin günü ləğv olunur” deyə A.Cəbraıllı bildirir.

ASC mətbuat xidmətinin rəhbəri deyir ki, belə yalnışlıqlara qurum tərəfindən rast gəlinib. Hansı ki kanalizasiya xətti olmayan yerdə ödəniş alınıb” deyə mətbuat xidmətinin rəhbəri söyləyir.