Media-icmal 27.04.20

Koronavirus pandemiyasına qarşı aparılan mübarizə, karantin rejiminin tətbiqinin iqtisadi ziyanları, yanlış idarəçiliyin nəticələri, vətəndaşa kredit güzəştləri və s. məsələlər medianın aparıcı mövzuları sırasındadır... 

“Azərbaycan” qəzetində “Azərbaycanda koronavirusla mübarizə müsbət tendensiya üzrə irəliləyir” sərlövhəli məqalədə müəllif ölkədə koronavirus pandemiyasına qarşı mübarizəni dəyərləndirir.

Müəllif deyir ki, Azərbaycanda infeksiyanın yayıldığı ilk çağdan bu virusa qarşı effektiv mübarizə tədbirləri, dövlət rəhbərliyi səviyyəsində qabaqlayıcı tədbirlər görülməyə başlandı.

Müəllif əlavə edir ki, profilaktik və təxirəsalınmaz qərarların həyata keçirilməsi üçün Nazirlər Kabineti yanında Operativ Qərargah yaradıldı.

Müəllif bunu da bildirir ki, qərargah xüsusi karantin reiminin müddətini aprelin 20-dən mayn 4-nə kimi uzadıb, aprelin 27-dən isə müəyyən yumşalmalar gözlənilir, bu isə o deməkdir ki, görülən işlər müsbət tendensiya üzrə inkişaf edir.

Müəllifə görə, tam qələbə üçün sevinmək tezdir, sayıqlığı əldən vermək olmaz, amma eyni zamanda da ölkədə bu virusa yoluxanların 60 faizindən çoxu sağalıb. 

Məqalədə vurğulanır ki, kütləvi toplanışların qarşısını almaq üçün aprelin 27-dən "ASAN xidmət" mərkəzləri vətəndaşlara 320-dən çox xidmət göstərəcək və bunun üçün qısa çağrı nömrələrindən istifadə etmək mümkündür.

Bundan əlavə, müəllif yada salır ki, məktəbəqədər təhsillə bağlı teledərslərə start verilib.

Karantin rejimini pozanlar üçün məsuliyyət olduğunu vurğulayan müəllif deyir ki, bu il aprelin 1-dən indiyə kimi xüsusi karantin rejiminin pozulmasına görə 38766 hərəkət iştirakçısı inzibati məsuliyyətə cəlb edilib.

Tibbi Ərazi Bölmələrini İdarəetmə Birliyi (TƏBİB) xaricdən qayıdan ölkə vətəndaşlarının karantinə alınmasını davam etdirəcək, bir müddət belə fəaliyyət göstərəcək.

“Marja.az”da dərc edilən “Yenidən ciddi karantinin tətbiqi külli zərər və ya müflisləşmə ilə nəticələnə bilər" sərlövhəli məqalədə müəllif iqtisadiyyat naziri Mikayıl Cabbarova istinadən ölkədə tətbiq edilən xüsusi karantin rejiminin iqtisadiyyata vurduğu ziyanı dəyərləndirir.    

Müəllifin sözlərinə görə, nazir deyib ki, hətta uzun müddət fəaliyyətdə olan biznes qurumları, qısamüddətli fəaliyyətsizlik nəticəsində ciddi geriləmələrlə üzləşə bilərlər. Odur ki, nazir davamlılığın təmin olunmasını əsas məqsəd sayır, biznes subyektlərinin yeni iqtisadi şəraitə uyğunlaşması vacib amil adlandırır.  

Məqalə müəllifi vurğulayır ki, nazir gigiyena və sosial məsafənin qorunmasını həlledici amil kimi dəyərləndirib, bu qaydalara əməl edilmədikdə isə, yenidən ciddi karantin şərtlərinin tətbiqinin qaçılmaz olacağı xəbərdarlığı edib.

Nazirə görə, deyilənlərə əməl edilməməsi karantin rejiminin yenidən gücləndirilməsi, sahibkarların yeni iqtisadi itkilərlə üzləşməsi, külli miqdarda maddi zərər və ya müflisləşmə ilə nəticələnə bilməsi demək olar.

“Azpolitika.info”da isə “Mənzillər geri alınmalıdır” sərlövhəli məqalədə müəllif jurnalistlər üçün tikilmiş binalardakı mənzil bölgüsündə baş vermiş haqsızlıqları dəyərləndirir.

Müəllif deyir ki, bu yaxınlara kimi media sahəsinə rəhbərlik etmiş blokun fəaliyyətinin araşdırılmasına dair çağırışlar çoxalıb, xüsusilə mənzil bölgüsündəki özbaşınalıq ön plana çıxarılır: “...jurnalistlər üçün tikilmiş binalardakı mənzilləri

bölüşdürərkən ağlagəlməz dərəcədə özbaşnalıq etdilər. Bu minvalla da jurnalistikaya əsla aidiyyatı olmayan çoxsaylı təsadüfi adamlar mənzil aldılar. Beləliklə, jurnalistikada sözü, izi, yeri olmayanlar kiminsə yaxını, qohumu olduğuna görə, mənzil alanların siyahısına düşüdülər, peşəkar jurnalistlər isə kənarda qaldılar.  

Müəllif hesab edir ki, son vaxtlar ictimaiyyət, bəzi deputatlar bu məsələyə münasibət bildirərək KİV-ə Dəstək Fondunun fəaliyyətinin araşdırılaraq günahkarların cəzalandırılmasını vacib sayırlar. 

“Mətbuat.az”da yer alan “Əgər vətəndaşın sentyabrın 30-dək kredit yubanması olarsa...” sərlövhəli məqalədə müəllif bəhs edilən mövzunu deputat Vüqar Bayramovla gündəmin diqqətinə çatdırır.

Deputat deyir ki, əgər vətəndaşın martın 1-dən sentyabrın 30-dək kredit yubanması olacaqsa, o, onun kredit tarixçəsinə yazılmayacaq və tarixçə pisləşməyəcək: “Bu, o deməkdir ki, Mərkəzi Bank banklara kreditini ödəməkdə çətinlik çəkənlərə cərimə faizi və dəbbə pulu yazmamağı tövsiyə edib. Paket maliyyə bazarlarında digər sektorları da əhatə edir. Etiraf etmək lazımdır, güzəşt paketi sistemlidir və pandemiyanın maliyyə bazarı iştirakçılarına təsirlərini minimumlaşdırmağa imkan verəcək”.

Qeyd edək ki, tədbirlərə əsasən, İpoteka və Kredit Zəmanət Fondunun vəsaitləri hesabına bu il martın 1-dək kimi verilmiş ipoteka kreditləri Fondun razılığı əsasında bu il sentyabr 30-dək restrukturizasiya olunacaq, yəni güzəşt tətbiq olunacaq. Fondun vəsaitləri hesabına 01 mart 2020-ci il tarixinə kimi verilmiş ipoteka kreditlərinin restrukturizasiya edilməsi zamanı banklar tərəfindən kreditin keyfiyyətinin pisləşdirilməməsi tapşırılıb.