Media-icmal 29.07.17

Sosial layihələrin həcminin artması, paytaxtın kommunal problemləri, ölkənin beynəlxalq imici bugünkü medianın (29 sentyabr, 2017-ci il) aparıcı mövzularındandır.

2018-ci il: Dinamik inkişaf dövrü

"Azərbaycan" qəzeti "2018-ci il daha dinamik inkişaf dövrü olacaq" sərlövhəli (http://www.azerbaijan-news.az/index.php?mod=3&id=130743) məqalədə qarşıdakı ildə dövlət büdcəsində sosial və infrastruktur layihələrə böyük həcmdə vəsait ayrılmasını dəyərləndirir.

Müəllif deyir ki, son 14 ildə ölkədəki iqtisadi siyasət insanların sosial ehtiyaclarının dolğun çəkildə ödənilməsinə yönəlib və insan amilinin inkişafına təkan verib.

Müəllif vurğulayır ki, hökumət azad iqtisadi münasibətlərə, rəqabətə, özəl mülkiyyətçiliyə və sahibkarlığın inkişafına zəruri kömək göstərməklə yanaşı, cəmiyyətdə himayə, dəstəyə ehtiyacı olanları da unutmur.

Müəllif deyir ki, sosial baxımdan həssas olan insanlar etibarlı sosial müdafiə sistemilə əhatə ediliblər: "2017-ci ilin dövlət dücəsinin 40%-i sosial sosialyönlü xərclərə ayrılıb, işsizlik probleminin həlli, yeni sosial infrastruktur obyektlərinin - təhsil, mədəniyyət, səhiyyə, rabitə müəssisələrinin istifadəyə verilməsi və s. mədəni-intellektual səviyyənin yüksəlişinə, mənəvi-əxlaqi dəyərlərin əsas meyara çevrilməsinə xidmət göstərir".

Müəllif bildirir ki, 2004-cü ildən bu yana Azərbaycan iqtisadiyyatı 3 dəfədən çox artıb, 1 milyon 600 mindən artıq iş yeri açılıb, işsizlik 5 faiz səviyyəsindədir və 2004-2017-ci illərdə 11 min kilometr yeni yollar - həm magistral, həm də kənd yolları salınıb.

Məqalədə deyilir ki, Mənzil İnşaatı Dövlət Agentliyinin Yasamal rayonunda sosial mənzillər tikməsinin əsas məqsədi də aztəminatlı ailələri əlverişli şərtlərlə mənzillərlə təmin etməkdir.

Müəllif deyir ki, 2016-cı ildə aparılan islahatlar nəticəsində ümumilikdə 3,6 milyon nəfərə və ya əhalinin 38%-nə sosial ödənişlərin artırılması təmin olunub.

Yazı müəllifi gələn ilin iqtisadi göstəricilərinin daha da yaxşı olacağını, bu ilə nisbətən daha böyük həcmdə Dövlət İnvestisiya Proqramının icra ediləcəyi, növbəti ilin büdcəsi və dövlət investisiya xərclərinin daha böyük olacağını bildirir.

Müəllif vurğulayır ki, həyata keçirilən çoxşaxəli siyasətin ən ali məqsədi də hər bir vətəndaş üçün layiqli və firavan həyat tərzinin təmin olunması, ölkədə azad və demokratik cəmiyyətin qurulmasıdır.

15 santimetrlik yağışın 15 illik bitməyən problemi

"Novoye Vremya" qəzetində isə diqqəti "Necə "SOS!" harayı salmayasan" sərlövhəli (http://www.novoye-vremya.com/w106814/.../#.Wc0z0Wi0PIU) məqalə diqqəti cəlb edir.

Müəllif qeyri-sabit havaların başlanması ilə Sumqayıt şəhərində, Masazir və Saray qəsəbələrində elektrik probleminin özünü göstərməsini müzakirə edir.

Müəllif xatırladır ki, adları çəkilən ərazilərdə elektrik problemi hələ yay aylarında da olub və o zaman "Azərişıq" bunu qışa hazırlıqla bağlı elektrik xətlərinin dəyişdirilməsilə izah edib.

Məqalə müəllifi deyir ki, hələr intensiv yağışlar başlamamış, soyuqlar düşməmiş belə problemin olması ciddi narahatlıq yaradır: "Artıq üzü qışa gedilir, intensiv yağışlar olacaq, qar yağması və güclü küləklərin olması gözardı edilməməlidir, şəhər kommunal təsərrüfatının isə qışa nə dərəcədə hazır olması hələ məlum deyil. Amma hər qış fəsli öncəci bu qurumlar qışa tam hazır olmaları barədə bəyanatlar verirlər".

Müəllif xatırladır ki, elə ki havalar pisləşir, o zaman hazırlığın olmaması aşkar olur və bu günlərdə yağan yağışlarda da bu, özünü göstərdi.

Müəllif deyir ki, bu sahənin yüksək səviyyəli məmurları medianın bu problemlər barədə yazmasından narazılıq ifadə edirlər və deyirlər ki, Avropanın, Qərbin şəhərlərində də subasmalar, qasırğalar olur, amma onların mediası"SOS" siqnalı vermir.

Bununla bağlı müəllif də deyir ki, adları çəkilən Qərb ölkələri təbii fəlakətlərin qarşısını ala bilmir, amma onların fəsadlarını qısa müddətdə aradan qaldırırlar, Azərbaycanda isə 10-15 sm.-lik yağış problemə dönür və media bu barədə neçə illərdir ki, yazmağa məcburdur.

"Bizdə bir az yağan yağış və ya düşən qar çoxsaylı problemlərə səbəb olur və bu halda "SOS" siqnalı verməmək olmur, əgər 10-15 santimetrlik yağış şəhər sakinlərinə bu qədər narahatlıq yaradırsa, deməli, şəhər kommunal xidmətləri bu probleməri yaradan səbəbləri aradan daha tez qaldırmağı bacarmalıdırlar".

Müəllif paytaxt kommunal xidməti başçılarına eyni zamanda qış fəslinin uzaqda olmadığını da xatırladır, bu sahənin yüksək vəzifəli məmurlarına və bütünlükdə xidmət personalına heç olmasa bu qış boş sözçülükdən real işə keçməyin zəruri olduğunu vurğulayır.

İstehza hədəfi - Şərqin demokratiya "beşiyi"

"Azadlıq.info" saytında"Azərbaycanı istehza hədəfi olan ölkəyə çeviriblər"

(https://www.azadliq.info/203274.html) sərlövhəli məqalə oxumaq olar.

Müəllif son vaxtlar Azərbaycanın adının beynəlxalq miqyasda mənfi çalarda hallanmasının səbəblərinə aydınlıq gətrməyə çalışır və deyir ki, son zamanlar çoxları "ölkənin artan nüfuzu"na kimlərinsə paxıllıq etməsi kimi bir mövqeyi ortalığa atıb, burada da əsas tənqid hədəfi Qərb ölkələridir. "Deməli, bu artan nüfuz kimləri isə paxıllıqdan partladırmış. Kimləri? Əlbəttə, Qərbi, hədəf dəyişməyib. Nişangahda yenə də sivil dünyadır".

Müəllif bildirir ki, Azərbaycan rejiminin bulaşdığı korrupsiya, həyata keçirdiyi talançılıq, bespredel, insan haqlarının Afrika cəngəlliklərindən betər vəziyyətinə görə ABŞ və Avropa Birliyi Azərbaycan məmurlarına sanksiyaların tətbiqinə hazırlaşdığı üçün Qərb tənqid edilir.

Müəllif "nüfuz" sözünün leksik mənasına toxunaraq hörmət, etibar və "içəriyə işləmə, nəyəsə təsir etmək" kimi iki mənası oldğunu deyir, əlavə edir ki, bu mənaların heç biri bu rejimin fəaliyyətilə üst-üstə düşmür: "Əminəm ki, bu "zurnaçılar" ölkənin nüfuzu deyəndə bu sözün ikinci mənasını nəzərdə tutmayıblar, çünki ölkənin nəyə isə təsir etmək qabiliyyətinin göstəricisi onun 20% itirilmiş torpaqlarıdır. Hələ onu demirik ki, rüşvət, "otkat" müqabilində Rusiyadan aldıqları sınıq-salxaq silah, texnika qalan 80%-i qorumaq qabiliyyətini zərbə altında qoyur.

Müəllifə görə, Azərbaycan rejimi bu sözün hörmət, etibar çalarına da uyğun gəlmir və müasir dünyada nüfuz və hörmətin mərkəzlərini göstərir: "Dünyada hörmətin, nüfuzun mərkəzi sivil dünya, ABŞ, Avropa Birliyi ölkələridir ki, onlar da sanksiya tətbiq etməyə hazırlaşırlar. Onların yanında hansı nüfuzdan danışmaq olar? Heç Allahın Keniyası sizə hörmət etmir, keçirdiyiniz seçkini məsxərəyə qoyur".

Müəllif hesab edir ki, Azərbaycandakı rejimə heç kim etibar etmir və səbəb də budur ki, xalqın 200 milyard sərvətini talan ediblər, üstəlik, bunun da 2,9 milyardı "əllərində tutulub və bununla da rejimə başa salınıb ki, qalan sərvətlərin də harada olduğunu da bilirlər".

Müəllif deyir ki, məsələ təkcə sərvətlərin talanmasında deyil, ağrıdıcı olan daha ağır "dərdlər" var: "Bunlar qürur yerimiz olan vətənimizi dünyanın ən hörmətsiz, etibarsız, nüfuzsuz, istehza hədəfi olan, məsxərəyə qoyulan ölkəsinə çeviriblər, qəsdən və düşmənçiliklə".

Müəllif deyir ki, bu talana "yox" deməyin, bu hörmətsizliyi aradan qaldırmağın yolu bir yerə toplanmaqdan, dinc aksiyalar və mitinqlərdən keçir.