Media-icmalı 10.02.18

Növbədənkənar prezident seçkilərində prezident İlham Əliyevin namizədliyinin zəruri şərtləri, prezident seçkilərinin irəli çəkilməsinə baxış, manatın perspektivi bugünki (10 fevral, 2018-ci il) medianın aparıcı mövzularındandır...

İ.Əliyevin prezidentliyə namizədliyinin zəruri şərtləri

"Azərbaycan" qəzeti "Xalqın sınadığı, inandığı, güvəndiyi ən layiqli namizəd" səlrövhəli məqalədə bu il aprelin 11-nə təyin edilmiş növbədənkənar prezident seçkilərində İlham Əliyevin namziədlyinin zərurliyini əsaslandırır.

Müəllif bu əsaslandırmanı şəxsi düşüncəsindən irəi gələn baxışlarla yox, elə dövlət başçısı İ.Əliyevin çıxışlarından istinadlar gətirməklə ortaya qoyur.

İ.Əliyev ölkədə yürüdülən rəsmi siyasətin mərkəzində Azərbaycan vətəndaşı, onun problemləri, onun qayğıları, onun rifahının dayandığını deyir. Xalq-iqtidar birliyini Azərbaycanda sabitliyi şərtləndirən əsas amil adlandırır: "Bu gün Azərbaycan dünya miqyasında ən sabit ölkələrdən biridir və o ölkədir ki, xalq-iqtidar birliyi onun uğurlu inkişafını müəyyən edir".

Dövlət başçısı demokratik inkişafla bağlı gələcək illərdə də yeni addımlar atılacağını, siyasi islahatların davam etdiriləcəyini deyir, son illərdə bu istiqamətdə gözəl nəticələr əldə edildiyini söyləyir.

Ölkə rəhbəri deyir ki, ölkədə bütün xalqların, dinlərin nümayəndələri bir ailə kimi yaşayacaq, bu, ölkənin böyük sərvəti, uğurlu inkişaf üçün əsas şərtlərdən biridir, vətəndaş həmrəyliyi, vətəndaş sülhü üçün əsas şərtdir.

Qarabağ probleminə toxunan dövlət başçısı bu münaqişənin Azərbaycanın ərazi bütövlüyü çərçivəsində BMT Təhlükəsizlik Şurasının qətnamələri əsasında həllini tapmalıdır və başqa yolu yoxdur.

Dövlət başçısının təşəbbüsü ilə həyata keçirilən Bakı-Tbilisi-Ceyhan, Bakı-Tbilisi-Ərzurum, "Cənub qaz dəhlizi", Bakı-Tbilisi-Qars layihələri, eləcə də Şimal-Cənub Nəqliyyat Dəhlizi layihəsi Ermənistandan yan keçir: "Biz bunu gizlətmirik. Baxmayaraq, bəziləri çalışırlar bizi ittiham etsinlər ki, biz onları təcriddə saxlayırıq. Bəli, saxlayırıq və saxlayacağıq. O vaxta qədər ki, torpaqlarımız işğaldan azad olunsun".

İ.Əliyev bildirir ki, 2016-cı ilin aprel döyüşləri əyani şəkildə düşmənə və bütün dünyaya göstərdi ki, Azərbaycan Ordusu nəyə qadirdir və döyüş meydanında bizim şanlı tarixi qələbəmiz, əlbəttə ki, məsələnin ədalətli həlli üçün də yeni imkanlar yaradır və yaradacaqdır.

Ölkə başçısı vurğulayır ki, ölkə iqtisadiyyatının dayanıqlı inkişafını ancaq qeyri-neft sektoru, sahibkarlıq, idarəetmədə aparılan və aparılacaq islahatlar müəyyən edəcək.

Dövlət rəhbərinə görə, iqtisadiyyatın şaxələndirilməsi, mütərəqqi beynəlxalq təcrübənin Azərbaycana gətirilməsi, maliyyə, fiskal siyasətində ən qabaqcıl texnologiyalardan istifadə etməyimiz inkişafımız üçün əsas amillər olacaqdır.

İcra orqanı mədəni tədbirlər üçündür?

"Azadlıqinfo.az" saytında isə "Hakimiyyət karvanbasan qiyafəsində" sərlövəhli məqalə diqqəti cəlb edir.

Müəllif hakimiyyətin bu il oktyabrın 17-də keçirilməsi gözlənilən prezident seçkilərini 11 aprelə qədər irəli çəkməsinin ictimaiyyət arasında böyük bir narazılıq dalğası yaratdığını deyir və bu narazılığı haqlı adlandırır.

Yazı müəllifi deyir ki, hakimiyyət bu irəli çəkilən seçkilərin mahiyyətini ya izah edə bilmir, ya da izah etmək istəmir, odur ki, gündə bir bəhanə uydurur, bu anormal təklifi müdafiə üçün dəridən-qabıqdan çıxır: "İlk olaraq bəhanələri o oldu ki, bəs, bu il H.Əliyevin 95 illiyi, Cümhuriyyətin 100 illiyi, Azərbaycan xalqının soyqırıma məruz qalmasının 100 illiyi ilə əlaqədar Seçkinin vaxtı qabağa çəkilmişdir. Məgər İcraedici orqan Azərbaycan Respublikasında mədəni tədbirlər keçirmək üçün mövcuddur?"

Müəllif deyir ki, xalq hakimiyyətin tədbirlər barəsindəki hekayəsinə inanmadıqda hakimiyyət başqa bir hekayə mətni uydurdu ki, iqtidar iri miqyaslı qələbə hücumuna hazırlaşdığı üçün seçkini vaxtından tez keçirmək məcburiyyətindədir.

Məqalədə isə deyilir ki, hətta bu halda da Konstitusiyada müddəalar nəzərdə tutulur, ona uyğun hərəkət etmək lazımdır və müharibədə qələbə qazanmış İlham Əliyevin seçkiyə qatılması qələbəsini şərtləndirən əsas olardı. Bundan irəl gələrək, müəllif deyir: "Görürsünüzmü, yalan danışırsınız, məqsəd Azərbaycan xalqını aldadıb istəyinizə nail olmaqdır. Sizin kimi bir primitiv idarəçi ərazi bütövlüyümüzü nə müharibə, nə də sülh yolu ilə bərpa edə bilməz. İndi də bir başqa gop etməkdəsiniz. Guya 11 apreldə indiki iqtidarın qələbəsindən sonra struktur islahatlarına, eləcə də siyasi yeniliklərə start veriləcək".

Müəllif isə haqqında danışılan islahatları həyata keçirmək üçün iqtidarda komandanın olmadığını bildirir, mövcud "qohum-əqrəba" komandası ilə isə bunu mümkünsüz sayır.

Müəllif əlavə edir ki, hakimiyyət ağ yalan danışır, qeyri-müəyyən gələcək vəd edir və belə bir faktı vurğulayır: "Bir faktı da ölkə ictimaiyyətinə açıqlayım ki, respublikada sosial-iqtisadi böhranın faciəvi duruma gəlməsi, bu faciəvi durumun daha da dərinləşməsi neftin ucuzlaşmasında yox, hakimiyyətin ucuz düşüncəyə malik olmasındadır".

Müəllifə görə, seçkinin irəli çəkilməsi demokratik seçki niyyətinin ortaya qoyulması, hakimiyyətin növbəti dəfə qəsb edilməsi üçündür və buna görə də bəzi vətəndaşlar prezidentliyə namizədliklərini irəli sürməklə Azərbaycan xalqına qarşı bu siyasi qəsbdə, bu siyasi basqında iştirak etməməlidir.

İldə 4 milyard manatı "üzən məzənnə"də saxlamaq üçün...

"Exo" qəzetində "Manatın üzə bilməyən "üzən məzənnəsi" sərlövhəli məqalədə müəllif manatın perspektiv taleyini ekpsertlərlə müzakirə edir.

Müəllif deyir ki, bir müddət öncə manat "üzən məzənnə"yə keçdikdə bir çox ekspertlər az qala üç dəfə dəyərdən düşmüş milli valyutanın əsl dəyərini qazanacağını deyirdilər.

Amma "üzən məzənnə" sisteminə keçid manatn məzənnəsilə bağlı hər hansı dəyişkliyə səbəb olmadığı üçün müəllif bu məzənnəni inzibati tənzimlənən məzənnə kimi dəyərləndirir.

Ekspert Seyfəl Əliyev deyir ki, bu gün Azərbaycanın manatı ilə bağlı gördüklərimizi manatın dəyəri adlandıra bilmərik: "Məsələn, "azad üzən məzənnə" kursu digər valyutalara münasibətdə milli valyutanın tənzimlənməsi prosesindən dövlətin tam imtina etməsi deməkdir. Başqa sözlə, manatın məzənnə üzrə hərəkəti müstəsna olaraq bazarın tələb və təklif qanunları əsasında müəyyən edilir, amma bizdə belə bir hal yoxdur".

S.Əliyev deyir ki, dünyada bir çox ölkələr öz milli valyutalarına münasibətdə tənzimlənən üzən məzənnə rejimi və ya Azərbaycanda tətbiq olunan rejimi tətbiq edirlər.

S.Əliyevin sözlərinə görə, bu rejimdə qiymət müəyyən çərçivə arasında dəyişir, "dəhliz"in yuxarı və ya aşağı həddinə çatdıqda dəyişmiş kursun sabitliyini təmin etmək üçün işə ölkənin monetar hakimiyyəti qarşışır: "Müdaxilə prosesi özü valyuta cəlb olunması ilə başa çatır, milli valyuta ilə açıq bazarda ehtiyat pul vahidləri arasında konvertasiya əməliyyatı keçirilir" .

Ekspert Natiq Cəfərli isə deyir ki, manatı "üzən rejim"də saxlamaq üçün hər ay Dövlət Neft Fondu hərraclarda 300-350 milyon manat xərcləməli olur: "Bu isə il ərzində bu məqsdlərə 4 miyard manat xərclənməsi deməkdir. Bu il bundan əlavə, Fond öhdəliyi olaraq Mərkəzi Banka 5,5 milyard dollar və ya 9 milyard manat transfert etməlidir".

N.Cəfərli deyir ki, ölkədə valyuta bazarı olmadığı kimi, qiymətli kağızlar bazarı da yoxdur, bununla yanaşı, valyuta bazarının oyunçuları da yoxdur, valyuta hərracında iştirak edən 20-25 bankı tamhüquqlu adlandıra bilmək isə olduqca çətindir: "Hərrac da cəmi bir saat çəkir, deməli hər şey öncədən müəyyən edilib, bu isə o deməkdir ki, bizdə məzənnə üzən deyil, inzibatidir".