MSDM birləşməyə və Konstitusiyaya dəyişikliklər haqqında referenduma müqavimət göstərməyə çağırır

Azərbaycan demokratik düşərgəsinin toparlanması və cəmiyyətlə bütünləşərək Azərbaycan Konstitusiyasına dəyişikliklər haqqında referendumun keçirilməsinə dinc qanuni müqavimət formalaşdırması həddindən artıq zəruridir. Milli Strateji Düşüncə Mərkəzi (MSDM) “AR Konstitusiyasına dəyişikliklər haqqında” dövlət başçısı tərəfindən Konstitusiya Məhkəməsinə təqdim edilmiş Referendum Aktı layihəsini müzakirə etdikdən sonra belə nəticəyə gəlib.

MSDM hesab edir ki, planlaşdırılan referendum avtoritarizmin güclənməsinə səbəb olacaq, hakimiyyət bölgüsü prinsipini, insan hüquqlarını, siyasi və iqtisadi azadlıqları məhdudlaşdıracaq, habelə onsuz da formal olan respublika dəyərlərini məhv edəcək.

Layihənin respublika dəyərlərinə, konstitusiyanın əsaslarına, ölkənin beynəlxalq öhdəliklərinə zidd olması ilə yanaşı, hüquqi prosedurlar baxımından da qüsurludur və qeyri-məqbuldur. Təkcə onu qeyd etmək kifayətdir ki, Müsavat Partiyasının Konstitusiya Məhkəməsinə 21 iyul tarixli müraciətində göstərildiyi kimi, dövlət başçısının təqdim etdiyi layihə “Azərbaycan Respublikasının Konstitusiyasında dəyişikliklər edilməsi haqqında” Azərbaycan Respublikasının Referendum Aktı adlandırılsa da, əslində layihədə yalnız dəyişikliklər deyil, bir sıra çox ciddi əlavələr də var.

əqdim edilən əlavə və dəyişikliklərin əksəriyyəti yalnız hakim ailənin maraqlarına hesablanıb və həm bütövlükdə bütün Azərbaycan xalqının, həm də hakimiyyətdə təmsil olunanlar da daxil, hər bir vətəndaşın maraqlarına ziddir.

Nəzərdə tutulan konstitusiya dəyişikliklərinin Azərbaycanın demokratik inkişafına və mövcud problemlərin həllinə yaradacağı təhlükələrin qarşısının alınması baxımından MSDM demokratik düşərgənin toparlanmasını və cəmiyyətlə bütünləşərək dinc qanuni müqavimət formalaşdırmasını həddindən artıq zəruri hesab edir.

Azərbaycan prezidenti iyulun 18-də “AR Konstitusiyasına dəyişikliklər edilməsi haqqında” referendum aktı layihəsinin rəy verilməsi üçün Konstitusiya Məhkəməsinə göndərilməsi haqqında sərəncam imzalayıb.

Xüsusə, prezident tərəfindən vəzifəyə təyin və vəzifədən azad edilən birinci vitse-prezident və vitse-prezidentlər vəzifələrinin tətbiq edilməsi, prezidentin səlahiyyət müddətinin 5 ildən 7 ilədək artırılması, prezidentə parlamenti buraxmaq hüququnun verilməsi, prezident və deputat seçilmək üçün yaş məhdudiyyətini şəxsiyyətin vətəndaş hüquqları əldə etdiyi 18 yaşa endirmək və s. nəzərdə tutulur.

Konstitusiya Məhkəməsi prezidentin müraciətinə iyulun 25-də baxacaq.

Parlamentin aparat rəhbəri Səfa Mirzəyev dəyişikliklərin əsas məqsədinin insan ləyaqətinin müdafiəsi olduğunu bildirib.

MSDM-ə müxalif Müsavat Partiyasının keçmiş rəhbəri İsa Qəmbər rəhbərlik edir. -0-