NİDA fəalları aclığı davam etdirirlər

NİDA Vətəndaş Hərəkatının həbsdə olan 8 nəfər üzvü artıq 12 gündür ki, aclığı davam etdirirlər.

NIDA Vətəndaş Hərəkatının  İdarə Heyətinin  üzvü Aygün Pəncəliyevanın Turan-a verdiyi məlumata görə, aprelin 27-də gənc fəal  Üzeyr Məmmədli ilə danışıb. Onun sözlərinə görə, digər aclıq edənlərlə də onların valideynləri danışıblar. Gənclər xeyli zəifləsələr də aclığı davam etdirirlər.

Rəşadət Axundovun xanımı Türkan Hüseynovanın məlumatına görə, fəallar mütəmadi olaraq həkim müayinəsindən keçmir, yalnız arada həkimlər onların səhhəti ilə maraqlanır. Beynəlxalq Qırmızı Xaç Komitəsi də gənclərə baş çəkib.

NİDA üzvü Rəşad Həsənov aprelin 25-də Bakı Ağır Cinayətlər Məhkəməsində vəziyyətləri barədə məlumat verib: “Artıq 9 gündür aclıq aksiyası davam edir. Hələlik səhhətimizdə kiçik nüansları çıxsaq ciddi problemlər yaşanmayıb. Amma zaman keçdikcə fəsadlar gözlənilir. Bu aksiya başlayandan başda ailələrimiz olmaqla yaxın ətrafımız, mübarizə yoldaşlarımız, ictimai-siyasi xadimlər və digər  şəxslər bizə çoxlu mesajlar ünvanlayır. Mesajların mətn və üslubu fərqli olsa da hamısının bircə məqsədi var: aclığı dayandıraq. Aksiyanın heç kimə faydası olmamasını iddia edənlər yanılırlar. Onların hazırda görə bilmədikləri faydaları, biz başlamadan əvvəl görürdük və görməkdəyik”.

Eyni zamanda NİDAçı gənclərə dəstək davam edir.

Almaniyanın Nürnberg şəhərində  yaşayan mühacirlər aksiya keçiriblər. Onlar  “Nida” Vətəndaş Hərəkatının həbsdə olan gənclərinə dəstək nümayiş etdiriblər. Azərbaycanın Berlindəki səfirliyinə və Nürnberg şəhərinin meriyasına Azərbaycan, alman dillərində qətnamə göndərilib.

Eyni zamanda Türkiyədə, Nyu-Yorkda, Floridada da  dəstək aksiyaları keçirilib.

Həbsdəki 8 NİDAçı ədalətli məhkəmə qərarı və azad olunmaları tələbi ilə aprelin 17-dən aclıq aksiyasına başlayıblar. Onların valideynləri övladlarının azad edilməsi üçün aprelin 20-də aclıq aksiyasına başlamışdı. Lakin övladlarının "siz dayandırmasanız biz quru aclığa başlayırıq" mesajından sonra valideynlər aprelin 24-də aclığı müvəqqəti dayandırıblar.

Dövlət ittihamçısı NİDAçılara 6 il yarımdan 8 il yarımadək həbs cəzası istəyib.

Amnesty İnternational  beynəlxalq hüquq təşkilatı həbsdə olanları  “vicdan məhbusları” adlandırıb və onların azad olunması üçün kampaniyaya başlayıb.-16D-