Ölkə mediası nədən yazır? (Media-icmal 11.01.21)

COVID-19 pandemiyasına qarı mübarizə,  bu gün Moskvada aparılması gözlənilən Qarabağ müzakirələrindən gözləntilər, Qarabağda Rusiya sülhməramlılarının fəaliyyətinə baxış və s. məsələlər medianın aparıcı mövzuları sırasındadır.

“Azərbaycan” qəzeti  “Ölkəmiz koronavirus sınağından inamla çıxır” sərlövhəli məqalədə koronavirus pandemiyasına qarşı mübarizəni dəyərləndirir.

Müəllif deyir ki, virusla mübarizədə bütün dünya  peyvəndləməni gözləyir və mütxəssislər ümid edirlər ki, qış aylarından sonra dünya sağlam həyata qayıtmaq imkanı əldə edəcək.

Müəllifə görə, peyvəndlənmə ilə bağlı Azərbaycanda da aparılan işlər yekunlaşmaq üzrədir, bu isə yaxın vaxtlarda ölkədə peyvəndləmənin tətbiqinə başlanılacağı deməkdir.

Eyni zamanda müəllif yada salır ki, artıq Tibbi Ərazi Bölmələrini İdarəetmə Birliyi (TƏBİB) tərəfindən ölkədə aparılacaq vaksinasiyanın təşkili və əlavə təsirlərinin idarə edilməsi ilə əlaqədar təlimlərə başlanılıb.

Son zamanlar ölkə üzrə koronavirusa yoluxmaların azaldığını deyən müəllif  bunu karantinin sərtləşdirilməsinin nəticəsi kimi dəyərləndirir.

Müəllif əlavə edir ki, pandemiyaya qarşı mübarziədə 10-dan çox yeni müasir xəstəxana tikilib, yoluxan xəstələr üçün 10 mindən çox çarpayı yeri yaradılıb, sərt karantin məhdudiyyətləri tətbiq edilib.

Müəllifin deməsinə görə, pandemiyanın iqtisadiyyata, sahibkarlıq subyektlərinə vurduğu ziyanın təsirlərini azaltmaq üçün 2,5 milyard manata çatan sosial-iqtisadi dəstək paketi qəbul edilib.

Müəllif rəsmi mənbələrə istinadən deyir ki, bır sıra ölkələr kimi Azərbaycan da peyvəndi gözləyir, yanvar ayı ərzində Azərbaycana gətirilməsi gözlənilir, insanlar kütləvi qaydada bu peyvənddən istifadə edəcəklər.

Müəllifə görə, bununla birlikdə vaksinasiya prosesindən bir müddət sonra da tibbi maska taxılmalı, əl gigiyenası və sosial məsafə ilə əlaqədar qaydaya əməl olunmalıdır.

“Yenisabah.az” saytında isə “Laçın dəhlizinə Azərbaycan da nəzarət edəcək - 3 mərhələli plan” sərlövhəli məqalədə Azərbaycanın Qarabağdakı hərbi-siyasi strategiyası dəyərləndirılir.

“Qafqaz” Strateji Araşdırmalar Mərkəzinin sədr müavini Nazim Cəfərsoy Azərbaycanın Qarabağdakı hərbi-siyasi strategiyası barədə fikirlərini açıqlayıb. 

Onun fikrincə, Azərbaycan 3 mərhələli planı həyata keçirir.

Politoloqa görə, birinci mərhələ təxminən 1000 km.-lik Azərbaycan- Ermənistan sərhəddini tam nəzarətə almaqdır, bu mərhələ hazırda sürətlə davam etdirilir.

Onun fikrincə, ikinci mərhələ rus sülhməramlısının olduğu Laçın dəhlizində nəzarəti təmin etməkdir

N.Cəfərsoy vurğulayır ki, bu çərçivədə Ermənistan sərhədinin Laçın dəhlizi hissəsində rus sülhməramlılari ilə yanaşı Azərbaycan sərhəd, gömrük və təhlükəsizlik xidmətinin fəaliyyətini təmin etmək  lazımdır. Sədr müavini deyir ki, hazırda bunun hərbi-siyasi bazası hazırlanır.

Politoloq deyir ki, Laçın dəhlizi rus sülhməramlıları tərəfindən etibarlı qorunmur, odur ki, dəhlizdə Azərbaycan qurumlarının olması zərurəti, sadəcə, hüquqi deyil, həm də hərbi-siyasi zərurət kimi önə çıxarılacaq: “Bu mərhələnin önümüzdəki 2-3 ay ərzində aktuallaşacağını təxmin etmək olar", - N.Cəfərsoy bildirir.

Sədr müavini əlavə edir ki, üçüncü mərhələ Qarabağdakı erməni yaraqlılarını tərkisilah etməkdir və təxminən fevral ayının sonundan Qarabağda antiterror əməliyyatları, həm də konkret şəxslərə qarşı əməliyyatlar başlaya bilər.  

“Azpolitika.info” saytı isə “Rusiya biz düşündüyümüz qədər güclü deyil- 11 yanvardan sonra bir çox məsələlərə aydınlıq gələcək” sərlövhəli məqalədə Azərbaycan və Rusiya sülhməramlıları arasındakı münasibətlər şərh edilir. 

Siyssi icmalçı Qulu Məhərrəmli hesab edir ki, 44 gün davam etmiş İkinci Qarabağ Müharibəsi Qarabağ münaqişəsinin tam həllinə səbəb olmayıb.

Politoloq vurğulayır ki, prosesə müdaxilə edən Rusiya Ermənistanla Azərbaycan arasnda üçtərəfli atəşkəs razılaşmasına, bunun ardınca ordusunu sülhməramlı adı ilə bölgəyə yerləşdirməyə nail oldu.

Q.Məhərrəmli deyir ki, erməni yaraqlılar Azərbaycan ərazisində qalmaqda davam edir, sülhmərmalılar bölgəni tərk etmiş erməni əhalisini yenidən Qarabağa qaytarır.

Politoloqa görə, yanvarın 11-də Moskvada gözlənilən Azərbaycan, Rusiya və Ermənistan üçtərəfli görüşündə bəzi qərarlar qəbil ediləcəyinə ümid var.

Q.Məhərrəmliyə görə, bölgədəki hazır vəziyyəti qeyri-müəyyənlik, müəyyən mənada isə hərbi-siyasi böhran kimi dəyərləndirmək olar, çünki, üçtərəfli bəyanatla bəzi addımlar icra olunsa da bir hissəsi hələ də icra edilmir. 

Onun fikrincə, erməni hərbi qüvvələrin Azərbaycandan çıxarılmasına əməl olunmur və bütün bunların hamısı “kiçik və böyük təxribatlar” adlandırıla bilər.

Siyasi icmalçı hesab edir ki, bunda məqsəd Azərbaycanla sülhməramlılar arasında toqquşma və ya kəskin situasiya yaratmaqdır: “Əsas təhlükəlii məqam Rusiya qoşunlarının Dağlıq Qarabağa yerləşməsi, mandatlarının qeyri-müəyyənliyi, funksiyaları barədə aydın təsəvvürün olmamasıdır”, - siyasi icmalçı vurğulayır. 

Q.Məhərrəmli hesab edir ki, sülhməramlılar faktiki Qarabağda yerli icra hakimiyyətini əvəz edir: “Məncə, yanvarın 11-də Moskvada üçtərəfli görüşdən sonra aydın olacaq ki, nə baş verir və hadisələr hansı istiqamətdə gedəcək”, - siyasi icmalçı bildirir.

“Bizimyol.info”  saytı isə “Əliyev-Paşinyan görüşündən cəmiyyət nə gözləyir... - Azərbaycanda və Ermənistanda” sərlövhəli məqalədə yanvarın 11-də Moskvada gözlənilən Azərbaycan-Ermənistan görüşü müzakirə müstəvisinə çəkilir.

Məüllif deyir ki, yanvarın 11-də Moskvada yüksək səviyyədə Azərbaycan-Ermənistan görüşü nəzərdə tutulur, görüşlə bağlı müxtəlif versiyalar səsləndirilir və bu mövzu Ermənistanda daha qızğın müzakirə olunur, nəinki Azərbaycanda.

Müəlllif vurğulayır ki, görüşlə bağlı gözləntilər Azərbaycanda və Ermənistanda fərqlidir.

Azərbaycan cəmiyyətində başlıca narahatlıq Rusiya sülhməramlıları ilə bağlıdır.

Bölgəyə gələndən sonra sülhməramlıların Azərbaycan tərəfi ilə razılaşdırmadan həyata keçirdiyi müxtəlif tədbirlər, "xəritə hoqqabazlıqları", Rusiya əsgərlərinin aşkar tərəf tutan davranışları cəmiyyət tərəfindən narazılıqla qarşılanır.

Azərbaycan insanı əmin olmaq istəyir ki, ölkənin beynəlxalq hüquqla tanınan sərhədləri üzərində nəzarət özünə keçəcək,

Müəllifə görə, Azərbaycan cəmiyyəti İlham Əliyevin ölkənin maraqlarına zidd olan, ərazi bütövlüyünü təhdid edən hər hansı sənədə imza atmayacağından əmindir, ona görə də bu mövzu media və sosial şəbəkələrdə geniş müzakirə olunmur.

Müəllifə görə, Ermənistanda görüşlə bağlı ehtimallar konkret formalarda gündəmə gəlir. Erməni müzalifəti və analitiklərinə görə,  görüşdə Ermənistan qüvvələrinin Qarabağdan çıxarılması, Naxçıvan dəhlizi və sərhədlərin demarkasiyası, (Azərbaycanın Qazax rayonunun 7 kəndi nəzərdə tutulur) Azərbaycana qaytarılması rəsmiləşdiriləcək.