Ölkə mətbuatı nə yazır? - media icmal17.12.20

Azərbaycana artan kiber hücumların səbəbləri, Türkiyə hərbi qüvvələrinin Azərbaycana gəlməli olması zərurəti,  koronavirusa yoluxma əleyhinə dərmanların qıt olması iddiası, Qarabağda ələ keçirilən erməni hərbiçilərə əsir, yoxsa terrorçu kimi yanaşılması, şirkətin borcuna görə sakinlərin işıqlarının kəsilməsi və s. məsələlər medianın mövzuları sırasındadır...  

"Azərbaycan" qəzeti "Azərbaycanda kiberhücumların sayı iki dəfədən çox artıb" sərlövhəli məqalədə ölkəyə artan kiberhücumların səbəblərini araşdırır.

Müəllifin sözlərinə görə, Azərbaycanda uzaqdan giriş protokolu üzərindən edilən hücumların sayı iki dəfədən çox artıb.

Məqalədə "Kaspersky" şirkətinə istinadən bildirilir ki, 2020-ci ildə uzaqdan işləməyin təşkili üçün nəzərdə tutulan RDP (Remote Desktop Protocol) protokolu üzərindən edilən hücumlarda kəskin artım var: "Şirkətin "Uzaqdan iş - ilin hekayəsi" hesabatına görə, yanvar-noyabr ayları arasında Azərbaycanda 2,2 milyon belə hücum qeydə alınıb. Bu, 2019-cu ilin eyni dövrü ilə müqayisədə 2,6 dəfə çoxdur", deyə vurğulanır.

Ekspertlərə görə, bu artımın olması işçilərin məsafədən iş rejiminə kütləvi keçidi ilə əlaqəlidir. Ekspertlər deyirlər ki, RDP üzərindən qoşulmaların sayı artıb ki, bundan da təcavüzkarlar istifadə edirlər. Onlara görə, sərt karantin tətbiq edilməzdən öncə RDP üzərindən hücumların sayı 167 min, mart ayında 283 min olub, noyabr ayında isə bu rəqəm təxminən 200 minə bərabər olub.

Müəllif deyir ki, 2020-ci ildə şirkət dünya miqyasında bu şəkildə maskalanmış təqribən 1,7 milyon unikal zərərli sənəd aşkar edib.

"Redaktor.az" saytı "Heç kim bizimlə şərt dili ilə danışa bilməz – millət vəkili" sərlövhəli məqalədə Türkiyə hərbi qüvvələrinin Azərbaycana gəlməsinin səbəblərini izah edir.

Deputat Bəhruz Məhərrəmov Türkiyə hərbi qüvvələrinin Azərbaycana gəlməsini vacib sayır. 

Deputat hesab edir ki, Türkiyə bölgənin ən qüdrətli dövlətidir, son illərdə apardığı antiterror əməliyyatları onun hansı güc sahibi olduğunu göstərir. Odur ki, Qarabağda sülhün təmin edilməsində Türkiyə vacib amildir: "Hesab edirəm ki, ən yaxın zamanda Türkiyə hərbiçiləri Azərbaycana gələcək və öz missiyasını ən peşəkar formada yerinə yetirəcək", deyə deputat bildirir.

Deputata görə, Türkiyənin bölgədə olması sülhün əldə olunması üçün önəmli faktordur və bu baxımdan, onun bölgəyə gəlməsinə heç kim mane ola bilməz.

Deputat yada salır ki, ərazi beynəlxalq hüquqla tanınan Azərbaycan ərazisidir və kimin oraya gəlib-gəlməyəcəyinə ancaq Azərbaycan dövləti qərar

verir. Deputat əlavə edir ki, Türkiyənin gəlişinin gecikməsi sırf texniki prosedurlarla bağlıdır, ən qısa zamanda Türkiyə Silahlı Qüvvələri Qarabağda yerləşdiriləcək.

"Sfera.az" saytı isə "Bu, vətəndaşı ölümün qucağına atmaqdır… COVİD-19 dərmanları tapılmır, apteklərə nəzarət yoxdur" sərlövhəli məqalədə pandemiya şəraitində tələb olunan dərmanlarla bağlı qıtlıq yaşanmasını müzakirəyə çıxarır.

Müəllif deyir ki, koronavirusa yoluxma riskinin yüksək olduğu indiki zamanda daha bir ağır problem müalicə üçün tələb olunan dərmanların tapılmamasıdır.

Müəllifə görə, "Belə dərmanlardan biri Arbidoldur, pandemiyadan əvvəl 7-15 manat idisə, indi bu dərman 100 manat və daha baha qiymətə satılır. Arbidol kimi "Tamiflyu-75", "Enfluvir-75", "Moksilok-400", "Erqoferon" da real dəyərindən dəfələrlə baha qiymətlərlə satılır".

Deputar Məlahət İbrahimqızı hesab edir ki, dərman qıtlığına səbəb bu dərmanların çoxunun xaricdən alınmasıdır, amma maksimum dərəcədə apteklərə nəzarət olunmalıdır ki, ajiotaj yaşanmasın.

Deputat düşünür ki, koronavirusun müalicəsində birbaşa istifadə olunan antibiotik və virus əleyhinə dərmanların satışı yalnız həkim respetinə əsasən həyata keçirilsə qıtlıq yaranmaz: "...lakin bir neçə dərman var ki, onların tükənməməsi və baha satılmaması üçün respetlə satılmalıdır", deyə deputat bidirir.

Radioloq Aydın Əliyev deyir ki, pandemiyadan öncə, 5-6 manata satılan dərmanların qiyməti indi 50-100 manat arasında dəyişir, həm də, təəssüf ki, koronavirusun müalicəsində istifadə olunan dərmanlar tapılmır.

"Millətin belə ağır günündə dərmanları gizlədib, qiymətini artırmaq insanlığa sığmayan davranışdır", deyə A.Əliyev bildirir.

"Modern.az" saytında isə "Atəşkəsi pozan erməni silahlıları hərbi əsir deyil, terrorçu kimi mühakimə olunacaq" sərlövhəli məqalədə Qarabağda Azərbaycan hərbi qüvvələrinə qəfil hücumlar edən erməni silahlılarına necə münasibət bəslənməli olduğu şərh edilir.

Müəllif yada salır ki, Azərbaycan Ordusu 44 günlük Vətən Müharibəsində 1ələbə qazandı. Noyabrın 10-da imzalanan üçtərəfli bəyannaməyə əsasən, Qarabağda atəşkəs elan olundu. Daha sonra razılaşmaya uyğun olaraq bölgədə Rusiya sülhməramlıları yerləşdirildi, işğal altındakı bir neçə rayon boşaldıldı, əsir və girovlar dəyişdirildi.

Müəllif deyir ki, son günlər Ermənistan tərəfi üçtərəfli bəyannaməni pozmağa çalışır, meşələrdə gizlənmiş erməni silahlıları Azərbaycan hərbiçilərinə qarşı təxribatlar törədir, təxribatlar zamanı onlar özlərini terrorçu kimi aparırlar.

Buna da cavab olaraq Azərbaycanın aidiyyatı dövlət qurumları bu qanunsuz silahlı dəstələrə qarşı antiterror əməliyyatları həyata keçirir.

Qeyri-rəsmi məlumatlara görə, bu əməliyyatlar zamanı 100-dən çox erməni hərbiçi tutulub.

Ekspertlər isə belə hesab edirlər ki, artıq onlar hərbi əsirlər deyil, terrorçulardır və terrorçu kimi də mühakimə olunmalıdırlar: "Onlara məhz terror aktı törədən şəxslər kimi yanaşılacaq".

"Yeniavaz.com" saytında yer alan ""Azərişıq" şirkətin borcuna görə sakinlərin işığını kəsdi" sərlövhəli məqalə isə şikayət xarakterlidir.

Müəllif deyir ki, Xırdalan şəhərində yerləşən "AAAF Park" Yaşayış Kompleksində sakinlərə verilən elektrik enerjisi kəsilib. Müəllifə görə, məlum olan
budur ki, əraziyə gələn "Azərişıq" ASC-nin əməkdaşı sakinlərə verilən elektrik enerjisinin "AAAF Park" şirkətinin borcuna görə baş idarədən kəsildiyini bildirib.

Müəllifin sözlərinə görə, sakinlər isə rəsmi olaraq "Azərişıq" ASC-nin abonentləridirlər və təbii qaz olmadığına görə hər ay orta hesabla 250-300 manat elektrikə pul ödəyirlər. 

İndi isə "Azərişıq" ASC ilə "AAAF Park" arasındakı borc qalmaqalına görə heç bir məsuliyyət daşımayan, vaxtlı-vaxtında sərf etdikləri elektrikin məbləğini ödəyən sakinlər əziyyət çəkirlər, bu elektrik enerjisi də fasilələrlə verilir və bu binalara qaz çəkilməyib.

Müəllif vurğulayır ki, sakinlər "Azərişıq" abunəçiləridir, ödənişləri də o quruma edirlər. Odur ki, bu problemin sakinlərə sirayət etdirilməsi doğru deyildir.