Peşmançılıqsız istintaq

Xəzər Rayon Məhkəməsində hakim Zeynəb Axundovanın sədrliyi ilə öz maşını ilə gənc qadını vurmuş və AR CM-nin 263.2-ci maddəsi (“Avtomobil, tramvay və ya digər mexaniki nəqliyyat vasitəsini idarə edən şəxs tərəfindən yol hərəkəti və ya nəqliyyat vasitələrinin istismarı qaydalarının pozulması zərərçəkmiş şəxsin ölümünə səbəb olduqda”) üzrə təqsirləndirilən Şükran Nəzirov barəsində cinayət işinə dair məhkəmə prosesi keçirildi. 

Proses təyin olunmuş vaxtdan bir saat gec başladı, dünyasını dəyişmiş qadının anası Gülzadə İsgəndərova işin mahiyyətini Turan-ın müxbirinə izah etdi. Həlak olmuş qadının anasının sözlərinə görə, ölümlə nəticələnən faciə 2016-cı il oktyabrın 28-i axşamı Buzovna-Maştağa yolunun 2-ci kilometrində baş verib: ”Şəxsi maşını ilə sərnişin daşıyan Şükran Nəzirov “Azsamand” markalı maşınla  qızım Könül Atakişiyevanı vurub, qızım aldığı zədələrdən hadisə yerindəcə keçinib. Könül mənim yanımdan Buzovna qəsəbəsindəki evinə qayıdırdı... 

...Könül avtobusla “Koroğlu” metro stansiyasına qədər gedib, sonra taksiyə minib. Saat  19:05-də telefonla ərinə taksidə olduğunu yazıb. Mənzilə çatdıqda taksidən düşərək yolun bir hissəsini keçib və onu qarşılayan əri Azada çatmaq üzrə ikən qəfildən peyda olan  və hərəkətin əksi istiqamətində böyük sürətlə (100 km/saatdan artıq) şığıyan maşın Könülü vuraraq yerdən qoparıb. Zərbə onu havaya qaldıraraq 30-35 metr kənara atıb. Ekspertlər bildrirlər ki, onun belə uzağa atılması hərəkət sürətinin çox yüksək, təxminən  100 km/saat olduğunu göstərir. Bu, saat 19.30 radələrində baş verib. Sürücü cinayət yerindən qaçaraq gizlənib. Hadisə yerinə gəlmiş polis  əraziyə baxış keçirib və fotoşəkillər çəkib.    

Lakin başımızın dəfn mərasiminə qarışdığı bir vaxtda müstəntiq İsmayıl Babayev qızımı qətlə yetirən şəxsin aqibətini yüngülləşdirməyə çalışıb. O, protokola yazıb ki, Şükran 60 km/saat sürətlə hərəkət edirmiş, bunun sübutu kimi işə maşının yalnız sınmış faranın göründüyü bir fotoşəklini əlavə edib, əzilmiş bamper və zərbədən sınmış qabaq şüşənin fotoşəklini əlavə etməyi isə “unudub”. Bundan başqa, hadisə yerinin sxemi yanlış tərtib olunub. Dəyişdirilmiş sxemə görə, sürücü hərəkət istiqamətinin əksinə deyil, hərəkət istiqaməti üzrə gedirmiş.

  
Kürəkənim Rusiya vətəndaşıdır Azərbaycan dilində pis danışır və latın qrafikasını bilmir. Lakin polisdə ifadə verərkən ona tərcüməçi ayrılmayıb. Onun ifadələri düzgün yazılmayıb. Keçən məhkəmə iclaslarında ona guya polis tərəfindən ayrılmış olan  tərcüməçinin fotoşəklini göstərdilər. Azad onu hətta tanımadı da. Niyə istintaq Nəzirovu təmizə çıxartmaq istəyir? Nəzirov özü indiyə qədər həbs olunmayıb və azadlıqda gəzir. O, törərtdiyi qətlə  görə əsla peşman deyil. Keçən dəfə o, özünə çox arxayın bir halda bizə dedi ki, onsuz da onu həbs etməyəcəklər”.    

Nəhayət, məhkəmə iclası başlandı və hamı zala keçdi. İştirak edən şəxslərin siyahısı elan olundu, hakim Axundova təqsirləndirilən şəxsin keçən dəfə şəxsiyyət vəsiqəsini unutduğundan ifadə verə bilməmiş anasını şahid qismində ifadə vermək üçün zala dəvət etdi. Lakin bu dəfə də şəxsiyyət vəsiqəsinin olmadığı məlum olduğundan, hakim ondan zalı tərk etməsini xahiş etdi. Sonra təqsirləndirilən şəxsin vəkili vəsatətlə çıxış edərək, özünün dediyinə görə, hadisə yerində olmuş və hər şeyi görmüş, üstəlik, Nəzirovla tanış olmayan taksi sürücüsünün dindirilməsini xahiş etdi. Bu, zərərçəkmiş tərəfin vəkili Mehman Cavadovun və prokuror Nəriman Babayevin etirazına səbəb oldu. Onlar ikisi də hadisənin üstündən yarım il keçməsi, şahidin isə yalnız indi peyda olması səbəbindən, hakimdən vəsatətin təmin olunmamasını xahiş etdilər. Bu zaman zərərçəkmiş tərəf bu şəxsi keçən iclasda gördüyünü bildirdi. O, təqsirləndirilən şəxsə yaxınlaşaraq, mehribancasına görüşübmüş, bu isə, onların tanış olduqlarını göstərir. Hakim vəsatəti  baxılmamış saxladı.  

Bundan sonra zərərçəkmiş tərəfin vəkili vəsatətlə çıxış etdi: “Məhkəmə istintaqı zamanı  təqsirləndirilən şəxs Nəzirov bunları bildirib: о, sərnişinləri “Koroğlu” metro stansiyasının qarşısında götürüb və ünvanlarına çatdırıb. Sonuncu sərnişin Ceyhun Məmmədovu Albalı qəsəbəsinə apararkən o, 60 km/saat sürətlə hərəkət edib və bu zaman piyadanı vurub. Özünün sözlərinə görə, o, dərhal maşını saxlayaraq öz nömrəsindən polisə zəng edib və hadisə haqqında məlumat verib. Sərnişin Məmmədov öz nömrəsindən Təcili Tibbi Yardıma zəng vurub. Keçən prosesdə biz mobil operatorlar xidmətinə sorğu göndərilməsi haqqında vəsatət qaldırdıq, vəsatət təmin olundu və biz cavab aldıq. Aydın oldu ki, təqsirləndirilən şəxs Nəzirovun telefonu  saat 18:56-dan 19:07-ə qədər Bülbülə qəsəbəsi radiusunda, saat 19:29-dan 19:45-ə qədər Albalı qəsəbəsi radiusunda olub, saat 19:55-dən 20:16-a qədər onun telefonu yenidən Bülbülə qəsəbəsi radiusunda qeydə alınıb.

Onun öz sərnişini kimi qələmə verdiyi şəxsə gəlincə, o, saat 19:15-dən 19:30-a qədər Pirallahı yolunda və Qala qəsəbəsində, saat 19:30-dan 20:20-ə qədər Albalı qəsəbəsi radiusunda olub. Düzdür, saat 19:35-də təqsirləndirilən şəxsin telefonundan polisə zəng edilib, lakin “sərnişin”in telefonundan Təcili Tibbi Yardıma zəng vurulmayıb. Mobil operatorların təqdim etdikləri məlumatlar göstərir ki, Nəzirov piyadanı vurduqdan sonra, hec də özünün dediyi kimi, orada qalaraq, başqa maşınlar cəsədin üstündən keçməsin deyə faraları yandıraraq ona tuşlamayıb, əksinə, cinayət yerindən qaçıb. O, yalan danışır. Hadisə yeri ilə Bülbülə qəsəbəsi antenasının radiusu arasında məsafə təxminən 25-30 km-dir. O, hadisə yerində qalıb və yardım göstəribsə, Bülbüləyə belə tez çatmağa necə nail olub? O, hadisə yerinə qayıtdıqda orada artıq polis və Təcili Yardım əməkdaşları işləyirdilər.

Qeyd olunanları nəzərə alaraq, cinayət işinin əlavə istintaq və 263.2-ci maddənin AR CM-nin 264-cü maddəsinə dəyişdirilməsi üçün prokurora qaytarılması haqqında  qərar qəbul etməyinizi, habelə Ş.Nəzirov barəsində həbs qəti imkan tədbirini seçməyinizi xahiş edirəm”.

Bundan sonra prokuror məhkəmədən vəsatətlə tanış olmaq və rəy hazırlamaq üçün vaxt istədi. Məhkəmə onun xahişini qəbul edərək, növbəti iclası mayın 16-a təyin etdi. İclas qurtardıqdan sonra təqsirləndirilən şəxsin anası zala girərək, nəsə deməyə çalışdı. Hakim ondan zərərçəkmiş şəxslərə vurulmuş zərərin ödənilib-ödənilmədiyini soruşdu. Nəzirovun anası dedi ki, onun pulu yoxdur və oğlu təqsirsizdir. Bu zaman prokuror ona dedi: “Danışma, sus. Şəxsiyyət vəsiqəsini gətirərdin, danışardın, indi isə sus. Heç nə demə”.

Sonda G.İsgəndərova dedi: “Qızım yaxşı həkim idi, cəmi 35 yaşı vardı. Könülün balaca qızı başsız qaldı. Faciə baş verəndə o, cəmi beş aylıq idi. Mən düşünürdüm ki, bu insan peşman olar, lakin onun gözlərində bir damcı da peşmanlıq, təəssüf görmədim. Mən onu bağışlamaram”. 

Qeyd olunmalıdır ki, təqsirləndirilən şəxs və onun yaxınları nəinki bağışlanmalarını xahiş etməyib, hətta bir dəfə də olsun belə zərərçəkmiş şəxslərlə görüşməyə cəhd göstərməyib və peşmançılığını bildirməyib, onlara başsağlığı belə verməyiblər.