Qabil Vəliyevin məhkəməsində

Bakı/18.01.18/Turan: Bakı Ağır Cinayətlər Məhkəməsində "Gündəlik Bakı" qəzetinin baş redaktoru Qabil Vəliyevin işi üzrə məhkəmə prosesi davam edib. O, pul tələb etməkdə ittiham olunur.

Fikrət Qəribovun sədrliyilə keçirilən prosesdə beş zərərçəkən ifadə verib.

Rasim Bağırov bildirib ki, Q.Vəliyevi şəxsən tanıyır və istintaq zamanı verdiyi ifadəni təsdiq edir. Onun sözlərinə görə, müttəhimə şəxsən 7300 manat verib. Hazırda bu pullar ona qaytarılıb və onun Q.Vəliyevə qarşı iddiası yoxdur. Prokurorun "pulu nəyə görə vermişdiniz" sualına "videoçəkilişə görə" cavabını verib və təfərrüata varmayıb.

Fuad Məmmədov müttəhimi tanıdığını bildirib. "Mən Vəliyevə min manat verdim ki, mənim obyektim haqqında məqaləni çıxartsın. Obyekti əxlaqsızlıq yuvası kimi təqdim etmişdi.

Pulları Surxay Əliyevə ("Yeni dövr" qəzetinin baş redaktoru, o da həbs edilib -red.) verdim, o da Qabilə çatdırdı", - o bildirib.

Zərərçəkən qeyd edib ki, ona dəyən zərər ödənilib və o, şikayətçi deyil. Bu barədə məhkəməyə ərizə yazıb.

Zərərçəkən Xəyyam Həsənov məhkəmədə bildirib ki, biznesmendir və Qabil Vəliyev qəzetində onun obyekti haqqında yazıb: "Mən Qabili tanıyıram. Ancaq pulu ona şəxsən verməmişəm. Mən onu bir dəfə görmüşəm, məqaləni yazandan sonra".

Zərərçəkən deyib ki, 2 min manat ödəyib və həmin pulu müttəhimin qohumu qaytarıb.

Qabil Hüseynov məhkəməyə ifadəsində bildirib ki, 2012-ci ildə Qabil Vəliyevə 43 300 manat verib.

"Mən Qabilə və onun köməkçisinə pul verdim ki, mənim obyektim haqqında məqaləni çıxartsın. Həmin məbləği hər ay hissə-hissə ofisə gətirirdim", - o qeyd edib. Onun sözlərinə görə, ona dəyən zərər ödənilib və müttəhimə qarşı iddiası yoxdur.

Bundan əlavə, Q.Hüseynov məhkəməyə yazılı müraciət təqdim edərək baş redaktorun azadlığa buraxılmasını xahiş edib.

Zərərçəkən Nofəl Musayev müttəhimi tanıdığını deyib: "Mən otel sahibiyəm. Qabil mənim obyektim haqqında məqalə yazdı və sonradan onu ləğv etmək üçün məndən üç min manat istədi. Ancaq mənə dəyən zərər artıq ödənilib və mənim şikayətim yoxdur".

Sonra hakim F.Qəribov bildirib ki, üç zərərçəkən qalıb, onlar məhkəməyə gəlməyiblər. O, katibdən və prokurordan zərərçəkənlərin gəlməsinin təmin olunmasını tələb edib. "Mən prosesi tez başa çatdırmaq istəyirəm", - o əlavə edib.

Növbəti məhkəmə iclası yanvarın 30-na təyin edilib.

Qeyd edək ki, "Gündəlik Bakı" qəzetinin baş redaktoru Qabil Vəliyev 2016-cı ilin dekabrında hədə yolu ilə pul tələb etməkdə, səlahiyyəti olmadan texniki vasitələrdən istifadə edərək əməliyyat-axtarış fəaliyyətində şübhəli bilinərək həbs olunub.

Məhkəmə zamanı Q.Vəliyevə qarşı irəli sürülən ittihamlar təsdiqini tapıb.-0-