Qarabağ Azadlıq Təşkilatı müəllim Rövşən Əzizovun işi, ömürlük məhbuslar və prezident seçkiləri barədə

QAT ABŞ-a qarşı aksiya keçirə bilər

Qarabağ Azadlıq Təşkilatı (QAT) 220 saylı məktəb-litseyin müəllimi Rövşən Əzizovun onu işdən çıxaran direktora qarşı məhkəmə prosesinin iştirakçısı olmaqla həftəlik xəbərlərdə adı çəkilənlərin sırasında lider oldu. QAT sədri Akif Nağı eyni zamanda ömürlük həbsə məhkum olunanların, qarşıdakı bayramlarla əlaqədar azadlığa çıxacağına ümid edənlərin hüquqlarını müdafiə edən ictimai təşkilatın rəhbəridir. Bu arada siyasətçilər də Qarabağ danışıqlarındakı uğurlardan söz açırlar. Turan QAT sədri Akif Nağıdan agentliyin suallarını cavablandırmağı xahiş edib.

- 220 saylı məktəbin ingilis dili müəllimi Rövşən Əzizov Turan-a bildirib ki, sizin rəhbərlik etdiyiniz Qarabağ Azadlıq Təşkilatının direktora təzyiqləri nəticəsində məktəbdən çıxarılıb. Çərşənbə günü R.Əzizov QAT fəallarının 220 saylı məktəbə gəlməsini əks etdirən videoyazını Nizami Rayon Məhkəməsinə təqdim edib. Gənc müəllimin işsiz qalmasına və öz ailəsini dolandıra bilməməsinə görə özünüzü günahkar sayırsınız?

- Həqiqətən biz həmin məktəbdə olduq və R.Əzizovla izahedici söhbət apardıq. Ondan dərslərdə Azərbaycan-Ermənistan dostluğunu təbliğ etməyə son qoymasını istədik. R.Əzizov bildirdi ki, düzgün hərəkət edir və bu ruhda da davam edəcək. Biz öz mövqeyimizi ona başa salmaq istədik, ancaq o anlamaq istəmədi. R.Əzizovun şəxsi baxışları ola bilər. Ancaq onun siyasi baxışları dərs mövzusu ola bilməz. Pedaqoqa uşaqların tərbiyəsi tapşırılıb. Bizim müəllimlə və məktəbin direktoru ilə söhbətimiz etik çərçivədə keçdi, onlara qarşı zorakılığa yol verilmədi. Biz söhbəti videoya çəkdik və yenə də bildirirəm ki, söhbət etik çərçivədə oldu.

Ola bilsin ki, R.Əzizovun işdən çıxarılması sosial şəbəkələrdə kampaniyaya səbəb olub və bu kampaniyanın iştirakçıları onun dərs demək metodundan narazı olanlardır.

Məktəb rəhbərliyi bu vəziyyəti nəzərə alıb. QAT tədris müəssisəsinin daxili işlərinə qarışa bilməz və məktəb ictimai tələblərdən irəli gələrək qərar qəbul etməməlidir. Biz ancaq öz mövqeyimizi onun diqqətinə çatdırdıq, R.Əzizovun işdən çıxarılması isə direktorun seçimidir ki, biz də ona təzyiq göstərməmişik.

- Novruz bayramı ərəfəsindəyik. Mayda Azərbaycan Xalq Cümhuriyyətinin 100 illiyi qeyd olunacaq. Deyirlər ki, ömürlük məhbuslar azadlığa buraxılacaq. Bununla bağlı nə bilirsiniz?

- Biz ömürlük həbs olunanların hüquqlarını Müdafiə Komitəsinin işçi qrupunun iclasını keçirdik. Novruz ilə əlaqədar amnistiya və əfv olarsa ömürlük məhbusların nəzərə alınması xahişilə hakimiyyətə müraciət etdik.

Əfv komissiyasının üzvləri mətbuata bildiriblər ki, bu kateqoriyaya aid məhbuslar prezidentin əfv fərmanına düşə bilər. Ancaq hələlik real addımlar hiss etmirik.

Qobustan həbsxanasında 21-22 il cəza çəkən ömürlük məhbuslar var. Onların arasında ağır xəstə olanlar, hərəkət edə bilməyənlər, keçmiş XTPDçilər var. Bəziləri siyasi məhbus kimi tanınıb. 90-cı illərdə onlar ölüm hökmünə məhkum olunmuşdular. 1998-ci ildə ölüm hökmü ömürlük həbs ilə əvəzlənib. Ancaq cəza tədbirinin dəyişdirilməsi qanunsuz, məhkəmədənkənar həyata keçirilib. Dünya praktikasında və Azərbaycan qanunvericiliyində ölüm hökmü çoxillik həbs ilə əvəzlənir, o zaman bu 15 il idi. Bizdə ölüm hökmünü ömürlük həbsə tövsif ediblər. Bu cəzanı ədalətsiz hesab edirik və həmin adamların əfv olunmasına və ya amnistiya verilməsinə təkid edirik. Bizə bildirilib ki, komitənin müraciəti nəzərə alınacaq.

- İlham Əliyev gözlənilmədən prezident seçkilərini aprelin 11-nə keçirəndə dedilər ki, bu, ondan ötrü edildi ki, Qarabağ danışıqları martda Ermənistanda keçiriləcək prezident seçkilərindən (02.03.18) sonra davam etdirilsin. Yəni, deyildiyi kimi, aprelin ortalarından Ermənistan və Azərbaycan prezidentləri Qarabağ nizamlanmasına dair uğurlu danışıqları davam etdirə biləcəklər. Bu versiya ilə razısınız?

- Biz ermənilərlə danışıqlarda uğura inanmırıq. ATƏT-in Minsk Qrupunun həmsədri olan Rusiya Qarabağa dair mövqeyini dəyişməyib. Həmçinin ABŞ - Minsk Qrupunun ikinci həmsədri. Bundan əlavə, Dağlıq Qarabağın rəhbəri Bako Saakyan Vaşinqtonda görüşlər keçirib, hətta onun şərəfinə Konqresdə yüksək səviyyədə qəbul təşkil edilib. Ola bilsin ki, biz bununla bağlı etiraz aksiyası keçirək. Bütün bunların hamısı danışıqlar prosesinin mənasız olmasından xəbər verir. Hadisələr göstərir ki, nəticə olmayacaq. Əksinə, ola bilsin ki, prezident seçkiləri aprelin 11-nə ona görə keçirib ki, təcavüzkar ilə müharibəyə başlasın. Çünki Qarabağ torpaqlarını qaytarmağın başqa yolunu görmürük.