RATİ-nin jurnalist Rafiq Tağının ölümünün il dönümü ilə bağlı bəyanatı
23.11.2012
Tanınmış jurnalist-yazıçı Rafiq Tağının ölümündən tam bir il keçməsinə baxmayaraq, RATİ onun qətli faktını lazımınca araşdırmamısına və qətli törədən şəxs hələ də məsuliyyətə cəlb etməməsinə görə Azərbaycan hökumətini qınayır. RATİ xatırladır ki, Rafiq Tağı bir il bundan öncə məhz bu gün ona qarşı törədilmiş sui-qəsd faktından sonra çoxsaylı bıçaq zərbələri ilə xəstəxanaya yerləşdirilmiş və dörd gün sonra xəstəxanada vəfat etmişdi. Rafiq Tağının ölümünün il dönümü ifadə azadlığına qarşı törədilən cinayətlərə son qoyulmasına çağıran “Cəzasızlığa Qarşı Beynəlxalq Gün”lə eyni günə təsadüf edir.
Rafiq Tağı 19 noyabr 2011-ci ildə yaşadığı evin yaxınlığında naməlum şəxsin hücumuna məruz qalmış və həmin şəxs jurnalistə yeddi bıçaq zərbəsi endirərək onu ölümcül yaralamışdı. 61 yaşlı jurnalistin üzərində keçirilmiş cərrahiyyə əməliyyatdan sonra onun səhhətində yaxşılaşma müşahidə olunsa da, dörd gün sonra jurnalist şübhəli vəziyyətdə vəfat etmişdi. Onun ölümünün ilkin səbəbi kimi boğulma göstərilsə də, sonradan Səhiyyə Nazirliyi jurnalistin peritonitdən vəfat etdiyi barədə məlumat yaydı.
Jurnalistin ölüm faktını araşdıran RATİ qəti nəticələr əldə etməsə də, Rafiq Tağıya qarşı hücumun açıq şəkildə həyata keçirilməsi onu deməyə əsas verir ki, jurnalistə hücum edən şəxs cəzalandırılmayacağına əmin idi. RATİ-nin bu hücumla bağlı prokurorluğa göndərdiyi beş sorğunun cavablandırılmaması isə bu cinayət faktının rəsmi araşdırılmasında şəffaflığın olmamasından xəbər verir.
Bu hücum Rafıq Tağıya qarşı törədilmiş ilk təzyiq faktı deyildi. Bundan əvvəl də jurnalist 2007-ci ildə İslam dini ilə bağlı tənqidi məqalə yazdıqdan sonra dini ədavət salma ittihamı ilə bir il həbs cəzasına məhkum olundu. Hakimiyyət həmin vaxt bunu onunla əsaslandırırdı ki, R.Tağını həbs etməklə onu ölümdən xilas etmişdi: guya bu məqaləsinə görə dindarlar jurnalisti qətlə yetirə bilərdi. Ölümündən əvvəl xəstəxanada verdiyi müsahibəsində R.Tağı bildirmişdi ki, bıçaqlanmasının səbəbi bəlkə də onun İran hökumətini tənqid etdiyi məqaləsi idi.
RATİ hesab edir ki, R.Tağının ölümü ilə bağlı aparılan istintaqın yubadılması onu göstərir ki, jurnalistin ölümü hazırkı hamiyyətin də maraqlarına uyğun ola bilərdi. Belə ki, hakimiyyət beynəlxalq ictimaiyyətə sübut etmək istəyirdi ki, Azərbaycanda diffamasiya haqqında qanunun qəbul olunması bu cür nəticələrə, jurnalistlərin qətlinə gətirib çıxara bilər.
Rafiq Tağının qətli Azərbaycanda jurnalistlərə qarşı törədilmiş silsilə zorakılıqların və bu əməllər görə cəzasızlığın sadəcə bir nümunəsidir. 2005-ci ilin martında “Monitor” jurnalının baş redaktoru Elmar Hüseynov planlaşdırılmış bir sui-qəsd nəticəsində qətlə yetirildi. Ölümündən yeddi il keçməsinə baxmayaraq hökumət bu cinayətə görə də məsuliyyət daşıyan şəxsi hələ də məsuliyyətə cəlb etməyib.
E.Hüseynovun qətlindən bəri Azərbaycanda jurnalistlərə qarşı 200-dən artıq fiziki təzyiq faktı baş vermişdir. Hökumət bu hücumlardan demək olar ki, heç birini ciddi araşdırmamış və əsl cinayətkarları cəzalandırmamışdır. Bu media ictimaiyyəti arasında qorxu hissinin və özünü senzuranın, tənqidi fikirləri zor tətbiq etməklə boğan şəxslər üçün isə cəzasızlıq mühitinin yaranmasına gətirib çıxarmışdır.
RATİ Azərbaycan hökumətini öz beynəlxalq öhdəliklərinə uyğun olaraq bu zorakılıq hallarına son qoyulması üçün bütün mümkün addımları atmağa çağırır:
- Elmar Hüseynovun və Rafiq Tağının qətlinin sifarişçilərinin və icraçılarının tapılması və məhkəmə qarşısına çıxarılması üçün bütün mümkün tədbirlər görülsün.
- E.Hüseynov və R.Tağının qətlləri ilə bağlı dolğun məlumat ictimaiyyətə çatdırılsın.
- Jurnalistlərə qarşı bütün zorakılıq halları ciddi araşdırılsın və cavabdeh şəxslər məsuliyyətə cəlb edilsin.
- Jurnalistlərin hədə-qorxuya məruz qalması halları tam araşdırılsın və onların etibarlı müdafiəsi təmin olunsun.
- RATİ Azərbaycan hökumətini hazırda həbsdə olan 9 jurnalist və 3 hüquq müdafiəçisini dərhal azad etməyə çağırır.
INSTITUTE FOR REPORTERS' FREEDOM AND SAFETY
Address: 8 R. Behbudov St., Apt. 85/86, Baku, Azerbaijan
tel/fax: (+99 412) 598-45-19 begin_of_the_skype_highlighting БЕСПЛАТНО (+99 412) 598-45-19end_of_the_skype_highlighting
Skype: irfs.az
24-hour hotline: +994 12 408 75 30 begin_of_the_skype_highlighting БЕСПЛАТНО +994 12 408 75 30end_of_the_skype_highlighting
e-mail: info@irfs.org
www.irfs.org
Rəy yaz