Vəkillər: Cahangir Hacıyev Maliyyə Nazirliyi rəhbərinin intriqalarının qurbanıdır

Beynəlxalq Bank sədri Cahangir Hacıyevə qarşı cinayət işi kobud prosessual pozuntularla araşdırılıb. Bu, məhkəmədə də davam edib. Bu barədə cümə axşamı keçirilən mətbuat konfransında vəkillər Fəxrəddin Mehdiyev və Aqil Layıcov bildiriblər.

Mehdiyev istintaqın DİN-in Mütəşəkkil Cinayətlərə qarşı Mübarizə Baş İdarəsində aparılmasının qanunsuz olduğunu bildirib. 2005-ci ildə DİN-in yüksək vəzifəli məmurlarının Beynəlxalq Bank sədrinin həyat yoldaşı Zamirə Hacıyevanın oğurlanmasında əli olub. Buna görə istintaqın DİN strukturu tərəfindən aparılması araşdırmanın qərəzsizliyini şübhə altına qoyur.

Bundan başqa, ittiham maddələrindən biri - 308.2 (vəzifə səlahiyyətlərindən sui-istifadə, ağır nəticələrə səbəb olduqda) prokurorluğun səlahiyyətlərinə aiddir. Qanuna zidd olaraq, Hacıyev 38 gün MCMBİ təcridxanasında saxlayıblar. Müdafiə tərəfin bu prosessual pozuntularla bağlı bütün şikayətləri diqqətdən kənar qalıb.

Eyni zamanda, Hacıyevin doğmalarının hüquqları pozulur: onun bacısı Əminə Hacıyevanın ölkədən çıxışı qadağan edilib və onun anasının mənzilini varis olaraq almasına imkan verilmir.

Hacıyevin özünün yanına notarius buraxmırlar ki, bu da onun vətəndaş hüquqlarını pozur.

Hacıyevin qohumu Beynəlxalq Sığorta Şirkətinin idarə heyəti sədrinin birinci müavini vəzifəsindən azad edilib.

Digər vəkil Layıcov bildirib ki, 2010-2014-cü illərdə ABB-nin fəaliyyəti vergi idarəsi və prokurorluq tərəfindən yoxlanılırdı. Cinayət faktları olmadığına görə cinayət işi bağlanıb. ABB-də bütün yoxlamaların təşəbbüskarı maliyyə naziri Samir Şərifov olub. Vəkil Şərifov və Hacıyev arasında intriqa olduğunu etiraf edib.

Vəkillərin sözlərinə görə, Hacıyevin rəhbərliyi ilə kredit ayrılmış bütün böyük layihələr uğurla yerinə yetirilib və dövlət səviyyəsində ölkənin iqtisadi uğurları kimi təqdim edilib.

Turan-ın “Xəzər adaları” layihəsinin həyata keçirilməsi ilə bağlı (dənizdə şəhər salınması) sualına cavabda vəkil deyib ki, bu layihə ittiham materiallarında yoxdur. Vəkillərin sözlərinə görə, istintaq Hacıyevi yalnız 35 mln. manatı mənimsəməkdə ittiham edir ki, o, bununla razı deyil.

Bu zaman Hacıyev, onun ailə üzvləri, yaxınları ABB-nin 184 mln. manat dəyərindəki səhmlərini qaytarıblar.

Bu səhmlər hansı pulla alınmışdı? Bu suala cavabda Layıcov deyib ki, bu səhmlər bankın özünün kreditləri ilə alınmışdı və həmin kreditlər ödənilib.

Beynəlxalq Bank ASC olduğuna görə əlavə emissiyalar zamanı səhmlərin kənar şəxslər tərəfindən alınması tövsiyə olunmurdu, deyə vəkil bildirib. Onun sözlərinə görə, bu göstərişi Hacıyevə “yuxarıdan” veriblər, Beynəlxalq Bankın nizamnaməsi isə səhmdarlara üstünlük verilməsinə yol verirdi və onlara növbədənkənar səhm almaq hüququ verirdi.

Vəkil məlumatı olmadığına istinad edərək, Hacıyevə bu göstərişi kimin verdiyi haqqında suala cavab verməkdən imtina edib.

Hakimlər həmçinin əsas şahidləri, Beynəlxalq Bankın məsul vəzifəli şəxslərini onları çətin vəziyyətdə qoyacaq suallardan qorumağa çalışır, baxmayaraq ki, onlar kreditlərin verilməsinə görə birbaşa məsul idilər, deyə vəkillər gileyləniblər.

Məhkəmə Hacıyevi 5 mlrd. dollara yaxın vəsaiti offşor zonalara çıxarmaqda ittiham edən Maliyyə Nazirliyinin nümayəndəsini prosesə çağırmaqdan da imtina edib. Maliyyə Nazirliyində belə məlumat var idisə, niyə onlar bu məlumatı istintaqa vermirdilər? - deyə Mehdiyev bildirib.

Müdafiə tərəfi Hacıyevə bəraət verilməsində israr etmək niyyətindədir və artıq AİHM-ə keçmiş ABB sədrinin həbsi ilə bağlı şikayət göndəriblər. -06C-