Eldar Namazov: �Azərbaycanda məmurların sayı dünya standartlarından üç dəfə çoxdur�

Azərbaycanın keçmiş prezidenti Heydər Əliyevin köməkçisi olmuş Eldar Namazov Turan-ın "Çətin sual" proqramına müsahibəsində ölkədə idarəetmə islahatlarından danışıb.

Sual: Azərbaycanda idarəetmə islahatları sahəsində aparılan işləri necə xarakterizə edərdiniz?

Cavab: Bu haqda çoxsaylı müzakirələr gedir, çoxlu bəyanatlar verilir. Müzakirələrin və bəyanatların əsas istiqamətləri məni qane edir. Söhbət ondan gedir ki, ümumiyyətlə, bürokratik aparatı azaltmaq lazımdır. Azərbaycanda dünya standartlarından üç dəfə çox məmur var. Ona görə düzgün istiqamətdə düşünürlər, düzgün istiqamətdə müzakirələr aparırlar. Ancaq atılan addımlar hələ çox ləngdir. Hesab edirəm ki, islahatları daha sürətlə və daha sərt üsullarla aparmaq olar. İqtisadi durum bunu diqtə edir. Azərbaycan bu islahatları 2006-cı ildən əvvəl keçirməli idi. Böyük neft pulları Azərbaycana gəlməmişdən əvvəl islahatlar keçirilməli idi ki, yüz milyardlarla dollar Azərbaycanın büdcəsinə daxil olanda onun üzərində nəzarət olsun, onlardan səmərəli istifadə edilsin. Çox təəssüfedici haldır ki, bu islahatlar aparılmadı. Artıq neft pullarının əsas həcmi Azərbaycana gələndən sonra və o pullardan o qədər də səmərəli istifadə olunmayandan sonra bu haqda düşünməyə, bu haqda müzakirə etməyə və müəyyən kiçik addımlar atmağa başladılar.

Sual: Bir sıra ekspertlər Nazirlər Kabinetinin formalaşmasında Gürcüstan modelini daha effektli hesab edir. Siz necə düşünürsünüz?

Cavab: Gürcüstan modeli deyəndə bu, parlament tipli respublikanın modelidir. Orada əsas iqtisadi bloka prezident deyil, baş nazir nəzarət edir. Ancaq mən daha radikal addımın tərəfdarıyam. Mən, ümumiyyətlə, Nazirlər Kabinetinin ləğvini istəyərdim. Təqribən, ABŞ-da olan model. Onsuz da nazirləri prezident təyin edir, onlar prezident qarşısında hesabat verirlər. Prezident Aparatında nazirlərlə, nazirliklərlə işləmək üzrə müxtəlif strukturlar, şöbələr var. Ona görə də Nazirlər Kabineti, ümumiyyətlə, sovet sistemindən qalan və indi heç bir effektiv funksiya daşımayan bir quruma çevrilib. Xüsusən, nəzərə alaq ki, Azərbaycan Konstitusiyasına dəyişikliklər edildi və artıq prezident səlahiyyətlərini icra edə bilməyəndə onu baş nazir yox, birinci vitse-prezident əvəz edir. Biz birinci vitse-prezident institutu yaratmışıqsa, prezident də bütün nazirlərə rəhbərlik edir, nazirlər də prezident qarşısında hesabatlıdırsa, Nazirlər Kabinetinin, ümumiyyətlə, ləğvi haqqında düşünmək lazımdır.

Sual: Son dövrlər bir sıra dövlət qurumları birləşdirilərək bir nazirliyin idarəçiliyinə verilir. Bu sahədə atılan addımları effektiv adlandırmaq olarmı?

Cavab: Formal olaraq bəli, kəmiyyət baxımından bəli, məmurların sayı azalır. Ancaq keyfiyyət baxımından o, artıq başqa məsələdir. Həmin sahədə idarəçilik prinsipləri yenidən qurulacaqmı? Şəffaflıq təmin olunacaqmı? İndi də Vergilər, Maliyyə nazirliklərinin və Gömrük Komitəsinin birləşdirilməsi haqqında müzakirələr gedir. Mən bu addımların tərəfdarıyam. Azərbaycan kimi ölkədə bu qədər nazirlik, komitə olmalı deyil. Bu qədər məmur ordusu olmalı deyil. Ona görə onların birləşdirilməsi düzgün addımdır. Ancaq onların işinin yenidən qurulması, onların effektivliyinin, şəffaflığının təmin edilməsi başqa məsələdir. Bunun üzərində də ciddi işləmək lazımdır.

Sual: Ölkədə idarəetmə sahəsində daha hansı strukturların birləşdirilməsinə, ləğvinə, yeni institutların yaradılmasına ehtiyac var?

Cavab: Birincisi, mən dedim ki, Nazirlər Kabinetinin Azərbaycan idarəçilik sistemində rolunu görmürəm. Onun ləğvi haqqında düşünmək lazımdır. Azərbaycanda hakimiyyət qolları arasında balansı təmin etmək üçün geniş islahatlar lazımdır. O cümlədən, düzgün idarəetmə üçün, iqtisadiyyatı inkişaf etdirmək üçün Azərbaycanda müstəqil məhkəmə sistemi qurulmalıdır. Azərbaycanda ərazi-idarəetmə sisteminə yenidən baxılmalıdır. Bu qədər rayonların olması, hər rayonda ştata görə böyük sayda məmurların təyin olunması nəyə lazımdır? Ona görə də islahatlar üçün geniş bir sahə var. Bütün idarəçilik sistemini yenidən qurmaq lazımdır. Mən belə hesab edirəm.

Sual: Yəni, həm qanunverici, həm icraedici, həm də məhkəmə sistemi yenidən qurulmalıdır?

Cavab: Hakimiyyətin qolları arasında balans deyəndə mən həm qanunvericilik, həm məhkəmə hakimiyyətini, həm də icra strukturlarını nəzərdə tuturam. Onun balansına yenidən baxılmalıdır. Parlamentin rolu da güclənməlidir, yerli özünüidarəetmə strukturlarının da rolu, səlahiyyətləri artmalıdır. Eyni zamanda, dünya standartlarından üç dəfə çox olan məmur ordusuna da yenidən baxılmalıdır. Azərbaycana bu qədər məmur lazım deyil. --0--