İran- Azərbaycan gərginliyi nə ilə bitəcək? – Nəsimi Məmmədli “Çətin sual" qarşısında

Bakı/11.10.21/Turan: İranla Azərbaycan arasında yaşanan gərginlik bütün dünyanın və beynəlxalq medianın diqqət mərkəzindədir. Bir aydan çoxdur davam edən gərginlik arabir səngisə də, bitmək bilmir.

Son günlər İranla Azərbaycan arasında artan gərginlik fonunda İran İnqilab Keşikçiləri Korpusunun (SEPAH) tərəfdarlarının bir neçə sosial şəbəkə hesablarında Azərbaycanda "Hüseynçilər" müqavimət hərəkatının yaradıldığı barədə məlumatlar yayılıb.

Eyni zamanda “Caliber” youtube layihəsinin bu günlərdə hazırladığı süjetdə göstərilir ki,  İran ordusu İkinci Qarabağ savaşı zamanı Azərbaycanın ərazilərinə daxil olubmuş. Həmin süjetə görə Azərbaycan ordusu Zəngilanı işğaldan azad etməyə doğru hərəkət edən vaxt bu istiqamətdə İran hərbi bölmələri ilə qarşılaşıb. Bu səbəbdən Azərbaycan ordusunun Zəngilana istiqamətlənməsi bir neçə gün gecikib, hərbçilərimiz İran qüvvələri ilə toqquşmamaq üçün 14 km geri, Soltanlı kəndində qayıdıb və daha 20 km əlavə məsafə qət etdikdən sonra təyin olunan məntəqəyə çatıb. Aparılan gərgin danışıqlardan sonra İran hərbçiləri Azərbaycan ərazisini tərk edib.

Dövlət Sərhəd Xidmətinin (DSX) Mətbuat Mərkəzinin yaydığı məlumata görə, "Son günlərdə İran İslam Respublikasının (İİR) kütləvi informasiya vasitələrində dərc edilən müsahibəsində bu ölkənin Nizam İntizam Qüvvələrinin Sərhəd Qoşunlarının komandanı general-mayor Əli Qüdərzi tərəfindən həqiqətə uyğun olmayan açıqlamalar verilib. Dövlət Sərhəd Xidməti rəsmi olaraq bildirir ki, Azərbaycan Respublikasının dövlət sərhədində hər hansı üçüncü dövlətin qüvvələri heç vaxt olmamışdır, hazırda da yoxdur və bundan sonra da olmayacaqdır”.

Görünür Iran və digər tərəflər iki ölkə arasında münasibətləri daha gərginləşdirməyə çalışırlar və fəaliyyətlərini bu istiqamətdə qururlar.

Məqsəd nədir? İran Azərbaycandan nə istəyir? Bu gərginlik nə ilə yekunlaşa bilər?

Siyasi şərhçi Nəsimi Məmmədli Kamran Mahmudovun təqdimatında yayımlanan “Çətin sual” verilişində bu və digər suallara cavab verir.