Mərkəz rəhbəri: Azərbaycan daha çox əraziləri mübahisələndirməlidir

Bakı/20.05.21/Turan: Azərbaycan-Ermənistan sərhədlərinin demilitasiyası və demarkasiyasında erməni tərəfini ən çox narahat edən “Zəngəzur dəhlizi”  məsələsidir. Gələcəkdə bu ərazilər hətta de-yure Ermənistanın tərkibində qalsa belə, de-fakto Azərbaycana bağlılığı daha çox artacaq. “Xəzər” Hərbi Tədqiqatlar Mərkəzinin rəhbəri Cəsur Sümərinli bunu Turan-ın “Çətin sual” proqramının 2021-ci il mayın 20-dəki buraxılışnda bildirib.  

Amma sərhədlərlə bağlı məsələnin müzakirəsindən öncə Sümərinli Azərbaycan əsgərlərinin söyüş də işlədərək erməni əsgərlərini ərazidən çıxarması ilə bağlı yayılan videogörüntülərə münasibət bildirib.  

Azərbaycan ordusunun İkinci Qarabağ Müharibəsinin qalibi olduğunu deyən Mərkəz rəhbəri belə davranışın qalib əsgərə yaraşmadığı düşüncəsindədir: “Onsuz da dünya Azərbaycanın üstünə gəlir. Elə bil ki, təcavüzkar Ermənistan yox,  Azərbaycandır. Yəni, icrimai rəyin Azərbaycanın əleyhinə dönə bilməsinə imkan verilməməlidir. Bu, həm də Azərbaycan əsgəri barədə yanlış təsəvvür formalaşdıra bilər”.

Mərkəz rəhbəri deyir ki, iki ölkə arasında sərhədlərin müəyyən olunması ən mühüm məsələdir, çünki bu, gələcək münaqişələrin bridəfəlik aradan qaldırılması deməkdir: “Sərhədlərin müəyyən edilməsi özü gələcək nəsillərə müharibələrsiz, münaqişələrsiz gələcək qoymaq deməkdir. Gələcəyə münaqişə mənbəyi qoymaq olmaz”.      Onun fikrincə, Azərbaycan Ermənistanla münasibətdə daha çox əraziləri mübahisələndirə bilər. Səbəb də budur ki, müxtəlif vaxtlarda Azərbaycan ərazilərinn müəyyən hissəsi Ermənistana verilib. O vurğulayır ki, Zəngəzur, Qazax-Tovuz isitqamətində 7 kənd, Naxçıvanın Kərki kəndi mübahisələndirilə bilər.       

Onun deməsinə görə, erməni tərəfi də bunun fərqindədir, ona görə də ərazi itkisinə yol verməmək üçün sərhədlərin müəyyən olunmasını “ərazi bütövlüyü”nə  qəsd kimi dəyərləndirərək özünə himayə axtarır.

Sümərinli deyir ki, erməni tərəfini ən çox narahat edən “Zəngəzur dəhlizi” məsələsidir. O əlavə edir ki, Ermənistan iqtisadi baxımdan kasıb dövlətdir,   Azərbaycan isə öz iqitisadi gücü ilə bu əraziləri get-gedə öz iqtisadi təsir dairəsinə salacaq. Onun sözünə görə, nəticədə ərazi hətta de-yure Ermənistanın tərkibində qalsa da, de-fakto Azərbaycanla, Türkiyə və Rusiya ilə hesablaşacaq.

Mərkəz rəhbəri deyir ki,Ermənistan ərazi itkisindən qaçmaq üçün vəziyyəti gərginləşdirmək istəyir, bu isə Rusiyaya sərf etmir,  prosesi müharibəsiz, xəritələr vasitəsilə həll etmək yolunu seçib.

Onun fikrincə, Azərbaycan tərəfi sərhəd məsələsini öz xeyrinə həll etmək üçün Ermənistanda daha çox əraziləri mübahisələndirməyə üstünlük verməlidir.-05B-