Tofiq Zülfüqarov: «Bakı Tramp administrasiyası ilə münasibətlər qurmalıdır»

Donald Trampın komandasının xarici siyasəti yeni formalaşır və onun əsas istiqamətləri Trampın inauqurasiya nitqindən sonra məlum olacaq. Hələlik tendensiyalar haqda danışmaq və seçkiqabağı vədlər əsasında mülahizələr yürütmək olar. Bu, belə ehtimal etməyə əsas verir ki, Tramp xarici siyasətə az diqqət yetirəcək və daha çox amerikalıların konkret problemləri ilə məşğul olacaq. Bu fikirləri Azərbaycanın keçmiş xarici işlər naziri Tofiq Zülfüqarov Turan agentliyinin “Çətin sual” proqramına müsahibəsində deyib.

T.Zülfüqarov xatırladıb ki, Obama da vəd etmişdi ki, Amerika əsgərləri daha müharibələrdə iştirak etməyəcək və öz hərbçilərini İraqdan və Əfqanısdandan çıxarmışdı. Bununla belə, ABŞ başqa vasitələrlə regional münaqişələrdə iştirak edib və elə Tramp özü də bunu tənqid etmişdi.

T.Zülfüqarov ehtimal edir ki, Trampın prezidentliyi dövründə ABŞ hər hansı bəyan edilmiş prinsiplər naminə yox, öz maraqlarına toxunan beynəlxalq məsələlərə müdaxilə edəcək.

“ABŞ-ın beynəlxalq məsələlərə diqqəti azalarsa bu, Rusiyanın rolunun güclənməsinə səbəb olmayacaqmı?” sualının cavabında T.Zülfüqarov deyib ki, əgər Amerikanın rolu zəifləsə digər regional oyunçular fəallaşacaq. “Bizim regionda Türkiyə, Rusiya və İran fəallaşacaq”, - o vurğulayıb.

“Belə perspektiv Azərbaycana nə vəd edir?  Bu sualın cavabında diplomat diqqəti ona yönəldib ki, Tramp energetika sektoruna daha çox investisiya qoyuluşu barədə planlardan danışıb. Əgər bu, baş verərsə ABŞ bazara slans qazı nəql etməklə ənənəvi enerji oyunçularının rəqibinə çevriləcək. Azərbaycan Avropa enerji bazarında böyük oyunçu deyil.

Trampın Şərqi Ukrayna və Krımla bağlı siyasətinə gəlincə, bu, Ukraynanın ərazi bütövlüyünün pozulmaslına Qərbin etirazlarının zəifləməsi tendensiyasını əks etdirir. Ümumiyyətlə, beynəlxalq birliyin tədricən münaqişələrə marağı azalır və bu, Qarabağ probleminə də aiddir. Odur ki, Azərbaycan kimi Ukrayna da daxili qüvvələrə arxalanmalıdır.

Bu ilin aprelində münaqişənin eskalasiyasından sonra baş verən hadisələr göstərdi ki, nə ABŞ, nə də Rusiya status-kvo-nu ya dəyişə bilmədilər, ya da dəyişmək istəmədilər. “Onlar status-kvo-nun saxlanmasında maraqlıdır və göründüyü kimi, güc dövlətləri bizim rayonların bir hissəsinin belə işgaldan azad edilməsində maraqlı deyil”, - keçmiş nazir vurğulayıb.

Lakin Azərbaycan belə vəziyyətlə barışmaq niyyətində deyil. T.Zülfüqarov hesab edir ki, Azərbaycan Tramp administrasiyası, digər beynəlxalq və regional oyunçularla ikitərəfli münasibətlər qurmalıdır, çünki beynəlxalq təşkilatlar formatı “işlək olmaması səbəbindən keçərli deyil”.  —06В03-