Ekvadorla Rusiya arasında hərbi texnikaya görə yaranan diplomatik gərginlik banan ixracını təhdid edir

AP:  Ekvador və Rusiya arasında diplomatik fikir ayrılığı Rusiya Ekvadordan banan idxalını məhdudlaşdırmaq qərarına gəldikdən sonra həftə sonu güclənib.

İki ölkə bu yaxınlarda Ekvadorun 200 milyon dollar dəyərində yeni hərbi texnika müqabilində ABŞ-a köhnə Rusiya hərbi texnikasının bir hissəsini vermək qərarına gəldikdən sonra toqquşub.

Şənbə günü Rusiyanın Baytarlıq və Fitosanitar Nəzarəti üzrə Federal Agentliyi Ekvadorun beş banan şirkətinə idxal qadağası elan edib və bildirib ki, əvvəlki tədarüklərdə meyvələrdə xəstəlik aşkar edilib.

Ekvador 2022-ci ildə təxminən 3,5 milyard dollar satışı ilə dünyanın aparıcı banan ixracatçısıdır. İllik satışlarının təxminən beşdə biri Rusiyanın payına düşür.

Rusiyanın bəzi növ banan idxalını qadağan etmək qərarı prezident Daniel Noboanın yanvar ayında Ekvadorun Rusiya istehsalı olan bir neçə ton köhnə hərbi texnikanı ABŞ-a təhvil verəcəyini bəyan etməsindən sonra verilib.

Noboa avadanlığın artıq yararlı olmadığını deyib və onu "metal qırıntıları" kimi təsvir edib. Onlar ölkəni terror edən narkotik qrupları ilə mübarizə aparmaq üçün lazım olan yeni avadanlıqla əvəzlənəcək.

Rusiya Xarici İşlər Nazirliyi Noboanın qərarına etiraz edərək bildirib ki,  Ekvador müqaviləni pozur, o, Rusiyanın razılığı olmadan avadanlığı üçüncü tərəflərə sata bilməz.

Ekvadorun keçmiş xarici işlər nazirinin müavini Karlos Estarellas bildirib ki, Rusiyanın bəzi növ bananların idxalına qadağa qoyması ABŞ-a köhnə hərbi texnika göndərmək qərarına cavab ola bilər.

 "Biz ümid etmək istərdik ki, bu çıxılmaz vəziyyət diplomatik danışıqlar yolu ilə həll oluna bilər", - Estarellas bildirib.

Ekvadorun əsas banan ixracat assosiasiyalarından biri olan ACORBANEC-in direktoru Riçard Salazar, "Rusiyanın radikal" qərarından təəccübləndiyini deyib və əlavə edib ki, ən azı 15 şirkət Rusiyaya banan ixracını davam etdirir.

"Bu, bizim üçün çox vacib bazardır və onu əvəz etmək çətin olacaq" deyə o bildirib.

Salazar deyib ki, onun assosiasiyasına qadağa barədə rəsmi məlumat verilməyib, lakin problemi həll etmək və qadağanın aradan qaldırılması üçün Rusiya rəsmiləri ilə görüşməyə çalışır.