ARDNŞ və Dövlət Miqrasiya Xidməti neft sektoruna xarici işçilərin axınına nəzarət edəcək

Cümə axşamı “Fairmont Baku'' otelində ARDNŞ, “BP-Azərbaycan” şirkətləri və Dövlət Miqrasiya Xidmətinin birgə təşkilatçılığı ilə “Neft-qaz sektorunda milliləşdirmə və miqrasiya məsələlərinin tənzimlənməsi” mövzusunda tədbir keçirilib. 

Tədbirdə ARDNŞ-nin prezidenti Rövnəq Abdullayev, Dövlət Miqrasiya Xidmətinin rəisi Firudin Nəbiyev, BP-nin Azərbaycan, Gürcüstan və Türkiyə üzrə regional prezidenti Qordon Birrell və digər rəsmi şəxslər iştirak ediblər.

ARDNŞ prezidenti və "BP-Azerbaijan" rəhbəri kadrların milliləşdirilməsində əməkdaşlıq üzrə protokol imzalayıb. 

İkinci imzalanan sənəd “Qobustan Regional Təlim Mərkəzində yerli işçi qüvvəsinin təlimi sahəsində əməkdaşlıq barədə ARDNŞ ilə BP arasında anlaşma memorandumu”, üçüncüsü “Bakı Ali Neft Məktəbində təhsil sahəsində əməkdaşlığa dair ARDNŞ ilə BP arasında anlaşma memorandumu”dur. Bu sənədi Q.Birrel və məktəbin rektoru Elmar Qasımov imzalayıb. 

Turan-a məlum olub ki, tədbirdə dördüncü sənədin – "BP-Azerbaijan" ilə Dövlət Miqrasiya Xidməti arasında miqrasiya məsələlərində əməkdaşlığa dair anlaşma memorandumu”nun imzalanması nəzərdə tutulubmuş. Amma DMX təmsilçiləri son anda onu imzalamaqdan imtina edib. 

Tədbir  2014-2018-ci illərdə BP-nin “Şahdəniz-2” layihəsi çərçivəsində planlaşdırdığı işlərə həsr edilib. İşlərin uğurla başa çatdırılması üçün ixtisaslı kadrlara ehtiyac var. ВР və tərəfdaşları adətən, əcnəbi mütəxəssisləri cəlb edir. Amma ARDNŞ kadrlar üzrə xüsusi baza yaradıb və onlardan ilk növbədə istifadə edilməlidir. Məlumat bazasında belə kadrlar olmayanda ARDNŞ tövsiyə məktubu ilə  DMX-yə müraciət edir ki, əcnəbilərin əmək fəaliyyətinə icazə versin. –12С--