�Avirtel� provayder şirkəti �Aztelekom�un hücumlarından özünü məhkəmədə müdafiə etmək niyyətindədir

Bakı/11.10.19/Turan: Oktyabrın 10-da Sumqayıt Ərazi İqtisad Məhkəməsində Azərbaycan provayder şirkəti "Avirtel"in "Aztelekom" MMC-yə məxsus Abşeron telekommunikasiya Qovşağına qarşı iddiasına baxılmasına başlanılıb. Provayder "Aztelekom"u "abunəçiləri oğurlamaqda", yəni vətəndaşların icazəsi olmadan İnternet trafikini öz xidmətlərinə keçirməkdə ittiham edir.

Telekommunikasiya mütəxəssisi Osman Gündüz bildirir ki, "Avirtel"dən təkcə Abşeronda 1300 müştəri götürülüb. O, bir sıra rayonlarda bir neçə özəl provayderin tam sıxışdırıldığını bildirir. Xaçmaz rayonunda fəaliyyət göstərən yeddi provayderdən heç biri qalmayıb, bölgədə yalnız "Aztelekom" fəaliyyət göstərir.

Hakim Vəfa Əzizova "Avirtel"in iddialarını dinləyib. "Aztelekom" şirkətinin nümayəndələri məhkəməyə buraxılmayıb, çünki hakimin fikrincə, cavabdeh məhkəmədə nümayəndəsi olmayan Abşeron telekommunikasiya qovşağıdır. "Avirtel"in vəkili Qəzənfər Paşayev Turan-a bildirib ki, növbəti iclas oktyabrın 12-nə təyin edilib.

Törəməsi Abşeron Telekommunikasiya Qovşağı ilə təmsil olunan "Aztelekom" MMC 2016-cı ildən provayder xidmətləri bazarından özəl rəqibləri qovmaq üçün məqsədyönlü tədbirlər həyata keçirir. 2016-cı ildə "Aztelekom" İnternet trafiki, konmmunikasiya icarəsi və elektrik enerjisinin qiymətini "Avirtel" üçün ayda 5.90 manatdan 210 manata qaldırıb. "Avirtel" bu qiymətlə razılaşmır və xidmətlərin bu qədər bahalaşmasının səbəbini əsaslandırmağı tələb edir", - deyə Paşayev izah edib.

"Aztelekom" özəl şirkətlərə trafik satışında inhisarçı olduğundan abunəçiyə xidmətlər satmazdan əvvəl "Avirtel" "Aztelekom"a müraciət etməlidir. Bu zaman cavab 10-15 gün gecikir. İstehlakçılar bunu çox gözləyə bilməzlər və İnternet üçün dövlət inhisarçısına müraciət edirlər.

2016-cı ildən bəri "Aztelekom" "Avirtel" müştərilərinə zənglər edir, şirkətin xidmətlərinin aşağı keyfiyyətləri barədə məlumat verənlərə istehlak müqaviləsi bağlamağı təklif edir. Bunları "Avirtel" istehlakçıları bildirir. İnternetə yüksək qiymətlər qoyan "Aztelekom"un təklifi ilə razılaşmadıqda sonuncu müştərilərin naqillərini kəsir.

Q. Paşayev deyib ki, belə hərəkətlər nəticəsində "Avirtel" Gəncədə 2000, Xaçmazda 191 müştərisini itirib. 2016-cı ilə qədər bu şirkət 13 minə yaxın müştəriyə xidmət göstərirdi. "Avirtel" ilə imzalanan müqaviləyə görə, istehlakçılar bir ay əvvəldən şirkətlə münasibətlərin dayandırılması barədə xəbərdarlıq etməyə borcludurlar, lakin "Aztelekom" fiziki və hüquqi şəxsləri müqavilənin bu bəndini pozmağa məcbur edir. "Müştərilərin oğurlanması" davam edir, "Avirtel" 2-3 ay ərzində tam iflas olacağını proqnozlaşdırır.

"Turan"a daxil olan məlumata görə, "Aztelekom" "Azevrotel"ə qarşı da analoji hərəkətlər edir. "Aztelekom" Bakının Yasamal rayonunda yaşayan Kamal Əli və Nərimanov küçəsindəki beşinci evdə (Bakı) yaşayan qonşularını xəbərdar etmədən mənzillərə olan telefon naqillərini kəsdikdən sonra bu şirkətin xidmətlərindən imtina etməyə məcbur olublar. "Azevrotel" buna qarşı çıxmayıb, müştərilərlə bağlanmış müqavilələrdən sakitcə imtina edib.

"Aztelekom" işçiləri keçmiş müştərilərinə fiber optik kabellər vasitəsilə ən keyfiyyətli internet əldə edəcəklərini söyləyib.

Q. Paşayev "Turan"a bildirib ki, əslində fiber optik naqillər "Aztelekom"dakı avadanlıqlara qədərdir, bundan sonra müştərinin mənzilinə adi mis naqil çəkilir.

"Turan" "Aztelekom" MMC-nin ictimaiyyətlə əlaqələr şöbəsinin müdiri Aynurə Həsənovaya müraciət edib. O, agentliyə MMC-nin mövqeyi ilə bağlı cavab göndərib.

"Aztelekom" MMC bildirir ki, 1 yanvar 2013-cü il tarixdə "Avirtel" ilə ərazidən və enerjidən istifadə üzrə bir il müddətinə müqavilə bağlayıb. Müqavilənin bitməsinə 15 gün qalmış tərəflərdən birinin onu ləğv etmək istəyi yoxdursa, müqavilə daha bir il uzadılır. 2016-cı ildə MMC tariflərini dəyişdirib, yeni bir müqavilə bağlamağa ehtiyac oldu, bu barədə bütün provayderlər, eləcə də "Avirtel" məlumatlandırılıb. Digər provayderlər yeni müqavilə bağlasa da, "Avirtel" 2013-cü il sənədindən gələn ayırmaları yerinə yetirməkdən, yeni müqaviləni imzalamaqdan imtina edib. 30 noyabr 2018-ci il və 6 dekabr 2018 tarixlərində "Aztelekom" "Avirtel"ə əvvəlki müqavilənin (2013-cü il tarixinə) uzadılmayacağı barədə məlumat verib.

Hazırda "Aztelekom" və onun filialı Abşeron Telekommunikasiya Qovşağının rəsmi ərazilərində "Avirtel"in əmlakının yerləşdirilməsi və elektrik enerjisindən istifadəsinə hüquqi əsas yoxdur. "Avirtel" Abşeron Telekommunikasiya Qovşağının struktur bölmələrini, o cümlədən bölgələrdə fəaliyyət göstərənləri günahlandırmaqla bu hallardan xəbərsiz olan istehlakçıları aldadır. "Avirtel" təqsiri "Aztelekom"un üzərinə ataraq, genişmiqyaslı innovativ tədbirlər keçirən dövlət şirkətinə qarşı vətəndaşlarda nifrət hissləri oyatmağa çalışır. Yeni aparat kompleksləri alınır və quraşdırılır, köhnə kabellər fiber optik kabellərlə əvəz olunur. Cavabda həmçinin bildirilir ki, xəbərdarlıqlara baxmayaraq, "Avirtel" də daxil olmaqla bir çox provayder "Azevrotel" tərəfindən tətbiq olunan yeni texnologiyalı avadanlıqların birləşdirilməsi və yerləşdirilməsi üçün tədbirlər görməyib. Nəticədə abunəçilər rabitəsiz qalıb. "Aztelekom" bir müddət bu abunəçilərə pulsuz trafik təmin etmək məcburiyyətində qalıb.

Abonentlərin bir hissəsinin "Aztelekom"un fəaliyyət sahəsinə köçürülməsi onların könüllü seçimi hesab olunur. Abunəçilər digər provayderlərin xidmətlərini də almaq imkanına malikdirlər", - deyə "Aztelekom" MMC rəsmi cavabında bildirib. -0-