Media-icmal 11.10.19

Regionların inkişafı ilə bağlı dövlət proqramlarının nəticələri, kadr dəyişikliklərinə yaranan tələbat, inhisarın olması ətrafında müzakirələr və s. məsələlər bugünkü (11 oktyabr, 2019-cu il) medianın aparıcı mövzularındandır.

Regionları dəyişdirən proqramlar

"Azərbaycan" qəzeti "Regionların sosial-iqtisadi simasını dəyişən proqramlar" sərlövhəli məqalədə regonların inkişafında dövlət proqramlarının mahiyyətini dəyərləndirir.

Müəllif deyir ki, prezident İlham Əliyevin təşəbbüsü ilə həyata keçirilən islahatlar (Regionların inkişafı ilə bağlı 2004-2008, 2008-2013, 2013-2018-ci illər dövlət proqramları nəzərdə tutulur -red.) regionların sosial-iqtisadi inkişafında mühüm dəyişikliklərə səbəb olub.

Müəllifə görə, dövlət proqramlarının icrası regionlarda minlərlə kiçik, orta və iri istehsal və xidmət sahələrinin fəaliyyətinə imkan yaradıb, nəticədə məhsul istehsalında bölgələrin payı ildən-ilə artmaqda davam edir.

Müəllif hesab edir ki, bu proqramların başlıca məqsədi bölgələrdə iqtisadi inkişafla yanaşı, sosial problemləri də həll etməkdir, nəticədə təhsil, səhiyyə, rabitə, idman və digər sahələri əhatə edən obyektlər inşa edilib, bölgələrdə kəndarası avtomobil yolları, qaz, işıq xətləri yenidən çəkilib və ya əsaslı təmir olunub. Görülən işlərin sayəsində bölgələrdə yaşayan əhali həmin sosial xidmətlərdən rahat şəkildə istifadə edə bilir.

Məqalədə vurğulanır ki, son 15 ildə 15 min kilometr yol çəkilib ki, bunun çox hissəsi kənd yolları və regionlardakı şəhərlərarası avtomobil yollardır, təkcə cari ilin 6 ayında təxminən 400 kilometrə yaxın avtomobil yolu çəkilib, qazlaşdırma isə 95 faizi keçib.

Müəllif deyir ki, regionlarda 9 sənaye parkı və məhəllələri iqtisadi inkişafa öz töhfəsini verir, nəzərdə tutulan 6,4 milyard manat sərmayədən 5,7 milyard manatı faktiki olaraq investisiya kimi qoyulub, 11 mindən çox yeni iş yeri açılıb, layihələrin icrası sayəsində 1,5 milyard manatlıq məhsul istehsal olunub,onun da 300 milyon manatlıq hissəsi xarici bazara çıxarılıb.

Yazıda vurğulanır ki, aqrar sektorda da iri müəssisələrin yaradılması üzrə səmərəli iş aparılır, regionlarda 51 aqroparkın yaradılması nəzərdə tutulub, 22 aqropark fəaliyyət göstərir, ilin sonuna qədər daha 11 aqroparkın fəaliyyətə başlaması gözlənilir.

Müəllifə görə, bu layihələrin icrası üçün ölkə iqtisadiyyatına 2,4 milyard manat əlavə investisiya qoyulacaq, layihələrin icrası 4 mindən çox yeni iş yerinin açılmasına imkan yaradır.

Məqalənin sonunda isə oxuyuruq: "Bir sözlə, regionların sosial-iqtisadi inkişafına dair dövlət proqramlarının icrası bölgələrdə bütün göstəricilərin artmasına, ölkənin dayanıqlı və tarazlı inkişafına töhfə verir. Üç dövlət proqramının həyata keçirilməsi əhalinin rifah halının yüksəlməsində və məşğulluğun təmin edilməsində mühüm rol oynayıb. Dördüncü dövlət proqramı da bölgələrin sosial-iqtisadi inkişafına böyük töhfə verəcək".

Çevik Nazirlər Kabinetinə olan ehtiyac

"Yeni Sabah.az"da isə "Rüşvətə meylli kadrlar problem yaradır"-Vahid Əhmədov" sərlövhəli məqalə oxumaq olar.

Müəllif bu günlərdə Novruz Məmmədovun baş nazir postundan istefa verməsi və Əli Əsədovun baş nazir təyin edilməsilə yaranan gündəmin məsələləri barədə Milli Məclisin İqtisadi siyasət, sahibkarlıq və sənaye komitəsinin üzvü Vahid Əhmədovla söhbətləşir.

V.Əhmədov "Yeni Sabah.az"a deyir ki, Nazirlər Kabinetini çevik quruma çevirmək üçün islahatlara ehtiyac var və söhbət daha geniş struktur islahatlarından gedir, bəzi nazirliklərin birləşdirilməsi, bəzi qurumların səlahiyyətlərinin məhdudlaşdırılması məsələsinə baxılmalıdır : "Çevik bir orqan yaradılmalıdır ki, bütün məsələlərə operativ müdaxilə edib qərarlar verə bilsin, buna ciddi ehtiyac var", deputat bildirir.

İslahatların ləng getməsilə bağlı V.Əhmədov deyir ki, islahatların həyata keçirilməsi o qədər də asan deyil, bəzən bu, cəmiyyyətdə birmənalı islahatlar elə aparılmalıdır ki, ciddi problemlər yaranmasına səbəb olmasın.

Deputat kadr islahatları ilə bağlı bir məqamı xüsusi vurğulayır: "Təyinatlarda kadrların rüşvətə, korrupsiyaya bulaşmaması nəzərə alınmalı, vəzifə başına keçdikdən sonra da şəffaf fəaliyyət göstərəciyinə əminlik olmalıdır. Bu cür kadrlar var və onlardan istifadə etmək lazımdır. Rüşvətxorluğa və korrupsiyaya meylli kadrlar isə əlbəttə ki, problem yaradır. Kadr dəyişikliklərində bu amilə daha çox diqqət yetirməyi tövsiyə edərdim".

Ölkə idarəetməsində yer alan bəzi yeni simaların da fəaliyyətlərində qüsurlar olması iddialarına cavab verən V.Əhmədov deyir ki, müəyyən səhvlər ola bilər, amma bir nazirliyin formalaşması üçün 10 illərlə vaxt lazımdır, əsas odur ki, rüşvət və korrupsiya demək olar ki, yoxdur.

Deputat hesab edir ki, rayon icra hakimiyyətlərində cavan kadrların təyinatına ehtiyac var, bu tərkib cavanlaşdırılmalıdır, amma deputata görə, cavan kadrların təyin olunması da bəzən problemlər yaradır, təcrübəsizlik idarəetmədə axsamalara səbəb olur, odur ki, yaşlı, təcrübəli kadrlardan da ikinci şəxs kimi yararlanmaq olar, idarəetmədə təcrübə vacib amildir.

Monopoliya qaldıqca...

"Azpolitika.info"da isə "Təmiz adamlar vəzifəyə gətirilməlidir-"Bu, acgözlük, xalqın qanını sormaqdır" sərlövhəli məqalə diqqəti çəkir.

Müəllif bu günlərdə Əli Əsədovun baş nazir təyin olunması fonunda ölkə gündəminin yenilənməsi barədə deputat Əli Məsimli ilə söhbətləşir.

Ə.Məsimli artıq idarəetmədə kadr dəyişkliklərinə ciddi ehtiyacın yarandığını deyir, sosial şəbəkələrdə bu yöndə müzakirələri təsadüfi olmayan sosial sifariş sayır: "...siyasətdə korrektələr etməyi bacaran, üstəlik, əli təmiz və dövlətçilik təfəkkürü olan insanların vəzifəyə gətirilməsi çox vacibdir.Ya korrupsiyadan uzaq, təmiz, yüksək dünyagörüşlü insanlar görəvə gətirilməlidir, ya da iqtisadiyyatın səmərəliliyi geriyə gedəcək", Ə.Məsimli belə bildirir.

Ə.Məsimli hesab edir ki, islahatların yeni mərhələsi insanlarda ümid yaradıb, indiki mərhələdə korrupsiyadan uzaq, xalqın və dövlətin maraqlarını fəaliyyətində üstün tutan bacarıqlı kadrlardan daha çox istifadə olunmasna ehtiyac var.

MDB məkanında ümumdaxili məhsulun (ÜDM) həcminə görə ən zəif tempin Azərbaycanda müşahidə olunması ilə bağlı Ə.Məsimi deyir ki, neft bumu səngidikdə iqtisadiyyat neftdən asılı olduğu üçün temp aşağı düşüb, indi çalışmaq lazımdır ki, qeyri-neft sektorunun inkişafı ilə bu temp sürətlənsin.

Deputat vurğulayır ki, konkret olaraq qoyulan sərmayə korrupsiyanın yeminə çevrilən yerlərdə inkişaf olmur.

Maaşların artması ilə yanaşı qiymətlərin də artmasına toxunan deputat deyir ki, monopoliyaya qarşı ciddi mübarizə aparmaq lazımdır ki, artan maaş süni qiymət artımının "yeminə" çevrilməsin: "...Əslində bu monopolistlərin acgözlüyü, millətin qanını sormaq hərisliyidir...Bu, xalqın soyulmasının acgöz variantıdır və bunu aradan qaldırmaq lazımdır...Bu, artıq acgözlük, xalqın əlində olan pulların müxtəlif üsullarla mənimsəmək variantıdır. Bunun bazar iqtisadiyyatına yaxından-uzaqdan aidiyyatı yoxdur".

Ə.Məsimli deyir ki, bunun hələ də aradan qaldırıla bilməməsi səbəbi həmin monopolistlərin xeyli hissəsinin vəzifədə olması, dolayısı, ya da birbaşa iri kapital daşıyıcısı olan şirkətlərin başında durmasıdır, həm də ölkəyə fayda vermək qabiliyyəti olan iş adamlarını sıradan çıxarmaları, lazım gələndə qiymətlərlə də oynamalarıdır: "Harada monopoliya varsa, orada iqtisadiyyatın yüksək səmərəsindən, ədalətli qiymətlərdən, xalqın güzəranının sürətlə yaxşılaşmasından danışmaq olmaz. Ona görə də məmur biznesini və məmur sahibkarlığını aradan qaldıran kimi monopoliyaların xeyli hissəsi öz-özünə ləğv olub gedəcək".