Azərbaycan neftinin «şimal» marşrutu ilə ixracı hələ dayandırılmayıb

Bakı-Novorossiysk boru kəməri ilə qarşılıqlı əlverişli şərtlərlə neftin nəqli həm «Transneft» şirkətinin, həm də «SOCAR»ın marağındadır. Bu barədə Turana Azərbaycan Dövlət Neft Şirkətindən bildiriblər. 

SOCAR-ın məlumatına əsasən, hazırda iki şirkət arasında müqavilə müddəti hələ bitməyib və bu məsələ ilə bağlı qızğın müzakirələr gedir. Danışıqlar başa çatandan sonra ictimaiyyət bu barədə məlumatlandırılacaq. 

««Transneft» şirkətinin SOCAR-ın Azərbaycandan Bakı-Novorossiysk boru kəməri ilə neft nəqlinə dair müqavilə müddətinin uzadılması ilə bağlı müraciət etdiyinə dair bəyanatına gəldikdə, belə müraciət olmayıb», - deyə SOCAR-da qeyd etdilər. 

Dövlət Neft Şirkətindən bildirildi ki, əslində «Transneft»lə danışıqlar bu müddət ərzində dayandırılmayıb – şirkətlərin nümayəndələri daimi dialoqda olub. «Üstəlik müəyyən razılaşma əldə olunsa, SOCAR Bakı-Novorossiysk boru kəməri ilə neftin ixracının bərpasının istinssa etmir», - deyə SOCAR-da bildirdilər. 

Qeyd edək ki, fevralın 13-də Rusiya KİV-i «Transneft»in Bakı-Novorossiysk kəmərini bağlamayacağına dair məlumat yaydı. Rusiya tranzit şirkətinin rəsmi nümayəndəsi İqor Demin RBK-a bildirib ki, neft kəməri SOCAR-ın Azərbaycandan neftin nəqli ilə bağlı müqavilənin müddətinin artırılmasına dair müraciətinə görə fəaliyyətdə olacaq. «Biz artıq sürgüləri bağlamağa hazırlaşırdıq, ancaq ötən həftənin sonunda Azərbaycan tərəfi 2014-cü ilin fevralın 14-də müddəti başa çatan müqavilənin uzadılması xahişi ilə müraciət etdi. Hazırda fevralın 14-ə qədər qüvvədə olan hökumətlərarası razılaşmanın əvəzinə kommersiya müqaviləsinin imzalanmasına dair danışıqlar aparırıq», - deyə o bildirib. 

Demin əlavə edib ki, tərəflər hələ nəqlin həcmləri, tariflər, boru kəmərinə ötürülən neftin keyfiyyəti ilə bağlı məsələlər həll olunmalıdır. Bundan əlavə, «Transneft» nümayəndəsi qeyd edib ki, gələcək müqavilə SOCAR tərəfindən təsdiq edilən neft həcmlərinin nəqli ilə bağlı zəmanəti də nəzərdə tutmalıdır. 

2013-cü ilin may ayında RF baş naziri Dmitrii Medvedev Rusiya ilə Azərbaycan arasında Azərbaycan neftinin nəqlinə (Bakı-Novorossiysk neft kəməri ilə) dair müqavilənin dayandırılmasına dair sərəncam imzaladı. 2013-cü ilin sonuna qədər boru kəməri ilə neft nəqli mövcud razılaşmaya əsasən davma edirdi. Ümumilikdə 2013-cü ildə Azərbaycan Novorossiysk vasitəsilə 1,751 mln ton neft ixrac edib, 2012-ci ildə bu göstərici 2,06 mln ton olub.—0—