Azərbaycan Şəffaflıq Təşəbbüsündən çıxmaq fikrindən daşınıb?

Cümə axşamı dövlət başçısı İlham Əliyev Mədən Hasilatı üzrə Şəffaflıq Təşəbbüsü (EİTİ) İdarə Heyətinin sədri Kler Şortu qəbul edib. Görüşdə Şort bildirib ki, Azərbaycan EİTİ-yə qoşulan ilk ölkələrdən biridir və bu təşəbbüsdə liderlik nümayiş etdirir.

İlham Əliyev ölkəmizdə bütün sahələrdə böyük uğurlar əldə olunduğunu vurğulayaraq, Azərbaycanın Mədən Hasilatı üzrə Şəffaflıq Təşəbbüsündə iştirakının önəmini qeyd edib. Daha sonra o, yüksək neft qiymətlərinin ölkəmizdə iqtisadi inkişafın şaxələndirilməsi üçün baza yaradılmasına, sosial sahədə layihələrin icra edilməsinə, infrastrukturun qurulmasına və abadlıq-quruculuq işlərinin həyata keçirilməsinə yaxşı imkanlar yaratdığını bildirib.

Hazırkı dövrdə neftin qiymətinin aşağı olmasına toxunan Əliyev iqtisadiyyatın müxtəlifləşdirilməsində böyük uğurlardan bəhs edib. Daha sonra tərəflər Azərbaycanın EİTİ-də iştirakı perspektivlərini müzakirə ediblər, deyə rəsmi məlumatda bildirilir.

Qeyd edək ki, bu ilin aprelində EİTİ Azərbaycanın bu qurumdakı statusunu kiçildib. Qərar aprelin 14-15-də Brazzavildə EİTİ-nin 29-cu toplantısında Azərbaycan üzrə qiymətləndirmə hesabatı müzakirə edildikdən sonra qəbul edilib. Müzakirələrin yekunlarına görə EİTİ İdarə Heyəti Azərbaycanın statusunu tamhüquqlu üzvlükdən namizəd statusuna qədər endirməyi qərara alıb.

Bununla yanaşı, İdarə Heyəti növbəti il üçün tədbirlər planının hazırlanması haqqında qərar qəbul edib. Bu plan yerinə yetirildikdən sonra Azərbaycanın statusu bərpa edilə bilər.

Lakin artıq mayın 1-də Bakıda keçirilən mətbuat konfransında Azərbaycan Neft Fondunun rəhbəri Şahmar Mövsümov bildirib ki, EİTİ Azərbaycan üçün cəzbediciliyini itirib.

Azərbaycanda EİTİ-nin proqram koordinatoru olan Mövsümov əlavə edib ki, EİTİ-dən çıxmaq haqqında qərara baxılır, belə ki, bu təşkilat “öz strategiyasını dəyişib”.

“Əvvəllər EİTİ-nin strategiyası şəffaflığın təmin edilməsinə yönəlmişdisə, indi o, QHT-lərin maraqlarının müdafiəsi funksiyasını yerinə yetirir”, deyə Mövsümov bildirib. Onun sözlərinə görə, təzyiqə baxmayaraq, Azərbaycan öz prinsipini dəyişdirmək niyyətində deyil.

* Neft, qaz və mədən sahələrində şəffaflıq standartlarını müəyyən edən EİTİ təşəbbüsü 2002-ci ildə Yohannesburqda Sabit İnkişaf üzrə Dünya Sammitində irəli sürülüb. Bu təşəbbüs yerli və xarici şirkətlərin ödədikləri vəsaitləri, hökumətlərin isə aldığı vəsaitləri açıqlamasını nəzərdə tutur. Azərbaycan təşəbbüsə qoşulduğunu 2003-cü il iyunun 17-də Londonda EİTİ-nin ilk beynəlxalq konfransında elan edib. -03D-