Bakı Gəmiqayırma Zavodu iki gəmi-bərənin inşası üçün sifariş alıb

 “Azərbaycan Xəzər Dəniz Gəmiçiliyi” QSC Bakı Gəmiqayırma Zavoduna iki ədəd gəmi-bərənin inşasını sifariş edib.

Gəmiçilik yeni Ro-Pax/Bərə tipli gəminin konsepsiyasının hazırlanması üçün bir neçə tanınmış layihə-konstruktor büroları ilə iş aparıb və nəticədə Odessa Dəniz Mühəndisliyi Bürosunun hazırladığı təklif üzərində dayanıb.

Gəmiçilik son 1 ildən artıq müddətdə həm vaqon, həm də TİR götürmək imkanına malik unikal gəmi konsepsiyasının hazırlanması üçün bu büronun aparıcı mütəxəssisləri ilə uzunmüddətli texniki müzakirələr aparıb və Xəzər dənizində suyun səviyyəsi, yanalma körpülərinin maksimal imkanları nəzərə alınaraq, 100 sərnişin, 56 vaqon və ya 50 yük maşını (TİR) tutumlu Ro-Pax/Bərə tipli gəminin eskiz və texniki layihəsi hazırlanıb. 

2 ədəd Ro-Pax/Bərə tipli gəminin tikinitisi Bakı Gəmiqayırma Zavodu tərəfindən 132 mln. AZN məbləğində qiymətləndirilib.

Son 3 ildə 15 yeni gəmi, o cümlədən 1 ədəd Xəzərdə ən böyük yedək-təchizat gəmisi, 8 ədəd 5,500 ton yük götürmə qabiliyyətli quru yük gəmisi, 1 ədəd 13,000 tonluq tanker, 1 ədəd təchizat gəmisi, eləcə də Bakı Gəmiqayırma Zavodu MMC-də inşa edilmiş 1 ədəd liman-yedək və 3 ədəd sərnişin gəmisi Gəmiçiliyin balansına qəbul edilib.

Hazırda Gəmiçiliyin donanmasında 13 gəmi-bərə, 2 Ro-Ro tipli gəmi var. Donanmada mövcud olan 13 gəmi-bərədən 7-i 28 vaqon tutumuna, 6-ı isə 52-54 vaqon götürmə imkanına malikdir.

Gəmiçilik qeyd edib ki, ötən ilin müvafiq dövrü ilə müqayisədə 2016-cı ilin 9 ayı ərzində Gəmiçilik tərəfindən Transxəzər dəhlizi üzrə daşınan vaqonların sayında 14%, TİR-lərin sayında isə 3 dəfədən çox artım qeydə alınıb.

Bakı Gəmiqayırma Zavodu “Qaradağ” sənaye parkına rezident qəbul edilib və gəmi tikintisi üçün bütün növ malların idxalı üzrə ƏDV və gömrük rüsumlarından azad edilib. 08D