Balıq və dəniz məhsulları idxalı azalıb

2014-cü ildə Azərbaycana $8 484,6 min məbləğində 13 min ton balıq, xərçəngkimilər və molyuskların idxalı bəyan edilib. 2013-cü illə müqayisədə idxal çəki ifadəsində 0,5% artıb, deyə Gömrük Komitəsi bildirir.

Ötən il bir ton balıq Azərbaycan gömrüyündə orta hesabla $652,6-a sənədləşdirilib. Bu, öncəki ildəkindən 1,7% çoxdur. Balıq konservləri idxalı 3929 ton olub. Bu, 2013-cü illə müqayisədə 821 ton və ya 31,7% azdır. Ötən il konservləşdirilmiş balığın bəyan edilən qiyməti 1226,4$/t olub. 2013-cü ildə balıq konservləri gömrükdə $277 baha “qiymətləndirilib”.

Maraqlıdır ki, 2013-cü ildə balıq  dəniz məhsullarının rəsmi idxalı 17 654 ton olub. Dövlətstatkom Kənd Təsərrüfatı Nazirliyi yanında Dövlət Baytarlıq Nəzarəti Xidmətinə istinadən bildirir ki, idxal 20 177 ton olub. Bu, DGK-nın göstərdiyindən 14,3% çoxdur. 

DSK-nın ev təsərrüfatlarının büdcəsinin tədqiqi əsasında hesablamasına görə, 2013-cü ildə bir nəfərə balıq istehlakı 7,1 kq olub. Hesab edilir ki, bu rəqəm bir qədər şişirdilib. Çünki balıq ovunun dəqiq hesablanması yoxdur. Balıq ovu kvotası haqda məlumatlar da etibarlı sayılmır.

Ötən il ödənişli əsasla verilən icazə əsasında dövlət tərəfindən
nəzarət edilən balıq ovu 880,6 ton təşkil edib. Bu, kvotadan 414,6 ton azdır. Eyni zamanda, hökumət bütövlükdə təxminən 195 mln manat həcmində dəyərləndirilən
50,1 min ton balığın tutulması barədə məlumat verir.