Bentonit istehsalçısı yenidən rentabelli olur

Azərbaycanın aparıcı bentonit gili istehsalçısı olan “AzRosPromİnvest” MMC 2014-cü ildəki ziyanlı fəaliyyətdən sonra yenə rentabelli olur.

«Satış həcmi artıb, alıcılarla sazişlərin valyuta strukturunu dəyişəndən sonra rentabellilik əldə edilib», deyə SC-nin maliyyə direktorunun müavini, “Daş Salahlı Bentonit”in İdarə Heyətinin sədri Yaşar Qurbanov Turan-a bildirib.

Onun sözlərinə görə, bentonit gili və tozunun əsas alıcıları Rusiya və Belarusda neft və metallurgiya hasilatçılarıdır. Azərbaycanda bentoniti SOCAR alır. Xarici neft şirkətləri bentoniti xaricdən alır.

2015-ci ilin 5 ayında Azərbaycanda 7 425 ton bentonit istehsal edilib. Bu, ötən ilin eyni dövründəkindən 67,4% azdır. Dövlətstatkoma görə, anbarlarda 41 min ton məhsul var.

İlin I rübündə Azərbaycandan 8,3 min ton bentonit ixrac edilib. Gömrük Komitəsinin məlumatına görə, Belarusa (272 ton) məhsul $213-a, Rusiyaya (8 034,8 ton) $65-a satılıb. “AzRosPromİnvest” MMC-nin əsas rəqibləri Yunanıstan və Hindistan istehsalçılarıdır.

2014-cü ildə Azərbaycanda 84,4 min ton bentonit istehsal edilib. Bu, 2013-cü ildəkindən 13,6% azdır. 78,8 min ton məhsul ixrac edilib, gəlir $5,5 mln olub.

Bentonit tozundan bir sıra sənaye sahələrində, o cümlədən dəmir filizi istehsalında, şərabçılıq, tikinti, kosmetologiya və s istifadə edilir.

“AzRosPromİnvest” “Daş Salahlı Bentonit” (50%) və «Компания Бентонит» (50%) MMC-nin birgə müəssisəsidir. Rusiya təsisçisi Daş Salahlıda bentonit hasilatı və istehsalına $26 mln vəsait qoyub. Müəssisənin illik istehsal gücü ildə 70 min ton bentinit məhsuludur. 08B