Bu gün Bakıda yol hərəkəti təhlükəsizliyi üzrə beynəlxalq seminar keçirilib

Bu gün Bakıda Nəqliyyat Nazirliyi və Asiya İnkişaf Bankı yol hərəkəti təhlükəsizliyi üzrə beynəlxalq seminar keçirib. Tədbirin əsas ideyası bu olub ki, iqtisadiyyatın, paralel olaraq infrastrukturun inkişafı insanın təhlükəsizliyini önə çıxarmalıdır. 

Nəqliyyat nazirinin müavini Musa Pənahov, Niderlandın Bakıdakı səfiri Aryen Uyterlıinde və AİB Azərbaycan təmsilçiliyinin rəhbəri Olli Norojono yol hərəkəti təhlükəsizliyinin əhəmiyyətini vurğulayıb və Azərbaycan hökumətinin bu istiqamətdə işini müsbət qiymətləndiriblər. 

Azərbaycanda yol hərəkəti təhlükəsizliyinin təşkili üzrə strategiya və 5 illik plan qəbul edilib. Avtomobil yollarında tələb olunan sayda yol işarələri qoyulub. Yollar və avtomagistralların bir hissəsi işıqlandırılır, amma yol-nəqliyyat hadisələrinin səviyyəsi yüksəkdir. YNH-nin üçdə biri yüksək sürət nəticəsində baş verir, deyə NN-nin təmsilçisi Kazım Şərifov bildirib. Bu hadisələr zamanı ölüm faktları da azalmır. 

Yol Təhlükəsizliyi Tədqiqatları Hollandiya Universitetinin nümayəndəsi Marjan Hagenzieker yol təhlükəsizliyinin yüksəldilməsi üzrə Hollandiya təcrübəsindən danışıb. Onun sözlərinə görə, dövlət və ictimaiyyətin tədbirlərinə baxmayaraq, bu sahədə ciddi uğur yoxdur. Azərbaycan da Niderland kimi YNH zamanı ölüm hadisələrinə görə «qırmızı xətdə»dir. Eyni zamanda, sürət həddinin azaldılması, yol infrastrukturuna, avtonəqliyyat vasitələrinə tələblər sayəsində müəyyən uğurlar var. 

Seminarda yol təhlükəsizliyinin yüksəldilməsinin müxtəlif aspektləri - insan amili, yolların işıqlandırılması, naviqasiya cihazlarından istifadə ilə bağlı diskussiyalar olub. 

Qeyd edilib ki, yol infrastrukturu obyektləri tikilən zaman təkcə mühəndis zərurəti yox, hərəkət iştirakçılarının aktivlik maraqları da nəzərə alınmalıdır. Məsələn, bu gün Bakıda onlarla yerüstü və yeraltı keçidlər tikilib. Piyadalar onların bir çoxlarının yaşayış, sənaye və sosial-mədəni obyektlərdən yüzlərlə metr aralı olmasından narazıdır. 08C