İki şirkət «Gilan Holding» şirkətlər qrupunun adını qəbul edib

İki şirkət “Gilan” firma adını qəbul edib. Bu şirkətlər bundan öncə də bu və ya digər formada “Gilan Holding” şirkətlər qrupuna aid olub.

 Kommersiya hüquqi şəxslərin dövlət reyestrinə görə,  “UEİ Claim and Valuation” MMC adını  “Gilan Real Estate Valuation Services” ilə əvəzləyib. Azərbaycanda UEI-ya bağlı digər şirkətlər də var: “UEI Transport”, “UEI Trucks”, “Auto UEI Azerbaijan”.

Digər şirkət (“First Beverage” MMC) “Gilan Real Estate Management” adı altında fəaliyyət göstərir.

Qeyd edək ki, “Dövlət qeydiyyatı və hüquqi şəxslərin dövlət reyestri haqqında” qanuna zidd olaraq sözügedən şirkətlər mətbuatda adlarını dəyişdiklərini açıqlamayıblar. Normativ-hüquqi aktlara görə, hüquqi şəxslərin dövlət reyestrinin məlumatlarında dəyişikliklər Vergilər Nazirliyinin mətbu orqanında açıqlanmalıdır. “Gilan Holding”in hüquqşünası Vüsal Dadaşov Turan-a bildirib ki, holdinqin firma adını daşıyan şirkətlərin hamısı ona aid olmaya bilər. O, adı çəkilən iki şirkətin holdinqə aidiyyatını dəqiqləşdirməyib. “Şirkətin bilavasitə holdinqə aid olması üçün qurumlar arasında iktərəfli müqavilənin olması lazımdır. Hazırda  “Gilan Holding” maliyyə-sənaye qrupuna təxminən 40-50 şirkət aiddir”, - holdinq nümayəndəsi bildirib. O həmçinin qeyd edib ki, holdinqə birbaşa və ya dolayısı ilə aidiyyatı olan bir neçə yüz şirkətdən az hissəsi fəaliyyət göstərir.08B