QK emitentlərinin hesabatlarına yeni tələblər

Bu ildən qiymətli kağız emitentləri illik hesabatları yeni qaydalarla hazırlayacaq, təqdim edəcək və açıqlayacaq. Qiymətli Kağızlar üzrə Dövlət Komitəsi (http://goo.gl/nHkrmC) «Emitentin idarəetmə hesabatlarına dair tələblər haqqında Qaydalar”ı təsdiq edib.

Əvvəlki hesabat formasından fərqli olaraq, emitentlər şirkətlər qrupunun bir hissəsi olduğu təqdirdə daxil olduqları şirkətlər qrupu haqda informasiyanı da açıqlamalıdır. Fəaliyyət sahəsi, təklif edilən mal və xidmətlər, emitent lisenziya və ya icazəyə malik olduqda, onlar üzrə  fəaliyyət növləri və qüvvədə olma müddətləri, emitentin işçilərinin sayı və onun rüblük dinamikası, Müşahidə Şurası, İdarə Heyəti, Audit Komitəsi (olduqda) üzvlərinin adı, soyadı, atasının açıqlanması da tələblərə daxil edilib.

2016-cı ilə kimi 10%-dək paya malik emitentlərin soyadı, adı, atasının adı; hüquqi şəxsin adı, olduğu yer və s məlumatları açıqlamalı idisə, indi bu göstərici 5%-ə endirilib. Emitentin başqa şirkətlərin kapitalında payı barədə informasiya da bu sxemlə təqdim edilir.

Qiymətli kağızları kütləvi təklif edilmiş şirkətlər yarımillik hesabatlar təqdim edir.

İllik hesabat hər başa çatmış təqvim ilinin nəticələri üzrə hazırlanmalı və emitent məhdud məsuliyyətli cəmiyyət olduqda növbəti ilin ilk 4 ayı ərzində, səhmdar cəmiyyəti olduqda isə, növbəti ilin ilk 6 ayı ərzində səhmdarların illik ümümi yığıncağı tərəfindən təsdiq edilməlidir.

Hesabatlar Qiymətli Kağızlar üzrə Dövlət Komitəsinə təqdim edilməlidir. 

Xatırladaq ki, QKDK bu günlərdə ilk dəfə qiymətli kağız emitentlərinin hesabatının açıqlanmasının vahid elektron platformasını təqdim edib. Hesabatlar www.disclosure.az saytı vasitəsilə açıqlanmalıdır. 08D