İqtisadiyyat və Sənaye Nazirliyinin ştatı 50 vahid artırılıb

 Dövlət başçısı İlham Əliyev İqtisadiyyat və Sənaye Nazirliyi haqda Əsasnaməni fevralın 20-də təsdiq edib. Sənədə əsasən, bu qurumun rəhbərinin müavinlərinin sayı 3-dən 5-ə artırılır. 

Prezidentin fərmanı ilə yeni nazirliyin əməkdaşlarının sayı 334-dən 384-ə artırılıb. Nazirliyin strukturuna daxil olan təşkilatların strukturu dəyişməz qalıb. İSN-də cəmi 692 nəfər çalışacaq. 

Əsasnaməyə görə, İSN Azərbaycan Respublikasının iqtisadi siyasətini, iqtisadi və sosial proqnozlarını işləyib hazırlayan, iqtisadiyyatın ayrı-ayrı sahələrinin, o cümlədən sənayenin inkişafı, ölkə iqtisadiyyatında struktur və innovasiya, investisiya fəaliyyəti, investisiyaların cəlb edilməsi, qoyulması və təşviqi, sahibkarlığın inkişafı, sahibkarlığa dövlət dəstəyi, rəqabətin qorunması, inkişafı və təşviqi, haqsız rəqabətin aradan qaldırılması, istehlakçıların hüquqlarının qorunması, daxili ticarət, xarici iqtisadi və ticarət əlaqələri, regionların sosial-iqtisadi inkişafı və mənzil-kommunal təsərrüfatı sahələrində dövlət siyasətini və tənzimlənməsini həyata keçirən mərkəzi icra hakimiyyəti orqanıdır. 

Bakı Biznes Mərkəzi İSN strukturundan çıxarılıb. Nazirliyin strukturuna mərkəzi aparat, regional şöbələr (86 işçi), Sahibkarlığa Kömək Milli Fondu (50 işçi), Antiinhisar Siyasəti və İstehlakçıların Hüquqlarının Müdafiəsi Dövlət Xidməti (172 işçi) daxildir. 

İSN yanında İqtisadi Tədqiqatlar ETİ var. 

Qanunvericiliyə əsasən, İSN sahibkarlıq subyektlərinə verilən lisenziyaların vahid reyestrini aparır. 08D