“İşsizlərlə bağlı statistika təcili olaraq açıqlanmalıdır”, - Qubad İbadoğlu

Bakı/09.07.20/Turan: “Azərbaycanda  rəsmi işsizlik statistikası həmişə gerçək vəziyyəti təhrif edib. Azərbaycanda məşğulluq orqanlarında qeydiyyatdan keçmiş işsizlərin statistikasını indiyə qədər açıqlamayan Əmək və Əhalinin Sosial Müdafiəsi Nazirliyi son zamanlar diqqəti  ilin əvvəlindən 110 min gizli iş yerinin leqallaşdırılmasına cəlb etməkdədir”. Bunu “Turan”la söhbətində İqtisadi Tədqiqatlar Mərkəzinin ekserti Qubad İbadoğlu deyib.

Onun sözlərinə görə, ağardılmış iş yerləri iqtisadiyyatda müsbət meyl kimi dəyərləndilir. Əslində iş yerlərinin ağardılması başqa səbəblərdən baş verib.

“Aprel və may aylarında muzdlu işçilərin maaşlarının müəyyən hissəsinin müddətli kompensasiyası proqramının həyata keçirilməsi müzakirə olunarkən bu proqramdan yararlanmaq istəyən işəgötürənlər pandemiyanın ilk dövründə qeyri-leqal iş yerlərinin məşğulluq sistemində qeydiyyatına start verdilər. Amma onlar kompensasiya almağa nail ola bilmədilər, çünki, hökümət yalnız martın 1-ə qədər qeydiyyatda olan muzdlu işçilərin maaşlarının müəyyən hissəsini kompensasiya etməyə qərar verdi.

Onun sözlərinə görə, digər tərəfdən rəsmi uçotda olmayan işçilər elektron icazə sistemində qeydiyyata dura bilmirdilər. O qeyd edib ki, qeyri-leqal olan işçilərinin işə çıxmasını təmin etmək istəyən işəgötürənlər işçilərlə rəsmi əmək kontraktı imzalayıb, sonra da icazə portalından qeydiyatdan keçiriblər. Ekspert hesab edir ki, bu da gizli məşğulluğun leqallaşdırılmasına dəstək oldu.

“Ən azı bu iki səbəbdən gizli məşğulluqda müsbət tendensiya yarandı. Amma bu da qısa müddətdə müşahidə olundu və davamlı olmadı. Belə olan halda da bu dəyişikliyin geri dönməsi və gizli məşğulluğun pendemiyadan əvvəlki səviyyəsinə qayıdacağı gözlənilir. Məhz buna görə nazirlik tez bir zamanda məşğulluq və işsizlik statistikasına dair məlumatları, ilk növbədə də aprel, may və iyun aylarında məşğulluq orqanlarında qeydiyyatdan keçmiş işsizlərin statistikasını dövrü olaraq açıqlamalıdır”, - deyə o bildirib. –71В-