Məmurlar hakimiyyətə daha yaxındır

Ölkə prezidentinin sərəncamı ilə mədəniyyət, gənclər, idman işçilərinin əmək haqları artırılıb. 

Bundan əvvəl DİN, o cümlədən Daxili Qoşunların, MTN, FHN, Dövlət Mühafizə Xidməti, Penitensiar Xidmət, Ədliyyə Nazirliyi Baş Tibb Xidməti, Dövlət Sərhəd Xidməti, Gömrük Komitəsi işçilərinin maaşı artırılmışdı. 

Büdcə sahəsində əmək haqqı və vəzifə maaşları 10% artırılıb. 

Fəxri ad sahiblərinin təqaüdləri də artırılıb: «xalq» xadimləri 100, «əməkdarlar»  60 manat artıq alacaq. 

Maliyyə naziri Samir Şərifov büdcə müzakirəsi zamanı bildirmişdi ki, bu il 700 min büdcəçinin maaşı artırılacaq. Bu günlərdə pensiya və müavinətlərin baza hissəsi artırılacaq. Bu artımlara 180 mln manat xərclənəcək, deyə Maliyyə Nazirliyində Turan-a bildiriblər. 

Əvvəllər məlumat vermişdik ki, bu artımlar prezident seçkiləri ilə əlaqədardır. Ölkədə pensiyaların baza hissəsi 2006-cı ildən 85 manatdır. Yaşayış minimumu isə (1 yanvar 2013-cü il üçün 116 manat) hər il hesablanır. 

Dövlət başçısı mütəmadi olaraq hakimiyyətin dayağı olan güc strukturlarının maaşını (sonuncu dəfə 2011-ci il dekabrın sonunda) artırır. Bundan başqa, FHN, Vergilər Nazirliyi, Gömrük Komitəsi və DİN-in büdcədənkənar fondu var. Cərimələrin 25%-i ora köçürülür (qanunsuz cərimələrə stimul). 

Nazirlər Kabinetinin 13 dekabr 2011-ci il tarixli qərarı ilə dövlət büdcəsindən maliyyələşən təşkilatların vahid tarif cədvəəli 19 kateqoriyadan ibarətdir –1-ci kateqoriya 93,5 manat, yüksək kateqoriya 644 manat. 

Hökumət və dövlət məmurlarının maaşı daha yüksəkdir. Mədəniyyət Nazirliyində icraçı direktorr 1210 manat, aparat rəhbəri 913 manat, baş mühasib 847 manat, sektor müdiri 800 manat, baş məsləhətçi 726 manat, aparıcı məsləhətçi 605 manat, məsləhətçi 550 manat alır Əlavələr hesaba alınmır. 

Turan artıq yazmışdı ki, inflyasiya və dövlət büdcəsinin icrası gedişi maaşları 10% artırmağa imkan verir. Hətta müəllim və tibb işçilərinin maaşları və pensiyaların artımı barədə şayiələr ərzağın qiymət artımına səbəb olacaq. 

Azərbaycanda maaş, pensiya və ya müavinət artımı ictimai monitorinq və ya strateji araşdırma əsasında baş vermir. Bunlar, adətən, siyasi hadisələrə bağlı olur. Məsələn, gələn ilin dövlət büdcəsi deputatlara təsdiqə bir həftə qalmış verilir, QHT-lərlə razılaşdırılmır. 

Dövlətstatkoma görə, ölkədə ən az maaş alanlar səhiyyə (164 manat) və təhsil (283 manat) işçiləridir. 

İqtisadi sahələrdə hasilat sənayesi, aviatorlar, rabitəçilər, maliyyə və sığorta işçiləri və inşaatçılar daha çox maaş alır. --17D—