Özələşdirmədə rəqabət yaranıb

Əmlak Məsələləri Dövlət Komitəsinin oktyabrın 11-də keçirdiyi hərracda 35 dövlət əmlakı özəlləşdirilib. Bunlardan 5-də ciddi rəqabət də olub. Yəni, bir obyektə bir neçə müştəri çıxıb.

Komitənin mətbuat xidmətində Turan-a deyiblər ki, rəqabətli hərraclar Bakının Nəsimi, Xətai rayonlarında və Sumqayıt şəhərində yerləşən istifadəsiz qeyri-yaşayış sahəsi və obyektlərin üstündə olub.

Sumqayıt şəhərində yerləşən emalatxana və Bakının Nəsimi rayonundakı 5 mərtəbəli binanın zirzəmisi (16,5 kv.m) üçün 2 sifarişçi qeydə alınıb. Nəsimi rayonundakı eyni binanın 24,8 kv.m-lik zirzəmisi üçün 3 sifarişçi, 40,2 kv.m-lik digər zirzəmiyə isə 2 sifarişçi özəlləşdirmək üçün iddialı olub. Digər 2 sifarişçi isə Xətai rayonunda yerləşən 9 mərtəbəli binanın 37,8 kv.m-lik zirzəmisini hərrac vasitəsilə əldə etmək üçün elektron sifariş verib.

Ümumiyyətlə, hərraclarda 2 səhmdar cəmiyyətinin  (“Saxsı qablar” ASC və “Beyləqan Dəmir beton” ASC)  30%-lik səhm zərfləri, 20 kiçik dövlət müəssisə və obyekti və 13 nəqliyyat vasitəsi özəlləşdirilib.

Oktyabrın 11-də baş tutmuş hərracda satılan görə dövlət əmlakının özəlləşdirilməsindən dövlət büdcəsinə 1 milyon manatdan çox vəsait köçürüləcək.

Növbəti hərrac oktyabrın 25-də keçiriləcək. Hərraca  84 dövlət əmlakı çıxarılıb. 08D