Prezident Əliyev və BP rəhbəri AÇG blokunun işlənməsi üzrə planları müzakirə edib

Prezident İlham Əliyev BP şirkətinin prezidenti Robert Dadlini qəbul edib.

Görüşdə Azərbaycan ilə BP şirkəti arasında uzun illər uğurlu və qarşılıqlı faydalı əməkdaşlığın həyata keçirildiyi vurğulanıb. Görüş zamanı 2024-cü ildən sonra “Azəri-Çıraq-Günəşli” yatağının işlənilməsi ilə bağlı məsələlər müzakirə edilib, deyə dövlət başçısının saytı məlumat verir.

Qeyd edilib ki, bu yatağın gələcəkdə işlənilməsində xarici şirkətlər maraqlıdırlar. Yatağın gələcəkdə uğurla işlənilməsi xarici şirkətlər tərəfindən çoxmilyardlı investisiyaların davam etdirilməsi, böyük həcmdə əlavə neft hasilatı, qarşıdakı illərdə də çoxsaylı yeni iş yerlərinin açılması üçün imkanlar yaradacaq.

Görüşdə  həmçinin “Cənub” qaz dəhlizinin yaradılması və “Şahdəniz-2” layihəsi ilə bağlı aparılan işlərdə əldə edilmiş irəliləyiş, BP şirkətinin “Şəfəq-Asiman” blokunda, Abşeron yarımadasının dayazsulu hissəsində həyata keçirdiyi işlər və BP-nin Azərbaycanın neft-qaz sənayesinin inkişafında iştirakının perspektivləri ilə bağlı məsələlər ətrafında da müzakirələr aparılıb.

Qeyd edək ki, AÇG-nin işlənməsi üzrə saziş 20 sentyabr 1994-cü ildə imzalanıb. Həmin il dekabrın 12-də Milli Məclis sazişi təsdiq edib. Sazişin müddəti 30 ildir.

Layihənin iştirakçıları bunlardır: BP (35,78%), Chevron (11,27%), ExxonMobil (8%), ONGC (2,72%), SOCAR (11,65%), Inpex Corp. (10,96%), ITOCHU Oil (4,3%), Statoil (8,56%), TPAO (6,75%).

Qeyd edək ki, blokdan 1997-ci ildən neft çıxarılır. İndiyədək 3 mlrd barrel neft hasil edilib. SOCAR geoloqlarının fikrincə, AÇG-dən daha 4 mlrd barrel neft hasil etmək olar. ВР bildirir ki, bunun üçün çoxmilyardlı investisiyalar lazımdır. SOCAR və BP blokun işlənməsi barədə razılığa gəlib.

Turan-ın məlumatına görə, PSA saziş bağlanması və MM-də təsdiqi AÇG üzrə ilk sazişin başa çatması deməkdir.

Yeni saziş nəyə lazımdır? Əvvəla, bu, xarici investisiya axını deməkdir. İkincisi, AÇG-də hasilat gələn onillikdən 24-25 mln ton səviyyəsində sabitləşəcək. Bu, ARDNF-yə sabit valyuta mədaxili üçün vacibdir.

Birinci saziş bitməmiş xarici şirkətlər yeni sazişə niyə maraq göstərir? 2025-ci ilə kimi enerji resursları ucuz olacaq. Yəni kəşfiyyata investisiyalar risklidir. 20 ildə AÇG dəqiqlikıə öyrənilib və ölkədə siyasi və iqtisadi risklər görmürlər. AÇG-yə qoyulan investisiyalar istənilən halda yaxşı dividend gətirəcək.

Turan xatırladır ki, yeni layihə üzrə AÇG-yə $8 mlrd qoyulmaldıır. “Azəri” yatağında daha bir iri hasilat platforması və sualtı infrastruktur tikilməlidir. Yeni platformadan ilk neft 2021-ci ilin əvvəlində çıxarılacaq.–12В--