Sabah Bakıda beynəlxalq Caspian Oil & Gas sərgisi başlayır

Sabah Bakıda ənənəvi beynəlxalq Caspian Oil & Gas sərgisi başlayır.

“23-cü dəfə keçirilməsinə baxmayaraq, sərgiyə maraq azalmır”, deyə, Iteca Caspian şirkətinin icraçı direktoru Fərid Məmmədov bugünkü mətbuat konfransında bildirib.

Onun sözlərinə görə, iştirakçıların 15%-i sərgidə ilk dəfə iştirak edir. Sərginin yeni iştirakçılar qismində isə Böyük Britaniya, Portuqaliya, Rumıniya, ABŞ və digər ölkələrin şirkətləri çıxış edirlər. Xarici iştirakçılar sərgi ekspozisiyası meydançasının 63,7%-i tutur.

Sərgi iyunun 1-4-də "Baku Expo Center"də keçiriləcək. Açılış mərasimində Azərbaycan Prezidenti İlham Əliyevin iştirakı nəzərə tutulub.

VIP-qonaqlar arasında ABŞ dövlət katibinin enerji diplomatiyası üzrə köməkçisi Robin Danniqan, Birləşmiş Krallığın Azərbaycandakı ticarət nümayəndəsi baronessa Emma Nikolson, Gürcüstanın energetika nazirinin müavini Mariam Valişvili, BP, Statoil, "Qazprom", "Özbəkneftqaz" və s şirkətlərin yüksək rütbəli nümayəndələri iştirak edəcək.

Sərgidə müxtəlif ölkələrdən şirkətlərin iştirak dinamikası

Caspian Oil & Gas beynəlxalq konfransı 2-3 iyunda Marriott Absheron otelində keçirləcək.

Konfransın işində 30-dan çox ölkədən 400 nəfərə yaxın nümayəndənin iştirakı gözlənilir. 40 nəfərdən çox natiq, o cümlədən müxtəlif ölkələrdən aparıcı ekspertlər, dövlət strukturlarının nümayəndələri və iri neft-qaz şirkətlərinin rəhbərləri ucuz neft qiymətləri fonunda enerji resurslarının hasilatı, idarə olunması və nəqli sahəsində əsas məsələlərlə bağlı məruzələrlə çıxış edəcəklər.

Konfransın gündəliyinə aşağıdakı mövzular daxil edilib: "Avropaya enerji təchizatının təmin edilməsində Azərbaycanın rolu", "Xəzərin qaz infrastrukturu: əsas layihələrin vəziyyəti və həyata keçirilməsi statusu", "Şahdəniz – 20 illik nailiyyətlər, gələcəyə baxış", "Neft-qaz layihələrinin maliyyələşdirilməsi", "Azərbaycanın energetika resurslarının genişləndirilməsi", "Neft-qaz sahəsində ekologiya və sənaye təhlükəsizliyinin təmin edilməsi" və s. --12В--