Sunniya Durrani-Camal Asiya İnkişaf Bankının Azərbaycandakı yeni ölkə direktoru təyin olundu

Sunniya Durrani-Camal rəsmi olaraq Asiya İnkişaf Bankının (AİB) Azərbaycandakı yeni ölkə direktoru vəzifəsinə başlayıb. O, bu vəzifədə 2021-ci ildən bəri həmin postu tutan Candice Mcdaganı əvəz edib. Durrani-Camal bu vəzifəyə 25 ildən çox peşəkar təcrübə ilə yanaşı, AİB-dəki 16 illik yüksək vəzifə təcrübəsini də gətirir. O, əvvəllər AİB-in Kambocadakı Regional Direktoru və Şərqi Asiya, Cənub-Şərqi Asiya və Sakit Okean üzrə Vitse-Prezidentin Baş Məsləhətçisi vəzifələrində çalışıb.

Durrani-Camal Kambocada Regional Direktor vəzifəsində işləyərkən, regional problemlərin həlli, davamlı iqtisadi inkişafın təşviqi və yoxsulluğun azaldılması üzrə strategiyaların hazırlanması və həyata keçirilməsində mühüm rol oynayıb. Baş Məsləhətçi kimi fəaliyyət göstərdiyi dövrdə, Şərqi Asiya və Sakit Okean bölgələri üzrə AİB-in yanaşmasını formalaşdıran əsas siyasət qərarlarına və strateji təşəbbüslərə təsir göstərib. Baş İqtisadçı olaraq, bankın layihələri və investisiyalarının daha geniş iqtisadi məqsədlərə uyğun olmasını təmin edən iqtisadi tendensiyalar haqqında vacib məlumatlar təqdim edib.

Durrani-Camal, həmçinin, Şərqi Asiya və Sakit Okean bölgələrində enerji və infrastruktur sahələrində iqlim maliyyələşdirməsi təşəbbüslərinin irəliləməsinə töhfə verib. Onun təcrübəsinin AİB-in Azərbaycandakı məqsədlərinin inkişafına əhəmiyyətli dərəcədə dəstək olacağı gözlənilir.

Azərbaycanın Asiya İnkişaf Bankı ilə əməkdaşlığı, nəqliyyat, enerji və sosial xidmətlər də daxil olmaqla, iqtisadi inkişaf və infrastrukturun təkmilləşdirilməsinə yönəlmiş genişmiqyaslı layihələri əhatə edir. 2023-cü ildə AİB, Azərbaycana dəstəyin davam etdirilməsini vurğulamaqla yanaşı, gələcək əməkdaşlığın miqyasına müəyyən dəyişikliklər etməyi nəzərdə tutan yeni əməkdaşlıq strategiyasının hazırlanmasına başlayıb.

1999-cu ildən AİB ilə əməkdaşlığa başladığı vaxtdan bəri Azərbaycan, ümumilikdə təxminən 5,2 milyard ABŞ dolları məbləğində yardım alıb. Bu vəsaitlər ölkənin həm dövlət, həm də özəl sektorlarında müxtəlif layihələrin həyata keçirilməsinə yönəldilib, Azərbaycanın iqtisadi dayanıqlığını və inkişaf perspektivlərini gücləndirib.