Taksit kartları sistemində Bank of Baku-nun Bolkartı liderdir

Bu il martın 1-i üçün aktiv kredit kartı sayı il ərzində 2 dəfə artaraq 1,01 milyona çatıb. Aktiv kartlarda bu kartların xüsusi çəkisi 17,3%-ə (bir il əvvəl 9,2%) çatıb.

Yanvar-fevralda kredit kartları ilə əməliyyatlar 2013-cü ilin eyni dövrü ilə müqayisədə 2,5 dəfə artaraq 2484 min, onların dövriyyəsi 66,3% artaraq 341 mln manat olub.

Son il yarım-iki ildə taksit kartları aktiv inkişaf edib. Bu kartlar müştəriyə ödənişi sonradan həyata keçirmək imkanı verir, banklar isə komissiyadan qazanır. Hazırda bazarda onların sayı 300-350 mindir.

Taksit kartları sistemində Bank of Baku-nun Bolkartı liderdir. Kredit kartlarının dörddə biri (210 min), taksit kartlarının yarıdan çoxu onun payına düşür. Onunla Albalı (Unibank), Worldcard (Yapı Kredi Bank), PayKart (Bank Respublika), Aykart (DəmirBank) rəqabət aparır.

Ekspertlər taksit kartlarının bir sıra müsbət və mənfi cəhətlərini qeyd edir. Müsbət cəhətlər bunlardır: mal və xidmət üçün istehlak krediti almağın asanlığı (hər dəfə banka müraciət edib sənədləşmə lazım gəlmir); krediti hissələrlə ödəmək mümkündür; nağd vəsait də çıxarmaq mümkündür. Mənfi tərəfləri isə kredit kartlarının sındırılması, istifadə edilməmiş vəsaitin oradan çıxarılması imkanı, alışdan imtina etdikdə pul vəsaitlərinin qaytarılması problemidir.

Əsas problem psixoloji tərəfdir - hüdudsuz imkan hissidir. Yəni 2 saata 2 min manatlıq limiti boşalda bilərsiniz. Bu vaxt müştərinin kredit qabiliyyətini izləməyin mümkün olmaması üzə çıxır. Məsələn, bir il əvvəl sizə 2 min manat ayırıblar. Son 6 ayda işsiz olmusunuz. Bu vaxt bank problemli kreditlərlə üzləşir.

Beynəlxalq praktikada bu sahəni tənzimləmək üçün müəyyən məhdudlaşdırıcı tədbirlər var. Məsələn, aktiv taksitlərin sayına limit, taksitin maksimal müddətinin məhdudlaşdırılması (hazırda 12 aydır), kart sahibin kredit qabiliyyətinin mütəmadi olaraq yenidən qiymətləndirilməsi.--15B—