Vətəndaş cəmiyyəti davamlı nəqliyyat sistemi siyasətinin formalaşması üzrə dialoq tərəfdarıdır

Bu gün Bakıda “Vətəndaş cəmiyyəti davamlı nəqliyyat sistemi siyasətinin formalaşması üzrə dialoq tərəfdarıdır” adlı konfrans keçirilib. Mövzunun aktuallığı paytaxtın ekoloji vəziyyətinə nəqliyyat vasitəsinin təsiri ilə bağlıdır. 2012-ci ildə Bakı atmosferinə 1,1 mln ton zərərli maddə atılıb. Bunun 850 min tonu (75%) avtonəqliyyat vasitələrinin payına düşür. 

Son on ildə yol-nəqliyyat infrastrukturu təkmilləşdirilsə də, avtonəqliyyat vasitələrinin ətraf mühitə təsiri azalmır. Görülən tədbirlər avtomobil yollarında gərginliyi azaltmayıb, çünki ictimaiyyətin rəyi nəzərə alınmayıb. «Ecolex» Mərkəzinin mütəxəssisləri belə düşünür.  

Dövlət Şəhərsalma və Arxitektura Komitəsinin nümayəndəsi Cahangir Qocayev bildirib ki, nəqliyyat problemlərinin həlli heç də hər zaman şəhərsalma imkanlarından asılı olmur: elə massivlər yaranıb ki, mühəndislər nəqliyyatın problemlərinin həlli üçün yeni fikir irəli sürə bilmir. Bu vaxt vətəndaş şüurluluğu sözünü deməlidir. «Avtomobil sükanı arxasına oturan tələbə və ya vətəndaş özünə sual verməlidir: piyada və ya avtobusla getmək daha yaxşı olmazmı? Qocayev hesab edir ki, Bakıda ekoloji təhlükəsiz velosiped, tramvay, trolleybus, elektrik qatarlarından istifadə etmək lazımdır. 

Texniki Universitetin professoru Sülhəddin Gözəlov bildirib ki, Bakıda avtonəqliyyat vasitələrinin sıxlığı yüksəkdir: 1 km2-ə 400 avtomobil düşür. Bakının xüsusiyyəti ondan ibarətdir ki, yol-nəqliyyat sistemi ərazinin 8-9%-i tutur. Vəziyyəti mürəkkəbləşdirən odur ki, son illər avtonəqliyyat vasitələrinin artması (2,3 dəfə) əhalinin təbii artımını keçib (11,2%). Avtomobillərin yaş strukturunun dəyişməsi isə müsbət haldır. Hazırda avtomobillərin dörddə birinin yaşı 5-i keçmir. 24,4% 5-10 il arasındadır. Problem ondadır ki, avtomobillərin yarısı ekoloji tələblər cəhətdən istismar vaxtını keçib. Atmosferə çoxlu işlənmiş qaz buraxılmasının səbəbi də budur. 

Konfransda müxtəlif təkliflər səslənib: avtomobil sahibliyinə görə vergi tutulması, nəqliyyatın hərəkətinin məhdudlaşdırılması və s. 08C