ВР AÇG-dəki yeni platformadan neft çıxardı, amma 2014-cü ildə hasilatı artıra bilməyəcək

28 yanvarda ВР-Azerbaijan şirkəti “Qərbi Çıraq” platformasından ilk nefti əldə edib. Bu barədə ВР-Azerbaijan-ın rəhbəri Qordon Birrel bildirib. 

“Çıraq-1” və “Dərinsulu Günəşli” platformalarının arasında yerləşən “Qərbi Çıraq” Chirag Oil Project layihəsi çərçivəsində həyata keçirilib. Layihəyə 2010-cu ilin martında qərar verilib. Platformanın tikintisinə $4 mlrd xərclənib. Daha $2 mlrd dəniz qazma işlərinə sərf edilib. 

ВР-Azerbaijan rəhbərinin sözlərinə görə, Chirag Oil Project layihəsi çərçivəsində 14 ilkin istismar quyusu qazılıb. “Onların heç də hamısı məhsuldar laya daxil edilməyib. Ona görə hasilatı 5-ci quyudan başladıq. Bu il 6 quyunu istismara verəcəyik”, - deyib Birrel. 

Turan agentliyinin birinci quyunun məhsuldarlığı barədə sualına cavab olaraq ВР-Azerbaijan rəhbəri deyib ki, quyunun debiti sutkada 3 min barreldir. 

“Hələlik başqa quyuların məhsuldarlığından danışmaq çətindir. Onlar işə düşəndən sonra nəsə demək olar. Mütəxəssislərimizin fikrincə, “Qərbi Çıraq”da sutkada 60 min barrel neft çıxarmaq olacaq”, - deyə Birrel bildirib. 

Amma “Qərbi Çıraq”ın istismara verilməsi ilə konsorsium bu il neft hasilatını artıra bilməyəcək. ВР-Azerbaijan AÇG blokunda iki hasilat platformasını texniki xidmətə dayandıracaq. "Söhbət "Mərkəzi Azəri" və "Qərbi Azəri"dən gedir. Onlarda hasilat bir neçə həftəliyə dayanacaq. 

AÇG-də pay iştirakı belədir: ВР - 35,78%, ARDNŞ - 11,65%, Chevron - 11,27%, Inpex - 10,96%, Statoil - 8,56%, Exxon – 8%, ТРАО - 6,75%, Itocu - 4,3% və ONGC - 2,72%. –12C--