Azercell gənc musiqiçilərimizə dəstək oldu

TeliaSonera şirkətinin dəstəyi ilə bu ilin fevral ayında Finlandiyanın məşhur Savonlinna Konservatoriyasının professor heyəti Bakıda qonaq olmuşdu. Onlar Bakı Musiqi Akademiyasının yuxarı kurs tələbələri üçün vokal, orkestr və simli alətlər üzrə master klass keçmiş, səfərlərinin sonunda isə azərbaycanlı həmkarları ilə birgə qala konsert vermişdilər. TeliaSonera təşəbbüsünü bununla tamamlamayaraq proqramın davamı kimi Bakı Musiqi Akademiyasının bir qrup tələbəsini Savonlinnada keçirilən yay məktəbinə göndərdi. TeliaSonera-nın dəstəyi, Azercell Telekom-un təşkilatçılığı ilə 8 azərbaycanlı tələbə bu nüfuzlu Konservatoriyada dünya şöhrətli musiqiçilər, dünyanın dörd bir yanından gələn istedadlı gənc tələbələrlə tanış oldular və təcrübələrini bölüşdülər. Həmin tələbələrdən üçü - Müşfiq Quliyev, Failə İsmayılova və Mustafa Mehmandarov öz təəssüratları ilə bizimlə bölüşdülər.

- Yəqin ki, tələbə yoldaşlarınız arasında Savonlinnanı görmək, dünya şöhrətli musiqiçilərdən dərs almaq istəyənlər, hətta bunu arzulayanlar çox olub. Necə oldu ki, yay məktəbində iştirak üçün məhz sizi seçdilər?

Müşfiq Quliyev:

- Bülbül adına orta ixtisas musiqi məktəbini bitirmişəm. Bakı Musiqi Akademiyasının üçüncü kurs tələbəsiyəm, 19 yaşım var. Ölkə üzrə keçirilən  bir neçə müsabiqənin qalibi olmuşam, eyni zamanda beynəlxalq festivallarda iştirak etmişəm. 2011-ci ilin dekabrında məlumat aldıq ki, 2012-ci ilin fevralında Finlandiyadan Azərbaycana musiqiçilər gələcək və master klass keçəcəklər.  Seçim turunda daha çox simli alətlərin təmsilçiləri iştirak edirdi. Yeganə pianoçu mən idim. Maraqlısı o idi ki, məşqlərimiz tətil vaxtına düşmüşdü. Tələbə yoldaşlarımız tətilə gedəndə biz məşqləri dayandırmadıq. Üstəlik həmin vaxt Bakıya güclü qar yağmışdı. Məşqlərdən qalmırdıq. İnanın ki, bizdən və gözətçidən başqa heç kim olmurdu.  Seçimlərdən əvvəl Finlandiyadan gələn violonçel ifaçısı Marko Ylönenlə master klassımız, məşqlərimiz oldu. Sonradan bildik ki, bu dərslərdə kimin seçimə layiq olduğunu nəzərdən keçirirlərmiş. Seçiləcəyimə ümidim az idi. Beyənlxalq festivallara simli alətlərin nümayəndələri tez-tez aparılsa da, pianoçulara belə şans düşmürdü. Fevralın 15-də isə qonaqlardan ibarət münsiflər Savonlinnaya kimlərin gedəcəyini elan etdi. Pianoçulardan  yalnız mən o siyahıya salınmışdım.

Mustafa Mehmandarov:

- Bakı Musiqi Akademiyasının dördüncü kurs tələbəsiyəm, 20 yaşım var. Skripkaçıyam, amma səfərdə həm də dirijor idim. Azercell-in dəstək olduğu bu layihənin ən böyük əhəmiyyəti ondadır ki,  dünyanın tanınmış musiqiçilərini Azərbaycana dəvət edərək onların burada konsertini təşkil etdi. Bu, həm ciddi maliyyə dəstəyi, həm də yaxşı təşkilatçılıq tələb edir. Layihənin növbəti mərhələsi kimi Azərbaycandan olan tələbələrin Finlandiyaya göndərilməsi də ciddi məqamdır. Seçim prosesi cox  maraqlı keçdi və nəticədə bizim qarlı günlərdəki zəhmətimiz itmədi. Sözün düzü, seçimə qədər layihə haqqında məlumatsız idik. Sadəcə onu demişdilər ki, Azercell Azərbaycana Finladiyadan müəllimlər dəvət edir və onlar bizə ustad dərsləri verəcəklər. Daha sonra prorektorluqdan məlumat gəldi ki, bəzi musiqiçilər xaricə təcrübə keçməyə göndəriləcək. Festivalın bədii rəhbəri Ralf Qathoni bizim tələbə orkesterinə özü dirijorluq edirdi. Seçim turu məhz bu məşqlərdə oldu. Düzdür, son ana qədər müəyyən şübhələr vardı, amma ümidimizi itirmirdik. Yaxşı ki,  bəzi musiqiçilərin seçilərək yay məktəbinə göndəriləcəyini  əvvəlcədən elan etməmişdilər. Bunun üç gün qalmış elan olunması o baxımdan  yaxşı idi ki, heç kim süni fəallıq göstərmədi. 

Failə İsmayılova:

-Skripkaçıyam. Bakı Musiqi Akademiyasını bitirmişəm. Amma seçimlər zamanı hələ 4-cü kursda oxuyurdum. Hazırda Filarmoniyada simfonik okrestrdə çalışıram. Seçim zamanı Musiqi Akademiyasının Tofiq Aslanovun dirijorluğu altında olan tələbə orkestrində idim. Bizə dedilər ki, fevralda Finlandiyadan gələn musiqiçilərin konserti olacaq. Qonaqların gəlişi üçün nəzərdə tutulan konsertə hazırlıq prosesi başladı.. Konsert bitəndən sonra bizim orkestrdən yalnız mənim və iki solistimizin adını çəkdilər. Mən şokdaydım. Finladiyada olmağı, orada təhsil almağı çox arzulayırdım. Ona görə eşidəndə çox sevindim. Bu şansı yaratdığına görə TeleiaSonera şirkətinə təşəkkürümü bildirirəm.

 - Avqustun 9-dan 21-nəqədər  Savonlinnada oldunuz. İki həftəyə yaxın davam edən səfər proqramınızla bağlı təəssüratlarınızı bilmək çox maraqlı olardı.

Müşfiq Quliyev:

- Xüsusi qeyd edim ki, səfərdə təşkilatçılıq əla səviyyədə idi. Qaldığımız mənzil çox rahat və Savonlinnaya çox yaxın idi. Mənzilimizlə Savonlinnanı bir küçə ayırırdı. Səfərin il iki günü dincəldik. Daha sonra dərslər başladı. Birinci fərdi dərslər keçməyə başladıq. Pianoçulara tanınmış musiqiçi Paul Rivinus dərs keçirdi. Onun dərsləri ən yaddaqalan dərslər idi.

Mustafa Mehmandarov:

- Savonlinna ayrıca bir şəhərdir. Buradakı musiqi akademiyası yalnız yayda işləyir.  Bu şəhərdə keçirilən festival çox yaddaqalan oldu. Qayğı və diqqət bizi daha da ruhlandırdı. Əlimizdən gələni etdik ölkəmizi bu festivalda layiqincə təmsil edək. Qarşılanma və yerləşdirilməmiz əla oldu. Yeri gəlmişkən, festivala qatılan ölkələrdən yeganə Azərbaycan təmsilçilərinə yüksək səviyyədə qayğı göstərilirdi. Bu da Azercell-in proqrama necə ciddi yanaşdığını göstərirdi. Bu festivalda iştirak etməklə beynəlxalq təcrübə ilə tanışlıq imkanı qazandıq. Bu tip festivallara qatılmaq bizim tələbələrə çox gərəklidir. Müəllimlər bizdən razı idi. Çünki tapşırıqlarını dərhal və yüksək səviyyədə yerinə yetirirdik. Festivalda yalnız Qara Qarayev və Fikrət Əmirova görə 25 nəfərdən ibarət orkester yığdılar. Hətta bu orkestrə müəllimlər də qoşuldu. Onlar da Qara Qarayevlə, Fikrət Əmirovun əsərlərinə heyran qalmışdılar.

Failə İsmayılova:

- Təşkilatçılıq çox yüksək səviyyədə idi. Bu cür qayğı bizi stimullaşdırırdı. Mən səhər saat yeddidən axşam on birə kimi məşq edirdim və bundan xüsusi bir zövq alırdım. Məşğul olduğum qrupda müxtəlif  ölkələrdən gənc musiqiçilər vardı. Müəllimimiz amerikalı Poul Koletti idi. Konsertdə çalacağımız əsərin məşqini məhz bu müəllim həyata keçirəcəkdi. Məşqlər çox ciddi və professional şəkildə keçirilirdi. Dərslər altı gün davam etdi. Yerdə qalan günlər konsertlərdə iştirak edirdik. Məşqlərdə çalacağımız musiqinin mətnini öyrənir, daha sonra həmin musiqini birgə ifa edirdik. Hər gün iki saat dərs keçirdik. Orada kosertlərə bizim ölkədən fərqli olaraq tamaşaçıların böyük marağı var. Biz kilsədə, zalllarda və iri salonlarında konsert verirdik. Bizə həm yaxşı dərs keçir, həm xoş münasibət göstərirdilər. 

Mustafa Mehmandarov:

- Azercell çox maraqlı bir layihəyə imza atdı x. Bizə yaradılan şərait, imkanlar – hər şey yüksək səviyyədə idi. Təşkilatçılığa söz ola bilməzdi. Azercell-ə həqiqətən də minnətdarıq. 

Müşfiq Quliyev:

- Yay tətilimizi məhsuldar keçirdik. Dincəlmək bir tərəfə qalsın, bizim orada konsertlərimiz oldu. Dünyanın aparıcı musiqiçilərini, müəllimlərini, dünya musiqisinin səviyyəsini gördük. Gördük ki, Avropa nələr edir, biz nələr edirik.   Azercell-in bu yay məktəbi hər il olsa, musiqiçilərimizin səviyyəsində inkişaf olar. Bunu tək Azercell yox, başqa şirkətlər də etməlidir. Bu yolla həm musiqimizin səviyyəsi artar, həm də Akademiyanın tələbələrinin. Biz orada həm dünya şöhrətli professorlarla tanış olduq, həm də bəzi təkliflər aldıq. Dünyagörüşümüz çox artdı. 

Failə İsmayılova:

- TeliaSonera vəAzercell bizə xəyal edə bilmədiyimiz imkanı yaratdı. Yəqin ki, bu layihəni həyata keçirəndə Azərbaycan gənclərinin inkişafı əsas məqsəd idi.  Kanservatoriyada oxuduğum dörd il ərzində ən işıqlı xatirəm bu olacaq…