Bakıda Beynəlxalq Animasiya Festivalı

Bakı/18.10.18/Turan: Nizami Kino Mərkəzində 1-ci Bakı Beynəlxalq Animasit Festivalı - ANİMAFİLM-ə həsr olunmuş mətbuat konfransı keçirilib.

Festivalın təşkilatçısı və rəhbəri Rəşid Ağamalıyev konfransı açarkən toplaşanları salamlayıb, iştirakçıları təqdim edib və oktyabrın 19-dan 21-nə qədər Bakının müxtəlif yerlərində keçiriləcək festivalın proqramını elan edib.

Proqrama sərgi, yerli və xarici istehsal olan animasiya filmlərinin nümayişi, həmçinin uşaqlar üçün kukla tamaşaları daxildir. Ən əsası isə, festival çərçivəsində keçiriləcək müsabiqədə 63 ölkədən 48 film, həmçinin 15 ssenari təqdim ediləcək.

Ağamalıyev həm animasiyanın uşağın bir şəxsiyyət kimi formalaşmasında və inkişafında əhəmiyyətini, həm də animasiya festivallarının əhəmiyyətini qeyd edib: "Bizim əsas vəzifəmiz Azərbaycanda bu sahəni inkişaf etdirməkdir. İstəyirik ki, uşaqların inkişafında böyük rol oynayan daha çox keyfiyyətli multiplikasiya filmi çəkilsin. Amma, təəssüf ki, son vaxtlar bizdə belə animasiya çəkilmir. Biz dostlarımızla birlikdə "Azərbaycan animasiyası" adlı kitab yazmağa qərar verdik. Sabah kitabın təqdimatı olacaq. Bu, iki ilimizi aldı. İndi kitab çapdan çıxıb və yaxın günlərdə satışda olacaq. Bundan başqa, biz çox sayda dəyərli material tapmışıq, onları nəinki kitaba daxil etmək, həm də oktyabrın 19-da keçiriləcək sərgidə ReAnimasiya adı ilə təqdim etmək qərarına gəldik".

Daha sonra Ağamalıyev sözü mətbuat konfransının iştirakçılarına verib.

Rəssam-animator Məsud Pənahi qeyd edib ki, yerli multiplikasiyanın reanimasiyaya ehtiyacı var.

"Bu festivalda məhz bu baş verir. Ümid edirəm ki, bundan sonra Azərbaycanda multiplikasiya, animasiya uğurla inkişaf edəcək. Ölkədə bir neçə kiçik studiya var, onlarda iki-üç nəfər işləyir, amma bu, kifayət deyil", deyə Pənahi əlavə edib və festival iştirakçılarına uğurlar arzulayıb.

Animasiya ustası, məşhur kino rejissoru Elçin Hami Axundov qeyd edib ki, Azərbaycanda sonuncu dəfə belə festival 1975-ci ildə keçirilib: həmin vaxt Məsud Pənahinin filmi birinci yeri tutub. SSRİ məkanında birinci yeri tutmaq kifayət qədər çətin və fəxr verici idi. Bu, studiyamızda böyük ajiotaj yaradıb. Amma sonradan ajiotaj azaldı, sahə sanki arxa plana keçdi. Ölkədə animasiyanın dirçəlməsinə ümid edirəm və festival iştirakçılarına və təşkilatçılarına təşəkkür edirəm".

Məşhur Gürcüstan animatoru Ketevan Canelidze festival təşkilatçılarını təbrik edərək bildirib ki, 10 il əvvəl Gürcüstanda animasiyanın vəziyyəti acınacaqlı idi, Gürcüstan animatorları da belə bir iş gördü, festival təşkil etdi: "İndi isə bizdə artıq iki beynəlxlaq festival keçirilib, bu, animasiyanın inkişafına təkan verir. Festivalı təşkil etməklə, bu işlə məşğul olan insanlara təşəkkür edirsiniz. Uğurlar arzulayıram".

Kinoşünas Sevinc Əzimova, "Azərbaycan Animasiyası" kitabının həmmüəllifi də animasiyanın əhəmiyyətini qeyd edib: "Animasiya təkcə uşaqlar üçün vacib deyil. Onun köməyilə siyasi, sosial siqnallar, gizli mənalı siqnallar vermək olar, bu və ya digər animasiya filmində bunu görmürük. Mənə elə gəlir ki, animasiya diqqətsiz qalmamalıdır, cəmiyyət üçün onun inkişafı vacibdir".

Rusiyalı rejissor-animator Cahangir Süleymanov animasiya sahəsində ilk addımlarını atdığı şəhərdə festivalda iştirak etdiyi üçün şad olduğunu qeyd edib: "Şəhərdə gəzərkən həyat yoldaşım qeyd etdi ki, Bakı elə bir şəhərdir ki, burada yaradıcılıqla məşğul olmaq istəyirsən. Ümid edirəm ki, festival Azərbaycanda animasiyanın inkişafına ilk təkan olacaq".

Mətbuat konfransında Rəşid Ağamalıyev qeyd edib ki, belə festivalların keçirilməsi və ölkədə animasiyanın inkişafı üçün dövlətin ciddi dəstəyinə ehtiyac var: "Bu festivalı mən öz vəsaitimlə təşkil etmişəm. Doğrudur, bizə bu konfrans üçün, sərgi və təqdimat üçün təmənnasız yer veriblər. Amma bu, kifayət etmir. Böyük beynəlxalq festival təşkil etmək və keçirmək üçün sadəcə olaraq böyük vəsait lazımdır və buna görə dövlətlə birgə işə ehtiyac var", deyə Ağamalıyev qeyd edib. -0-