Bakı/09.10.18/Turan: Oktyabrın 10-da Bakıda doqquzuncu Avropa Filmləri Festivalı start götürür. Festival Aİ-nin Azərbaycandakı nümayəndəliyi, Aİ ölkələrinin və Norveçin Bakıdakı səfirlikləri "ParkCinema" kinoteatrlar şəbəkəsinin dəstəyi ilə təşkil edilib.
Oktyabrın 21-də başa çatacaq festival çərçivəsində 17 Aİ ölkəsindən, Norveç və Azərbaycandan 19 film nümayiş olunacaq.
Azərbaycanlı tamaşaçılar Belçika, Bolqarıstan, Xorvatiya, Çexiya, Fransa, Almaniya, Macarıstan, İtaliya, Latviya, Niderland, Norveç, Polşa, Portuqaliya, Rumıniya, İspaniya, İsveç, Böyük Britaniya kinematoqrafçılarının 2016-2018-ci illərdə çəkdiyi filmləri izləyə biləcəklər. Mətbuat konfransında çıxış edən Aİ-nin Azərbaycandakı nümayəndəliyinin rəhbəri Kyastitus Yankauskas qeyd edib ki, əvvəlki səkkiz festival ərzində Bakıda 128 film nümayiş olunub.
"Filmlər vasitəsilə bir-birimizin problemlərini, həyat tərzini öyrənmək istəyirik. Festivalda bütün kino janrları - komediya, faciə, romantika, sənədli filmlər nümayiş olunaca", deyə Aİ missiyasının rəhbəri bildirib.
K.Yankauskas bildirib ki, festival çərçivəsində bəzi filmlərin rejissorları Bakıya gələcək, onlar master-klaslar və tamaşaçılarla görüşlər keçirəcəklər.
"Azərbaycan ictimaiyyəti və Aİ arasında münasibətlərin daha sıx, inteqrasiyanın daha dərin olmasını istəyirik", deyə Aİ nümayəndəliyinin rəhbəri bildirib.
"ParkCinema"nın marketinq departamentinin direktoru Vəfa Əsədova qeyd edib ki, Festival Azərbaycan tamaşaçısının Avropada kinematoqrafiya sahəsində yeniliklərlə tanış olmaq imkanı verir.
Festival "Kinçem" (Macarıstan) və "Vəhşi şəhər" (Niderland) filmləri ilə açılacaq.
Mətbuat konfransında çıxış edən Macarıstanın Azərbaycandakı səfiri Viktor Sederkenyi bildirib ki, Macarıstan kinematoqrafiyası "renessans dövrü" yaşayır.
"Hökumət film istehsalına maliyyə ayırır. Dövlət dəstəyinin nəticəsi olaraq 2016 və 2017-ci illərdə iki macar filmi "Oskar"a layiq görülüb. Bundan başqa, Budapeşt müxtəlif ölkələrin çox sayda filmlərinin, o cümlədən məşhur Hollivud filmlərinin çəkildiyi şəhərə çevrilib", deyə Macarıstan diplomatı bildirib.
"Kinçem" filmi haqqında danışan səfir qeyd edib ki, süjet real hadisələrə əsaslanır. "Kinçem sahibi 1848-ci il inqilabı zamanı dostlarına qədər hər şeyini itirən bir atın adıdır. Onun atı "Kinçem" əlində qalan tək şeydir. Sahibi atını yarış üçün təqdim edir, o, 54 qaçışın 54-də də qalib gəlir. Həmin vaxtdan etibarən "Kinçem" mübarizə, intiqam, məşhurluq rəmzidir", deyə Sederkenyi bildirib.
Niderlandın Azərbaycandakı səfirinin müavini Zumreta Yaxiç qeyd edib ki, onların filmləri "Hollivud və Bollivud filmi olmasa da, maraqlıdır".
"Biz Bakıda Amsterdama, onun dinamikliyinə həsr olunmuş "Vəhşi şəhər" filmini nümayiş etdirəcəyik. Şəhərlər təkcə insanlar üçün deyil, həm də təbiət nümayəndələri - heyvanlar üçün tikilir. Filmdə yaşlı pişiyin adından şəhər haqqında danışılır. Başqa sözlə, tamaşaçılar Amsterdamı pişiyin gözlərindən görəcəklər", deyə Yaxiç qeyd edib.
Qeyd edək ki, hər iki film Azərbaycan dilində subtitrlərlə nümayiş olunacaq. Digər filmlər üçün Azərbaycan dilində subtitr olmamasının səbəbləri haqqında danışan Aİ-nin Azərbaycan nümayəndəliyinin siyasi və sosial məsələlər və ictimaiyyətlə əlaqələr şöbəsinin müdiri Denis Daniilidis qeyd edib ki, təşkilatçılar festivalda yeni filmlər təqdim etməyə çalışırlar və onların əksəriyyəti cəmi bir dəfə nümayiş olunur. "Bu səbəbdən həmişə filmləri Azərbaycan dilinə tərcümə etmək imkanı olmur. Bu məsələdə başqa bir problem filmin nümayiş olunduğu auditoriyanın genişliyidir. Konkret filmin Azərbaycanın başqa şəhərlərində də nümayiş olunacağını və auditoriyanın geniş olacağını bilsək, tərcümə xərcləri məntiqli olar", deyə diplomat bildirib.
Festival çərçivəsində nümayiş olunacaq filmlər haqqında fikir bildirən D.Daniilidis Belçikalı kinematoqrafların "Suriyada" adlı filmini xüsusi olaraq qeyd edib. "Bu, Suriyada, təəssüf ki, indiyə qədər davam edən hadisələr haqqında çox güclü filmdir. Azərbaycan tamaşaçısına təkcə komediya və romantika janrında deyil, həm də hazırda dünyanı narahat edən problemlərdən bəhs edən filmlər nümayiş etdirdiyimizi göstərmək istəyirik", deyə D.Daniilidis qeyd edib.
Qeyd edək ki, festival çərçivəsində film senaslarına giriş pulsuz olacaq. -71C-
Mədəniyyət
-
Ekranın cazibəsi tez-tez aktrisaların, xüsusilə yaşlandıqca qarşılaşdıqları ifadə olunmayan mübarizələri gizlədir. Parlaq işıqların və alqışların arxasında, stereotiplərlə, cəmiyyətin təzyiqləri ilə və məhdud imkanlarla dolu bir reallıq dayanır. Bir çox aktrisa üçün zamanın keçməsi yalnız şəxsi kimliklərini deyil, həm də gənclik və ənənəvi gözəllik standartlarına fokuslanmış bir sənayedə peşəkar varlıqlarını təhdid edir.
-
Bakının hərəkətli küçələrində, dəbin şəhərin siluetləri qədər dinamik olduğu bir mühitdə, sakit bir inqilab baş verir. Azərbaycanın tullantıların idarə edilməsində əldə etdiyi uğurlara baxmayaraq, geyim və tekstil tullantıları məsələsi ətraf mühitin inkişafına kölgə salmaqda davam edir. Təkcə 2023-cü ildə ölkədə 2,7 milyon ton bərk məişət tullantısı yaranıb. Bu rəqəm atılan geyimlərin artan miqyasını gizlətsə də, qlobal trendlərlə bənzərlikləri nəzərə çarpır. ABŞ-da hər il təxminən 17 milyon ton geyim tullantıya atılır, Avropa İttifaqında isə bu rəqəm 5,8 milyon tona çatır. Proqnozlara əsasən, sürətli dəbin inkişafı ilə bu göstərici 2050-ci ilə qədər 175 milyon tona qədər yüksələ bilər.
-
Azərbaycanda ianə mədəniyyəti zəngin tarixi keçmişə malik olsa da, müasir dövrdə bu ənənənin qarşılaşdığı problemlər də az deyil. İanələrin hədəf auditoriyaya çatması ilə bağlı şəffaflıq məsələləri, insanların inamının azalması və davamlı dəstək mexanizmlərinin olmaması bu sahədə əsas problemlərdən biridir. Həmçinin, ianə mədəniyyətinin təbliğatının zəif olması cəmiyyətin daha geniş təbəqələrində bu anlayışın inkişafına mane olur. İanələrin sosial təsirini artırmaq üçün həm maarifləndirmə, həm də müasir həllər vacibdir.
-
Soyuq bir dekabr həftəsonunda, Bakının mərkəzində yerləşən Passage1901 məkanı yaradıcılıq, ticarət və icma ruhunun canlandığı bir məkan oldu. Yerli brendləri, sənətkarları və kiçik biznesləri dəstəkləməyə həsr olunmuş “Bizimkilər” Festivalı 14-15 dekabr tarixlərində uzun fasilədən sonra yenidən baş tutdu. İki gün davam edən yenilikçi proqramla festival bir daha sənət ifadəsi, yerli sahibkarlıq və xeyriyyəçilik üçün canlı bir platforma olduğunu sübut etdi.
Rəy yaz