İsveçrəli pianoçu Bakıda konsert verəcək

Bakı /05.01.17/Turan: Yanvarın 27-də Bakı Beynəlxalq Muğam Mərkəzində, yanvarın 28-də isə Landmark otel və biznes mərkəzində isveçrəli bugi-vugi və blüz ifaçısı Silvan Zinggin təqdimatında Bugi-Vugi konserti keçiriləcək.

Silvan Zingg Bugi-vugi və blüz janrında ifa edən istedadlı pianoçudur. O, Çak Berri, Rey Çarlz, Keti Vebster, Semmi Prays, memfis Slim, çempion Cek Düpri, Tito Cekson və bir çox digər məşhurlarla eyni səhnədə çıxış edib. Tənqidçilər onun texnikasından və şən entuziazmından təsirlənərək onu qeyri-adi pianoçu kimi təsvir edirlər. Onun ən böyük hiti olan "Dancing The Boogie" musiqisi Youtube-da 8.1 milliondan çox izləyici toplayıb. Bu növ musiqi janrına olan həvəsi 2002-ci ildə İsveçrədə hazırda da çox uğurla keçirilən Luqano Beynalxalq Bugi Vugi Festivalını təsis etməsinə səbəb olub.

İsveçrənin Azərbaycandakı səfirliyi, Beynalxalq Muğam Mərkəzi və Landmark-ın birgə əməkdaşlığı ilə Zinggin möhtəşəm və yaradıcı performansını təqdim etməkdən qürur duyur. Konsertin programı çox şəndir və Bakıda Yeni il üçün çox gözəl başlanğıcdır. Zinggin canlı və pozitiv enerjisi tamaşaçıları heyran edəcək.

Beynəlxalq Muğam Mərkəzində keçiriləcək konsertə biletləri Bakının bütün kassalarında və "iTicket.az" saytında əldə etmək olar.

Bazar günü Landmarkda keçiriləcək konsertə giriş dəvətnamə ilə olacaq.-06D-