Tamaşanın innovativ quruluşu özünü təsdiqetmə şəraitində ənənəvi teatra meydan oxuyur

Müasir dövr insanı artıq çox sürətli yaşayır. Qızıldan dəyərli olan zamanını uzun filmlər, tamaşalara ayırmağa maraqlı deyil. Müasir insan qısa, aydın formada əldə edə biləcəyi məlumatları sevir. Müasir incəsənəti ənənəvidən fərqləndirən nüanslardan biridir. “Xəzinədar” səhnə əsərində də məhz bu var idi. İzləyiciyə qısa vaxt ərzində çox şey ötürərək düşünməyə vadar edir. Əsərdə hazırda cəmiyyətdə  olan bəzi problemlər, insanların xoşbəxtlik axtarışları kimi nüanslar vurğulanıb. Səhnə əsəri iki hissədən:  qısa film və tamaşadan ibarət olub. Səhnə əsərinin rejissoru Elvin Adıgözəl əsərin ideyası və ərsəyə gəlmə prossesi haqqında danışıb.

Elvin Adıgözəl deyir ki,  2011- ci ildə YUĞ teatrının sökülmüş binasında monotamaşa ilə başlayaraq daha sonrasında isə müxtəlif illərdə müstəqil şəkildə özəl teatr məkanlarında səhnə əsəri hazırlayıb. Amma 2016 - cı ildə artıq teatra aid heç nə etməmək qərarı verib.

“Keçən il Georq Kayzerin "Səhərdən gecəyarısınadək" pyesi ilə tanış oldum, beləliklə yenidən səhnə əsəri hazırlamaq həvəsim yarandı. Amma bu, pyesin motivlərindən çıxış edərək öz istədiyim kimi hazırlamaq, müstəqil baxışımı göstərmək həvəsi idi”.

Elvin Adıgözəl bu səhnə əsərini hazırlamaq üçün bir ilə yaxın vaxt sərf edib. Bü müddətdə bir çox işlər görüb.

“Onun bir hissəsi əsərin motivlərini mənim quracağım formata uyğunlaşmasına həsr edildi. Bir hissəsi isə tamaşanı göstərmək üçün mübarizə aparmağa. Tamaşa "Xəzinədar" aldansa da, bu, tək bir qəhrəmanın hekayəsi deyil. Yəni, tamaşada məqsəd, ümumiyyətlə, video görüntülər ilə səhnədə oyunun kombinasiyası, bir bankın hökmranlığı və insan psixologiyasının nələr edəcəyini vurğulamaq üçün idi”.

Rejissor vurğulayıb ki,  bu tamaşa "komediya del arte" elementlərini özündə birləşdirən bir aktyorluq üzərində qurulub. Onun sözlərinə görə, aktyorlar da onun göstərmək istədiklərini tez bir zamanda anlayaraq ortaya çox yaxşı iş çıxarıblar.

Elvin Adıgözəl tamaşanın nümayişində çox əziyyət çəkdiyini qeyd edib. Onun sözlərinə görə, bu gün Azərbaycanda dövlət teatrlarının qapıları müstəqil sənətçiyə bağlıdır. Belə ki, Musiqili Komediya Teatrının rəhbəri bu tamaşa barəsində Mədəniyyət Nazirliyinin teatr şöbəsi tərəfindən məlumatlandırılsa da, ona səhnə verilməyib.

“Gənc Tamaşaçılar Teatrının keçmiş baş rejissoru və indiki teatr rəhbəri ilə görüşüb söhbət etsəm də, mənə böyük səhnəni vermədilər, çox məşgul olduqlarını bəhanə gətirdilər. Və nəhayət, Mədəniyyət Nazirliyinin teatr sektorunun həm keçmiş, həm də hazırkı rəhbərliyi bu tamaşanı səhnələmək üçün heç bir teatrda mənə imkan yarada bilmədilər”.

Bunu istəməsinin əsas səbəbi yerli dəstəyi alaraq daha çox izləyiciyə çatma istəyi olub.

Rejissor Azərbaycanda kino və teatr sahəsində heç bir maliyyə resurslarının olmaması fəaliyyəti haqqında dəqiq nəsə planlaya bilməyib. O deyir ki, burada müstəqil sənətçilər üçün şəraitin olmaması gələcək planları qurmasını çətinləşdirir.  “Yəni, əlbəttə, dövlətin mədəniyyət siyasəti sənətin inkişafı və sənətçinin öz işindən yaşayışını təmin etməsi yönündə olsa idi, daha çox işlər edərdim. Amma təəssüf ki, bu ölkədə mədəniyyət, sənət və sənətçinin sənətini icra etməsi üçün şərait demək olar ki, hər il daha da çətinləşir. Buna baxmayaraq, mənim sənət sevgim həmişəlikdir, məğlubedilməzdir”.

Kino tənqidçi Aygün Aslanlı da nümayişdə iştirak edənlərdən olub. Aygün Aslanlı səhnə əsəri haqqında öz fikirlərini bölüşüb:

“Rejissor orada video və tamaşa janrından əlavə başqa janrları da qatmağa çalışmışdı. Musiqili janrı var idi. O, estetikadan istifadə eləməyə çalışmışdı. Amma o, janrlar arasında keçid əlaqəsini qura bilməmişdi. Ona görə də bir az dağınıqlıq, səliqəsizlik təsiri yaradırdı. Amma  Azərbaycanda başqa müəlliflərin, müasir  müəlliflərin əsərlərinin də səhnələşdirilməsi çox yaxşı haldır.  Yəqin ki, gedişatda tamaşa göstərildikcə o qüsurlar da aradan qalxacaq”.

Tamaşa zamanı izləyicilər öz təəssüratlarını alqışlarla ifadə etməyə çalışıb. Tamaşa bitdikdən sonra izləyicilər rejissor və aktyorlara təşəkkür edərək zaldan məmnuniyyət hissi ilə ayrılıb.