Almaniya Türkiyənin Avropa Birliyinə üzvlüyünə dəstək verməyib

Türkiyə xəbər saytları Almaniya mətbuatına isnadən Türkiyə baş naziri Erdoğanın bu ölkəyə səfəri və siyasi davranışları və kansler Angela Merkel ilə münasibətləri haqda yazıb.

“Die Velt” qəzeti yazır ki, Almaniya kansleri Merkel Türkiyə iqtidarını demokratik prinsiplərdən geri çəkilməkdə ittiham edib. Buna görə Türkiyənin Avropa Birliynə üzvlüyünə etiraz edib. Qəzetə görə, bu, həm də Erdoğanın “Türkiyənin Avropa Birliyinə yox, Avropa Birliyinin Türkiyəyə ehtiyacı var” siyasi formuluna Merkelin cavabıdır. Qəzet daha bir nöqtəyə toxunaraq Erdoğanın artıq baş nazir yox, prezident olmağa hazırlaşdığını nəzərə çatdırır.

“Frankfurter Allgemeine Zeitung” qəzeti də Merkelin Erdoğana üz vermədiyini, AB üzvlüyü üçün Almaniyadan istədiyi dəstəyə kanslerin soyuq yanaşdığını yazıb. Erdoğan Türkiyədə məhkəmələrə təzyiq etməsi haqda bəyanatları inkar etmək istəsə də, rəsmi Berlini buna inandıra bilməyib. “Westdeutsche Allgemeine Zeitung” (WAZ) qəzeti isə Erdoğanın AB üzvü olması üçün dəstək istəməsini, Merkelin isə qonağı ilə Türkiyədə korrupsiya, insan haqlarından danışmağı üstün tutmasına diqqət çəkir. 

“Fokus” qəzeti iki lider arasında ciddi fikir ayrılığından yazıb. AB mövzusunda Almaniya kanslerinin Erdoğanla həmfikir omadığını qeyd edir. Müxalifətə qarşı sərtlik, məhkəmələrin azadlığına məhdudiyyətlər qəzetlərin xəbər başlıqlarına çıxıb. Belə başlıqlar Türkiyə ilə bağlı üzvlük müzakirələrinə zərbə vurur və kansler də bu barədə tərəddüd edir.

“Der Spiegel”ə görə isə, Erdoğan kanslerin yanında kübar davranıb, Türkiyədəki  problemləri ört-basdır etməyə çalışıb, bir sözlə siyasi şou göstərib. Qəzetə görə, Erdoğan üçün əsas Türkiyənin AB-yə üzv olması yox, ona səs verməsini istədiyi Almaniyadakı yüz minlərlə seçicinin səsini qazanmaqdır. -05D-