Bu gün Xalq Cəbhəsi Partiyasının liderinin müşaviri, xuliqanlıqda ittiham olunan Məmməd İbrahimin işi üzrə məhkəmə prosesində zərərçəkmişlərdən biri çıxış edib.
Oruc Vəliyev iddia edib ki, 2015-ci il noyabrın 29-da o, Nərimanov rayonunda bir çayxananın qarşısında İbrahimi və Mikayıl Quliyevi ayırmağa çalışıb, amma müxalifətçi ona hücum edib və bir neçə zərbə vurub. İstintaq onun sağlamlığına az ağır ziyan vurulması haqqında məhkəmə-tibbi ekspertiza rəyini təqdim edib.
Lakin İbrahimin sözlərinə görə, Vəliyev hadisə zamanı ümumiyyətlə orada olmayıb.
Vəkil Yalçın İmanovun suallarına zərərçəkmiş Vəliyev istintaqda verdiyi ifadələrinə zidd cavablar verib.
Belə ki, o, məhkəmədə etiraf edib ki, oktyabrın 1-də polisə müraciət edib, baxmayaraq ki, ibtidai istintaqda hadisə iştirakçıları ilə birlikdə onu da polisə apardıqlarını bildirmişdi.
Vəliyev məhkəmədə bildirib ki, İbrahim ona ağır yumruq zərbəsi vurub, istintaqda isə bir neçə zərbə vurulduğunu iddia edib.
O, ifadələrindəki ziddiyyəti yaddaşının pis olması və hadisələri dərk etmək qabiliyyətinin olmaması ilə izah edib. Bununla əlaqədar olaraq vəkil Vəliyevin adekvatlığının müəyyən edilməsi üzrə məhkəmə-tibb ekspertizası keçirilməsi haqqında vəsatət qaldırıb. Məhkəmə vəsatəti baxılmamış saxlayıb. Yanvarın 22-də növbəti iclasda vəkil təkrarən vəsatət irəli sürmək niyyətindədir.
Vəkil İmanov Turan-ın müxbirinə bildirib ki, ittihamın sadə “xuliqanlıq”dan “ictimai asayiş keşikçisinə qarşı güc tətbiq etməklə xuliqanlıq” olaraq gücləndirilməsi üçün Oruc Vəliyev və Məhəmməd Qurbanov “keçmiş tarixlə” zərərçəkmiş qismində cəlb edilib.
Xatırladaq ki, İbrahim AXCP sədrinin keçmiş müavini Razi Nurullayevlə birlikdə təşkilatı tərk etmiş keçmiş partiya üzvü Mikayıl Quliyevin şikayəti ilə həbs edilib. Lakin əvvəlki iclasda Quliyev İbrahimə qarşı şikayətindən imtina edib.
AXCP-də hesab edirlər ki, İbrahimə qarşı partiyanın gözdən salınması məqsədilə təxribat törədilib. İlkin olaraq İbrahimə qarşı CM-in 1 ilədək azadlıqdan məhrumetmə cəzası nəzərdə tutan 221.1-ci (xuliqanlıq) maddəsi ilə ittiham irəli sürülüb. Sonradan istintaq köhnə tarixlə iki “zərərçəkmiş” cəlb edib və ittihamı 221.2.2-ci maddəyə tövsif edib. Bu maddə üzrə o, 5 ilədək azadlıqdan məhrum edilə bilər. -06B-
Siyasət
-
Azərbaycan bu həftə Fransada keçirilən Fransızofoniya Sammitindən sonra Ermənistana təxribatçı hərəkətlərdən çəkinməyə və ya normallaşma prosesini tamamlamaq, ya da qarşıdurma yolunu seçmək arasında qərar verməyə çağırıb.
-
Milli Məclisin 43 deputatı xarici işlər naziri Ceyhun Bayramova müraciət edərək, ABŞ-la münasibətlərə yenidən baxılması və müdafiə sahəsində əməkdaşlığa dair sazişlərin denonsasiyası çağırışı ilə çıxış edib.
-
Prezident İlham Əliyev 2024-2025-ci tədris ilində Azərbaycan Respublikasının ali təhsil müəssisələrinə daxil olan tələbələrə prezident təqaüdlərinin verilməsi haqqında sərəncam imzalayıb.
-
Oktyabrın 4-də Azərbaycanın Rusiyada yeni fövqəladə və səlahiyyətli səfiri Rəhman Mustafayev Rusiya xarici işlər naziri Sergey Lavrov tərəfindən qəbul edilib.
Rəy yaz