Azərbaycan məhbusların sayının çox olduğu Avropa ölkələri sırasındadır

Bakı/06.04.22/Turan:   Covid-19 pandemiyası 2020-ci ilin yanvar ından 2021-ci ilin yanvarınadək Avropada məhbusların sayının azalmasına səbəb olub. Bu barədə üzv ölkələrin həbsxanalarında cinayət-icra vəziyyətinin illik statistikası ilə bağlı Avropa Şurasının mətbuat xidmətinin məlumatında deyilir.

Pandemiya dövründə hərəkətin məhdudlaşdırılmasına görə cinayətlərin azalması, məhkəmə sisteminin işinin ləngiməsi və koronavirusun yayılmasının qarşısını almaq və ya azaltmaq məqsədilə məhbusların azad edilməsi onların sayının azalmasının əsas amillərindən biri olub.

2021-ci il 31 yanvar üçün Avropa Şurasına üzv 49 dövlətdə 1 414 172 məhbus olub. Bu, Avropa səviyyəsinə - 100 000 sakinə 102 məhbus – uyğundur.

Son bir ildə bu göstərici 100 000 sakin üçün 104,3 məhbusdan 101,9-ə qədər (-2,3 faiz) enib.

Azərbaycan  100 000 nəfərə 216 məhbusla məhbus səviyyəsinin ən yüksək olduğu ölkələr arasındadır və  Rusiya Federasiyası (328), Türkiyə (325) və Gürcüstanın (232) ardınca dördüncü yeri tutub.

Bununla yanaşı, Azərbaycanda məhbusların ümumi sayı 2020-ci illə müqayisədə 3,3 faiz artaraq 21 012 nəfər olub.

Həbsxanalardakı sıxlıq baxımından Azərbaycanda hər 100 yerə 85,5 məhbus düşür ki, bu da Avropa üzrə orta göstəriciyə (84,5) bərabərdir.

Avropada məhbusların 4,7 faizi qadınlardır. Azərbaycanda bu göstərici 2,7 faiz təşkil edir ki, bu da orta Avropa göstəricisindən xeyli aşağıdır.

Ümumilikdə Avropada məhbusların 15,3 faizini əcnəbilər təşkil edib. Azərbaycanda onlar ümumi sayın 2,2 faizini təşkil edir ki, bu da Avropada ən aşağı göstəricilərdən biridir.

2020-ci ildə Avropa həbsxanalarında intihar səviyyəsi 10 000 məhbusa 5,7 olub. Azərbaycanda 1,8-dir.

2020-ci ildə Avropada məhbusların sutkalıq orta xərcləri 77 avro təşkil edib. Azərbaycanda bu göstərici 8,08 avrodur. 2020-ci ildə Azərbaycanda penitensiar sistemin ümumi büdcəsi 63 780 807 63 avro təşkil edib.—06B-