Azərbaycan XİN Ceyms Uorliki Ermənistanın maraqlarına xidmət etməkdə ittiham edib

  ATƏT-in Minsk Qrupunun amerikalı həmsədri Ceyms Uorlik Azərbaycanın işğal edilmiş ərazilərindən, Dağlıq Qarabağ da daxil olmaqla, erməni qüvvələrinin dərhal çıxarılması ilə bağlı britaniyalı deputat Uolterin məruzəsinin AŞPA Siyasi Komissiyasi tərəfindən təsdiqlənməsini tənqid edib.

Uorlik Twitter-dəki mikrobloqunda yazıb: “AŞPA və ya digər beynəlxalq təşkilatlar Qarabağ münaqişəsinə dair hər hansı məruzə və ya qətnaməni təqdir etməzdən öncə ATƏT-in  Minsk Qrupu ilə məsləhətləşməlidir”.

Bu bəyanat Azərbaycan XİN-in ciddi narazılığına səbəb olub.

ATƏT-in Minsk Qrupunun həmsədrləri münaqişənin həlli istiqamətində hər hansı cüzi irəliləyişə belə nail olmayıblar. Odur ki, Ceyms Uorlikin münaqişənin həlli ilə əlaqədar digər təşkilatlara məsləhət və ya tövsiyə verməyə əsası və haqqı yoxdur, Azərbaycan XİN mətbuat xidmətinin rəhbər Hikmət Hacıyev bildirib.

Onun sözlərinə görə, indiyə qədər ATƏT-in Minsk Qrupunun həmsədrləri tərəfindən həyata keçirilən fəaliyyətin mahiyyəti sıfıra bərabərdir:  “Ona görə də münaqişənin həllinə töhfə verməyə çalışan digər beynəlxalq qurumların mənasız fəaliyyətlə məşğul olan ATƏT-in Minsk Qrupunun həmsədrləri ilə məsləhətləşməsinə heç bir lüzum görülmür”, - H.Hacıyev vurğulayıb.

“ATƏT-in Minsk Qrupunun bu cür yarıtmaz fəaliyyəti Ermənistanın maraqlarına xidmət edir. Ceyms Uorlikin də Ermənistanın işğalçılıq siyasətinin davam etdirilməsinə xidmət edən bu planın tərkib elementi olması istisna deyil", - H.Hacıyev qeyd edib.

Xatırladaq ki, noyabrın 4-də AŞPA Siyasi Məsələlər Komissiyası Dağlıq Qarabağdan və Azərbaycanın işğal edilmiş digər ərazilərindən erməni silahlı qüvvələrinin çıxarılmasına və Minsk prosesi çərçivəsində həmin ərazilərdə Azərbaycanın tam suverenliyinin tanınmasına çağıran layihəni təqdir edib. -02D-